Saray Salmo 118 - Maung A Balita Biblia

Pisasalamat Lapud Impanalo

¹ Misalamat kayod Katawan, ta sikato et maung, tan andi-anggaan so panangaro to.

² Ikuan komun na saray totood Israel, “Andi-anggaan so panangaro to.”

³ Ikuan komun na saray papari na Dios, “Andi-anggaan so panangaro to.”

⁴ Ikuan komun na saray mangigagalang ed sikato, “Andi-anggaan so panangaro to.”

⁵ Diad kasesegsegang ko, tinmawag ak ed Katawan; inebatan to ak tan imbolus to ak.

⁶ Kaibak so Katawan, ag ak ontakot; antoy nagawaay too ed siak?

⁷ Say Katawan so ontutulong ed siak, et nanengneng koy katalo da ray kalaban ko.

⁸ Maung ni so manmatalek ed Katawan, nen say manmatalek ed too.

⁹ Maung ni so manmatalek ed Katawan, nen say manmatalek ed saray totoon pangulo.

¹⁰ Niliktub ak na amayamay a kalaban; balet pinapatey ko ra diad panamegley na pakayariy Katawan!

¹¹ Niliktub da ak ed amin a dapag, balet pinapatey ko ra diad panamegley na pakayariy Katawan!

¹² Singa ra bayaung ya angambungal ed siak, balet naoput iran tampol a singa pinoolan a sinigit; pinapatey ko ra diad panamegley na pakayariy Katawan.

¹³ Dinogpaan da ak, et ngalngali ak la atalo, balet tinulongan ak na Katawan.

¹⁴ Say Katawan iitdan to ak na pakayari tan biskeg; inlaban to ak.

¹⁵ Dengel yoy maliket iran eyag na impanalo diad katuldaan da ray totooy Dios: “Say mabiskeg a pakayariy Katawan so nanggawad saya!

¹⁶ Say pakayariy Katawan so angiter ed sikatayoy pananalo— say mabiskeg a pakayari tod bakal!”

¹⁷ Ag ak ompatey, no ag ta mambilay ak tan ibawag ko ray ginagaway Katawan.

¹⁸ Mapalaloy impanusay Katawan ed siak, balet ag to ak inabuloyan ya ompatey.

¹⁹ Ilokas yon para siak iray puirta na Timplo; onloob ak tan misalamat ak ed Katawan!

²⁰ Saya so puirtay Katawan; saray matonung labat so makaloob.

²¹ Idadayew ta ka, Katawan, lapud dinengel mo ak, tan initdan mo ak na pananalo.

²² Say baton impasen ya andi-kakanaan na saray karpintiro nagmaliw lamlamang a sankakanaan a bato.

²³ Ginawa ya na Katawan; makapakelkelaw a nengnengen!

²⁴ Sikato yay agew na panangilaban na Katawan; manliket tan manggayaga tayo!

²⁵ Ilaban mo kami, pikasi mid sika, Katawan! Paaligwas mo kami pa, Katawan!

²⁶ Bindisionan komuy Dios so onsabid ngaran na Katawan! Manlapud Timploy Katawan bibindisionan mi ka!

²⁷ Say Katawan et Dios; inimisan to tayo. Bembenan yo ray sangasangay kiew, ta igapo yo lay pista tan liber-liber yoy altar.

²⁸ Sikay Dios ko, et misalamat ak ed sika; ibawag koy inkatalonggaring mo.

²⁹ Misalamat kayod Katawan, ta sikato et maung, tan andi-anggaan so panangaro to.