Saray Salmo 113 - Maung A Balita Biblia

Pangidayew ed Kaabigay Katawan

¹ Idayew yoy Katawan! Sikayo ran aripen na Katawan, idayew yoy ngaran to!

² Nagalang komun so ngaran to, natan tan diad ando lan ando.

³ Manlapud bokig ya anggad sagur idayew yoy ngaran na Katawan!

⁴ Ooleyay Katawan iray amin a bansa, atagey nen saray katawenan so kagalangan to.

⁵ Anggapoy mipara ed Katawan a Dios tayo. Manaayam ed sankatageyan,

⁶ balet onoosdung a mangimano ed saray katawenan tan dalin.

⁷ Babangonen ton manlapud dabuk iray mairap-bilay; aagwaten tod kairapan iray walad pankaukolan;

⁸ tan pipiolupen to rad saray prinsipi, saray prinsipi da ray totoo to.

⁹ Papagalangan tod abung, na asawan anggapoy anak; paliliketen to diad pangiter to ray anak ed sikato. Idayew yoy Katawan!