Saray Huis 6 - Maung A Balita Biblia

Si Gedeon

¹ Nankasalanan lamet ed Katawan iray Israelita, kanyan inabuloyan ton naoleyan iran pitoy taon na saray totoon taga Madian.

² Mabiskeg ni ray Madianita nen saray Israelita, et kiamut-amut ed ongib iray Israelita tan diad saray arum a pasen ed kapokdulan ya arawid kaatapan.

³ Kapag mantanem iray Israelita, dogpaan ira na saray Madianita a kaiba da ray Amalecita tan saray tribu ed kalawakan.

⁴ Mankampo ra ed dalin da tan deralen da ray tanaman da, ya anggad baybay ed pasen a kaliber-liber na Gaza. Alaen da ray amin a karniro, baka, tan asno ra. Anggapoy ikera ran pambilay na saray Israelita.

⁵ Singa karakel na dorun no onsabi ran kaiba da ray ayayep da tan saray tulda ra. Ag ira nabilang tan saray kamilyo ra. Sinmabi ra tan dinederal day dalin,

⁶ et ag makalaban ed sikara iray Israelita.

⁷ Insan kinmerew na tulong ed Katawan iray Israelita, pian makalaban irad saray Madianita.

⁸ Angibakid sikara so Katawan a Dios na Israel na sakey a propita tan impaikuantod sikara: “Impaway ta kayod inkaaripen ed Egipto.

⁹ Inyagel ta kayod saray Egipsio tan saray totoon linmalaban ed sikayod sayan dalin. Legan na pankukurang yo, pinataynan ko ra tan inter kod sikayo so dalin da.

¹⁰ Imbagak ed sikayo a siak so Katawan a Dios yo tan ag kayo nepeg a mangigalang ed saray diriyos da ray Amorreo a say dalin da so panaayaman yo natan. Balet ag yo inngalngalep iray salitak ed sikayo.”

¹¹ Insan linmad patar na Ofra imay anghil na Katawan tan inmirung ed silong na kiew a robli a kayaryan nen Joas a lakin kabyangan na boleg nen Abiezer. Inmamut a maniilik na trigo ed pespesan na alak si Gedeon a lakin anak nen Joas, pian ag nanengneng na saray Madianita.

¹² Pinmanengneng ed sikatod man so anghil na Katawan tan kuanto, “Walad sika so Katawan, sika a masebeg tan makapanyarin too!”

¹³ Inkuanen Gedeon ed sikato, “No walad sikamiy Katawan, akin sirin et onyay agawad sikami? Onung na tinongtong na saray atateng mi, say Katawan impaway to rad Egipto. Akin et anggapo lay singa onman a gawaen natan na Katawan? Inkaindan to kami la tan pinaolyan to kamin ooleyan na saray Madianita.”

¹⁴ Insan say Katawan ingganggan toy Gedeon, “Laka, ta ipakanam so biskeg tan pakayarim a mangiliktar ed saray Israelita ed pakayari na saray Madianita. Siak a dili so mangigaganggan ed sika.”

¹⁵ Inmebat si Gedeon, “Balet, Katawan, panoy pakapangiliktar kod Israel? Sankaleteyan so boleg ko ed saray boleg na tribu nen Manases, tan siak so saginonur ed amin da ray kabyangay kawalaan kon pamilya.”

¹⁶ Inmebat so Katawan, “Nayarian mon gawaen so pagagawak ed sika, ta tulongan ta ka tan mainomay mon kabilen iray Madianita; singa ka mangakabil na saksakey a too.”

¹⁷ Inmebat si Gedeon, “No tuan inaro mo ak, ipanengneng mod siak so pakapatnagan a sikan tuay Katawan.

¹⁸ Ag ka pa ontataynan anggad niakaran ta kay bagat a kakanen.” Inkuanto, “Dia ak anggad ipawil mo dia.”

¹⁹ Kanyan sinmempet si Gedeon tan angiluto na sakey a kilaw na kanding, insan inkana toy sakey salup ya arina diad impanggawa toy tinapay ya ag nilaukay libadura. Inyan tod baskit so karni tan say sabaw diad banga, insan to ra inyakar ed samay anghil na Katawan a walad silong na kiew a robli, tan inter tod sikato.

²⁰ Inkuan na samay anghil na Dios ed sikato, “Itapew mod sayan baleg a bato itay karni tan saray tinapay, insan mo ikalbod sikara so sabaw.” Ginawa nen Gedeon imay imbaga na anghil.

