Saray Huis 7 - Maung A Balita Biblia

Tinalo nen Gedeon iray Madianita

¹ Aminsan ya agew asaksakbay a binmangon si Gedeon tan amin a totoo to tan nankampo ra ed abay na Sobul na Harod. Walad patar ed baybay da so kampo da ray Madianita diad abay na Pokdul na More.

² Say Katawan kuantod kinen Gedeon, “Dakerakel lan tuloy iray totoom a panaloen kod saray Madianita. Ompan abaloan da naani ya analo ra lapud pakayari ran dili, et ibaga ran anggapoy pibibiang ko.

³ Ibawag mod saray totoo, ‘Onsempet lay siopaman ya antakot, tan manayam kami diad Palandey na Galaad.’” Kanyan anempet la so duamplo tan duan libon lalaki, balet tinmilak so samplon libo.

⁴ Insan inkuan na Katawan ed kinen Gedeon, “Dakerakel nin siansiay totoom. Iyakar mo rad kawalaay danum, ta diman ko ibiig so para sika. No ibagak a mila ed sika so sakey a too, sikatoy milad sika. No ibagak ya ag milad sika so sakey a too, sikatoy ag milad sika.”

⁵ Intagar nen Gedeon ed kawalaan na danum ira may lalaki, insan inkuan na Katawan ed sikato, “Ibiig mon amin iray dildilan dan singa aso so danum ed saray totoon ontalimukor ya oninom.”

⁶ Walay talon lasus a lalaki ya angalaos na danum ed daklap da, insan da dinildilan; amin da ray arum et tinmalimukor iran inminom.

⁷ Inkuan na Katawan ed kinen Gedeon, “Iyagel tan panaloen ta kayod saray Madianita, sika tan saramay kakaibam a talon lasus a dinmildil ed danum. Ibagam ya onsempet la ray arum.”

⁸ Kanyan pinasempet nen Gedeon ya amin iray Israelita, likud ed saramay talon lasus a sikaray angala na amin ya abasto tan saray trumpita. Walad leksab da so kampo da ray Madianita diad patar.

⁹ Diad saman a labi ingganggan na Katawan si Gedeon, “Bangon kayo, ta dogpaan yoy kampo da ray Madianita; panaloen ta kayo.

¹⁰ Balet no antakot kayon ondogpa, lasur kad kampo a kaibam si aripen mon Pura.

¹¹ Narengel yod satan so ibabaga ra, et nawalaan ka na biskeg na linawan ondogpa.” Kanyan si Gedeon tan si aripen ton Pura et linma rad nitalagan panagguardiaan ed kampo da ray kalaban.

¹² Singa olup na dakerakel a dorun iray Madianita, saray Amalecita, tan saray kabyangay tribu ya akapanat ed patar, tan singa karakel na buer ed gilig na dayat iray kamilyo ra.

¹³ Nen sinmabiy Gedeon, nadngel ton ibabaga na sakey a too ed kaaro to so nipaakar ed kogip to. Ibabaga to, “Akogip kon tinmolin ed kampo tayo so sakey a baleg a sibadan tinapay tan nakna to so sakey a tulda. Ageba may tulda tan nipasaplak ed dalin.”

¹⁴ Inmebat imay kaaro to, “Anggapo lay arum itan no ag ta samay ispada nen Gedeon ya anak nen Joas tan sakey ya Israelita. Say Dios impanalo to ed Madian tan amin a sondalo tayo!”

¹⁵ Nen nadngel nen Gedeon so nipaakar ed samay kogip na sakey a too tan say kabaliksan to, tinmalimukor. Insan pinmawil ed kampo da ray Israelita tan kuanto, “Bangon kayo! Impanalo ki la na Katawan ed saray sondalon Madianita!”

¹⁶ Impankatlo ton grupo ira may talon lasus a totoo to tan initdan to ray sansasakey a trumpita tan sansasakey a porunggo a walad dalem so nipotan ya apoy.

¹⁷ Inkuantod sikara, “No kasabik ed gilig na kampo da ray Madianita, nengneng yo ak tan alig yoy gawaen ko.

¹⁸ No pinaknul ko tan say grupok so trumpita mi, paknul yo met ed kaliber-liber na kampo so trumpita yo, insan yo iyeyag, ‘Para Katawan tan para si Gedeon!’”

¹⁹ Sinmabiy Gedeon tan saray sanlasus a totoo to ed samay gilig na kampo nen magano lay pegley labi tan kakkapansalat na guardia. Insan da pinaknul so trumpita ra tan imbetag da may sankabembenan dan porunggo,

²⁰ tan onman met so ginawa na saramay duaran grupo. Binembenan dad kawigin lima ra may nipotan ya apoy, tan diad kawanan a lima ra so trumpita, insan da ineyag, “Sakey ya ispada a para Katawan tan si Gedeon!”

²¹ Nanalagey ed pasen tod kaliber-liber na kampo so balang sakey, et kibatiktik a maneyag ya amin iray sondalod mad kampo.

²² Legan a papaknulen na saray totoo nen Gedeon so trumpita ra, impanlalaban na Katawan ira may sondalo na kalaban; nandodoyukan iray ispada. Binmatik iran amaarap ed Cerera ya anggad Bet-sita, anggad baley na Abel-mehola ya asingger ed Tabata.

²³ Insan atawag iray lalakid tribu di Neftali, Aser, tan duaran Manases, tan inosilan da ra may Madianita.

²⁴ Angibaki si Gedeon na saray totoo ed amin a kapokdulan na Efraim a mangikuan, “Akseb kayo, ta labanan yo ray Madianita. Tambangan yo rad Ilog na Jordan tan saray kolus ya anggad Bet-bara tan ag yo pababaliwen diman iray Madianita.” Pinmaway ya amin iray lalaki ed Efraim, tan tinmambang irad Ilog na Jordan tan saray kolus ya anggad Bet-bara.

²⁵ Adakep da so duaran panguloy sondalo na Madianita di Oreb tan Zeeb; pinatey day Oreb ed kawalaay Baton-dampay na Oreb, tan si Zeeb diad panagpespesay alak a tatawagey Zeeb. Intuloy dan inosilan iray Madianita, insan da inawit iray olo di Oreb tan Zeeb ed kinen Gedeon a walad sayan bekta ed bokig na Jordan.