Saray Salmo 103 - Maung A Balita Biblia

Say Panangaroy Dios

¹ Kamarerwak, idayew moy Katawan! Sigput ya inkatook, idayew moy masanton ngaran to!

² Kamarerwak, idayew moy Katawan, tan ag mo lilingwanan so ontan lan panangasi to.

³ Papaandien ton amin iray kasalanan ko tan papaabigen ton amin iray sakit ko.

⁴ Iyaagel to ak ed lobuk, tan ibibindision tod siak so panangaro tan panangasi.

⁵ Papanoen toy bilay ko na saray kaabigan, pian makapansiansia ak a malangwer tan mabiskeg a singa agila.

⁶ Diad pananintinsia na Katawan pipilaan to ray napapairap, tan iiter toy kanepegan da.

⁷ Impaamta tod kinen Moises iray plano to, tan impanengneng tod saray totood Israel iray ginagawa to.

⁸ Maaro tan mapangasi so Katawan, aliwan maipapasnuk tan napno na ag mangoman a panangaro.

⁹ Aliwan lawas so panagpasnuk to; aliwan anggad angga.

¹⁰ Ag to itayo dudusaen onung ed kanepegan tayo, odino babalesen onung ed saray kasalanan tan kaogsan tayo.

¹¹ No panoy kaatagey na tawen manlapud dalin, ontan met so kabaleg na panangaro tod saray mangigagalang ed sikato.

¹² No panoy kaarawiy bokig ed abalaten, ontan met so kaarawiy impangekal tod sikatayo na saray kasalanan tayo.

¹³ No panoy panangasi na ama ed saray anak to, ontan met so pangakasiy Katawan ed saray mangigagalang ed sikato.

¹⁴ Amta to no antoy inkagawa tayo; nanununotan ton dabuk itayo.

¹⁵ Para sikatayon totoo, singa labat dika so bilay tayo. Ombabaleg tan ombobona itayon singa rosas a balang;

¹⁶ insan sisiplugey dagem, et naandi la— ag la nanengneng na siopaman.

¹⁷ Balet mansiansian anggad angga so panangaroy Katawan ed saray mangigagalang ed sikato, tan magnayon ed amin a kailalakan so kaabigan to,

¹⁸ diad saray matoor ed impisipanan to tan mangoonur na saray ganggan to.

¹⁹ Inletneg na Katawan so trono to ed tawen; sikatoy ari ed sankamundoan.

²⁰ Idayew yoy Katawan, sikayo ran mabiskeg tan makapanyarin anghil a manusumpal na saray ganggan to tan onderengel na ibabaga to.

²¹ Idayew yoy Katawan, amin yo ran mangatatawen a pakayari, sikayo ran aripen to a mangoonur ed linawa to!

²² Idayew yoy Katawan, amin yo ran pinalsa to, diad amin a pasen panooleyan to. Kamarerwak, idayew moy Katawan!