Saray Salmo 10 - Maung A Balita Biblia

Say Pikekerew na Inkatonung

¹ Katawan, akin et arawdawi ka? Akin et onaamut ka no nagugunigon kami?

² Mapaatagey iray totoon maoges tan papairapen da ray mairap-bilay; erel mo pa rad saray patit ya imparaan da.

³ Say toon maoges ipapanta toy maoges iran pilalek to; say toon maagom aayewen tan ipopolisay toy Katawan.

⁴ Say toon maoges ag to ikabkabilangan so Katawan; lapud panagpaatagey to iisipen ton singa anggapoy Dios.

⁵ Maaligwas so pansusumpalay amin a gagawaen na toon maoges. Ag to natatalusan iray sintinsiay Dios; eelek-elekan to ray kalaban to.

⁶ Kuantod sikaton dili, “Ag ak balut natalo; ag ak balut nagunigon!”

⁷ Napno na ayew, tila, tan taktakot iray balikas to; marlas a mansalitay ansakit tan maoges.

⁸ Amut-amut ed saray bario, tan diman to tatalaranan a pateyen iray totoon anggapoy kasalanan. Sisiimen to ray totoon pakaskasi;

⁹ singa lion a manaalagar ed amutan to. Tatalaranan to ray mairap-bilay, sisingkaten to rad patit to, insan to ra igagayugoy ya iyarawi.

¹⁰ Nababaktar iray totoon pakaskasi; tinalo ra na ontan lan biskeg.

¹¹ Say toon maoges kuantod sikaton dili, “Anggapoy pibabali na Dios! Inlikdem to ray mata to, kanyan ag to ak balut nanengneng!”

¹² Alagey ka, Katawan, ta dusam iray totoon maoges! Ag mo pa lilingwanan iray maniirap!

¹³ Panoy pakabalaw na toon maoges ed Dios tan pakapangikuantod sikaton dili, “Ag to ak dusaen”?

¹⁴ Balet nanaimatunan mo; nanaimanom so kairapan tan say kaermenan, et sipaparaan ka lawas ya ontulong. Say pakaskasin too imamatalek toy sikaton dili ed sika; tulongan mo lawas iray mankakaukolan.

¹⁵ Ekal mo pay pakayari na saray maoges tan bagel a totoo; dusam pa ra lapud kaogsan a ginagawa ra ya anggad ag ira ontonda.

¹⁶ Anggad angga ya ari so Katawan, tan naandipat ed dalin to iray ag manisiad sikato.

¹⁷ Dengelen mo, Katawan, so pikakasi da ray mapaabeba; pabiskegen moy linawa ra.

¹⁸ Dengelen moy tawag da ray napapairap tan saray olila; diad pananintinsiam kilingan mo ra pian ag la makapantaktakot iray totoon ompatey met lamlamang.