Saray Huis 5 - Maung A Balita Biblia

Say Kanta di Debora tan Barac

¹ Diad saman ya agew si Debora tan Barac a lakin anak nen Abinoam et kinanta da yan kanta:

² Idayew yoy Katawan! Talagan sipaparaan lan mibakal nen saman iray Israelita; maabuloy ya akibakal iray totoo.

³ Dengel kayo, sikayo ran arari! Talineng kayo, sikayo ran manoley! Kantaan tan togtogan ko so Katawan a Dios na Israel.

⁴ Katawan, nen tinaynan moy kapalandeyan na Seir, nen pinmaway ka ed dalin na Edom, ayegyeg so dalin, tan pinmelag so oran a nanlapud tawen. On, nikalbo so danum a nanlapud saray lorem.

⁵ Saray kapalandeyan ayegyeg ira ed arap na Katawan na Sinai, diad arap na Katawan a Dios na Israel.

⁶ Diad saramay agew nen Samgar a lakin anak nen Anat, diad saramay agew nen Jael, ag la ondadalan ed bansa iray manoolup a biahiro, tan onsasaliberber ed basbas iray totoo.

⁷ Debora, abayag ya ataynan iray baley na Israel; anggapoy onkitakitaw ed sikara kasakbayan a sinmabi ka, a singa sakey ya ina ed Israel.

⁸ Insan walay bakal ed dalin nen nampili na balon diriyos iray Israelita. Diad apataplon libon lalaki ed Israel, walay sakey a nanawit na samper odino pika?

⁹ Akilad saray pangulod Israel so pusok, diad saray totoon mabolbolus ya akilan akibakal. Idayew yoy Katawan!

¹⁰ Salita yoy nipaakar ed saya, sikayo ran managkabayod ampotin asno, a manyodyodyorung ed saray silya, tan sikayo ran nepeg a manakar inermay laen yo.

¹¹ Dengel kayo! Saray maingal a karaklan ed kaliber-liber na saray bobun et ibabaga ra so saray impanalo na Katawan, saray impanalo na saray Israelita! Insan nambabansag ya inmakseb a nanlapud saray siudad da iray totoo na Dios.

¹² Ipangulom, Debora, ipangulom! Ipangulom! Mankanta ka! Ipangulom! Kurang ka, Barac a lakin anak nen Abinoam; mankurang kan sankatengteng mo ray totoon adakep mo!

¹³ Insan saray matoor ya Israelita et linma ran namparontal ed saray pangulo ra; saray totooy Katawan dinmago rad sikato a sipaparaan iran mibakal.

¹⁴ Manlapu ra ed Efraim linma ra ed patar diad nibeneg na tribu nen Benjamin tan saray totoo to. Inmakseb manlapud Makir iray panguloy sondalo; inmakseb manlapud Zabulon iray opisyal.

¹⁵ Sinmabi ray pangulo nen Isacar a kaiba ray Debora; on, sinmabiy Isacar a pati si Barac, tan saray totoo et tinombuk dad patar. Balet naapag so tribu nen Ruben; ag ira akapampapakna ya ontombuk.

¹⁶ Akin et tinmilak iran kaiba da ray karniro? Pian narengel da ray pumapastol ya ontatawag ed saray karniro? On, apaldua so tribu nen Ruben; ag ira akapampapakna ya ontombuk.

¹⁷ Nanayam ed bokig na Jordan iray kabyangay tribu nen Gad, tan saray kabyangay tribu nen Dan et nansiansia rad abay na saray bapor. Nanayam ed gilig na dayat iray kabyangay tribu nen Aser; nansiansia rad abay na danum.

¹⁸ Balet saray totoo di Zabulon tan Neftali imposta ray bilay dad bakalan.

¹⁹ Sinmabid Taanac ed gilig na kolus na Megido iray arari tan akilaban ira; akibakal iray arari na Canaan, balet anggapoy imbatik dan pilak.

²⁰ Manlapud tawen akilaban iray bitewen; diad ibebeltang dad tawen, nilabanan day Sisara.

²¹ Intaban iray agos na delap ed Kison— Say maples ya agos na Ilog na Kison. Ituloy koy onsulong, onsulong, a mabiskeg!

²² Insan mapanaspas a sinmabi ray kabayo, a mabanegbeg ed dalin iray sali ra.

²³ “Isamba yoy dalin na Meroz,” kuay anghil na Katawan. “Isamba yo, isamba yo iray manaayam diman. Ag ira sinmabin ontulong ed Katawan, sinmabi ran sondalo a mibakal ed saray kalaban to.”

²⁴ Say sankapalaran ed saray bibii et si Jael, say asawa nen Heber a Cineo— sikatoy sankapalaran ed saray manaayam ed saray tulda.

²⁵ Kinmerew na danum si Sisara, balet initdan to na gatas; inyakaran to na kinmegtel a gatas ed marakep a yaung.

²⁶ Binembenan tod sakey a lima to so sakey a palpal na tulda, tan diad sakey a lima say martilyo; minaso tod olo si Sisara, et nabtag so lapis-lapis na olo to; pinanekan toy palpal so alopising to.

²⁷ Nipatalimukor si Sisara, insan atumbad saliyan nen Jael. Diad saliyan nen Jael kinmapoy si Sisara; nipatalimukor, tan alokbub; alokbub ed dalin, insan inatey.

²⁸ Tinmandag ed bintana si ina nen Sisara; tinmakiling ed saray barandilyas na bintana. Tinepet to, “Akin et abayag lan ag ni sinmabi so karwahi to? Akin et agaylay tantan na isabi na saray kabayo to?”

²⁹ Inmebat iray sankarunongan a katulong ton bibii, tan inolit-olit ton imbagad sikaton-dili,

³⁰ “Naabala ra labat a manaanap na nasamsam da a panaapagan da, sakey o duaran bibii so para sakey a sondalo, marakep ya abel so para si Sisara, abordaan ya abel so para kolibemben na riyna.”

³¹ Ontan pa komun so ipatey na amin a kalaban mo, O Katawan, balet onsinag komun a singa ombubutay ya agew iray kakaarom! Insan nanarin apataploy taon so kareenan ed dalin.