Saray Salmo 1 - Maung A Balita Biblia

ONONAN LIBRO (Saray Salmo 1–41 ) Say Tuan Liket

¹ Maliket so toon ag ontotombuk ed simbawa da ray totoon maoges, ag to aaligey kagagawa da ray totoon makasalanan, tan ag mikakasakey ed saray totoon managbalaw na kamaungan.

² Ingen, maliket a mangoonur na Ganggan na Katawan, tan agew-labi ton dadalepdepen.

³ Aliling toy kiew a nitanem ed abay na managos a danum; mambubunga no panaon to tan ag namamagaan iray bolung to. Onaaligwas iray amin a gagawaen to.

⁴ Balet aliwan onyay toon maoges, singa taep ya ititikyab na dagem.

⁵ Say Dios sintinsiaan ton nadusa so toon maoges, tan nibiig ed olupan da ray totoon matonung.

⁶ Say Katawan iwawanwan tan iyaagel to so toon matonung, balet nabalang ya anggad angga so toon maoges.