²¹ Inyonat na samay anghil na Katawan so lima to, insan to indiwit so ngoroy bislak a sankabembenan to ed saramay karni tan tinapay. Pinmaway so apoy ed samay bato tan inoput ton pinoolan ira may karni tan tinapay. Insan naandipat imay anghil.

²² Diad saya abirbir nen Gedeon ya anghil na Katawan imay anengneng to, kanyan natatakot a kuanto, “Katawan a Dios, anengneng kod lupa-lupaan so anghil mo!”

²³ Balet say Katawan kuantod sikato, “Mandeen ka. Ag ka natatakot. Ag ka ompatey.”

²⁴ Amaalagey diman si Gedeon na altar a para Katawan tan inngaran to na “Kareenan so Katawan.” (Anggad natan, sayan altar et manalalagey nid man ed Ofra a kayaryan na boleg nen Abiezer.)

²⁵ Diad saman a labi say Katawan inkuantod kinen Gedeon, “Alam so bakan kalakyan nen amam tan say sakey a bakan kalakyan a pitoy taon to, igebam so altar a ginawa nen amam a para Baal, tan itumbam so tanda nen diosan Asera a kaabay na samay altar.

²⁶ Diad sayan pokdul mangipaalagey ka na malet ya altar a para Katawan a Dios mo. Insan mo alaen imay kumadwan baka tan isaklang mon bagat a popoolan; say pamparlang mo samay itumbam a tanda nen diosan Asera.”

²⁷ Kanyan intagar nen Gedeon iray samploran aripen to tan ginawa toy imbagad sikato na Katawan. Ginawa to ya ed labi, ta mapalaloy takot to ed saray kabyangay pamilya to tan saray totoo ed baley no gawaen to ya ed agew.

²⁸ Kabangon na saray totoo ed ontombuk a kabwasan, anengneng dan ageba so altar a para Baal tan tanda nen diosan Asera. Naimano da met a samay kumadwan bakan kalakyan et nisaklang ed altar a nipaalagey diman.

²⁹ Nantetepetan ira, “Siopay nanggawad saya?” Sinokayan da no siopa, et nalmoan da a si Gedeon a lakin anak nen Joas so nanggawa.

³⁰ Insan da inkuan ed kinen Joas, “Ipaway mo diay anak mo ta pateyen mi! Inggeba toy altar a para Baal tan say tanda nen Asera a walad kaabay to.”

³¹ Balet inkuanen Joas ed amin da may totoon dinmagod sikato, “Itatalindeg yoy Baal? Iyaagel yo? Napatey so siopaman a mangitalindeg ed sikato kasakbayan ya onsabiy kabwasan. No tuan dios si Baal, paolyan yon iyagel toy sikaton dili. Say altar to so ageba.”

³² Nanlapud saman, atawag si Gedeon a Jerubaal, lapud inkuanen Joas, “Paolyan yon iyagel nen Baal so sikaton dili; say altar to so ageba.”

³³ Insan nantitipon ya amin iray Madianita, saray Amalecita, tan saray tribud kalawakan, binaliw day Ilog na Jordan, tan nankampo ra ed Patar na Jezreel.

³⁴ Inoleyan na ispiritu na Katawan si Gedeon, et pinaknul toy trumpita a panawag ton ontombuk ed sikato iray lalakin kabyangay boleg nen Abiezer.

³⁵ Angibaki na saray lalakin manawag ed saray lalakin walad sakop na duaran dalin na Manases, ta ontombuk irad sikato. Angibaki met na saray lalakin manawag ed saray lalakin kabyangay tribu di Aser, Zabulon, tan Neftali, et sinmabi ra met a milad sikato.

³⁶ Insan inkuanen Gedeon ed Dios, “Imbagam a ginetmam ya ikana mo ak ed pangyagel ed Israel.

³⁷ Ontan sirin, mangyan ak na lanan abel ed dalin a panagilikan mi na trigo. No diad kabwasan et alinaewan labat so lanan abel balet andid dalin, naamtaan kod satan ya ikana mo ak ed pangyagel ed Israel.”

³⁸ Onung na inilaloan nen Gedeon, onman so agawa. Kabangon nen Gedeon ed ontombuk a kabwasan, pinespes to may lanan abel, tan akapangisalur na sakey a losur a linaew.

³⁹ Insan inkuanen Gedeon ed Dios, “Ag ka pa komun mamapasnuk ed siak; wala pa niy kerewen ko. Maminsan pa nin ikanak imay abel ed panubok ko. Nabasa komun natan so dalin, balet mansiansian amaga may abel.”

⁴⁰ Onung na kinerew nen Gedeon, onman so ginawa na Dios ed saman a labi. Kasabiy kabwasan amaga may lana, balet ambasad linaew so dalin.