Saray Huis 4 - Maung A Balita Biblia

Si Debora tan si Barak

¹ Kayari na impatey nen Aod, nankasalanan lamet ed Katawan iray Israelita.

² Kanyan say Katawan impadakep to rad kinen Jabin a Cananeo a nanarid siudad na Hazor. Say pangulo na saray sondalo to et si Sisara a nanayam ed Haroset-na-saray-Hintil.

³ Si Jabin walay siam a lasus a balatyang a karwahi ton para bakal, tan duamploy taon a pinapairap ton inoleyan iray totood Israel. Insan kinmerew na tulong ed Katawan iray Israelita.

⁴ Diad saman a panaon si propita Debora a biin asawa nen Lapidot so pinagkahuis a pangulo da ray Israelita.

⁵ Inmirung ed silong na sakey a kiew a palmira diad nampegleyan na Rama tan Betel diad nipokdul a dalin na Efraim, insan dinmadagod sikato ray totoo, ta ibaga tod sikaray nepeg a nagawa odino gawaen da.

⁶ Aminsan ya agew impaawit toy Barac a lakin anak nen Abinoam a taga siudad na Kedes na Neftali tan kuantod sikato, “Say Katawan a Dios na Israel et inter tod sika yan ganggan: ‘Mangala kay samplon libon lalaki ed saray tribu di Neftali tan Zabulon tan ipangulom iran onlad Palandey na Tabor.

⁷ Papawayen koy Sisara a pangulo na saray sondalo nen Jabin, ta labanan to kayo ed Ilog na Kison. Awiten to ray karwahi to tan saray sondalo to, balet panaloen ta kayod sikato.’”

⁸ Insan inmebat si Barac, “Onla ak no mila kad siak, balet no ag ka mila, ag ak onla.”

⁹ Inmebat si Debora, “No ontan sirin, mila ak ed sika, balet aliwan sikay napagalangan ed nagamuran a pananalo, lapud ipalima na Katawan ed sakey a bii si Sisara.” Kanyan linmad Kedes si Debora a kaiba toy Barac.

¹⁰ Tinawag diman nen Barac iray kabyangay tribu di Zabulon tan Neftali, tan tinmombuk ed sikato iray samplon libon lalaki. Akilad sikato si Debora.

¹¹ Legan to ya inlira nen Heber a Cineo so tulda to ed asingger ed Kedes, diad abay na kiew a logo diad Zananim. Inarawian nen Heber iray kapara ton Cineo a kabyangan iray boleg nen Hobab a bayaw nen Moises.

¹² Nen akabatan nen Sisara a linmay Barac ed Palandey na Tabor,

¹³ tinawag to ray siam a lasus a karwahi ton balatyang tan amin da ray totoo to tan imbaki to rad Ilog na Kison manlapud Haroset-na-saray-Hintil.

¹⁴ Insan inkuanen Debora ed kinen Barac, “Laka! Say Katawan so mangipangulod sika! Natan ed sayan agew ipatalo tod sika si Sisara.” Kanyan inmakseb si Barac a nanlapud Palandey na Tabor a kaiba to ray samplon libon totoo to.

¹⁵ Nen dinmogpa si Barac tan saray sondalo to, ginewgew na Katawan si Sisara, pati saramay karwahi to tan amin a totoo to. Inmepas ed karwahi to si Sisara tan batik.

¹⁶ Inosilan nen Barac ira may karwahi tan saramay sondalo ya anggad Haroset-na-saray-Hintil, et apatey ya amin iray sondalo nen Sisara. Anggapoy lakin atilak ed sikara.

¹⁷ Batik si Sisara ed tulda nen Jael ya asawa nen Heber a Cineo, lapud maung so pipiolup nen Ari Jabin na Hazor ed pamilya nen Heber.

¹⁸ Pinmaway si Jael a mangabet ed kinen Sisara tan kuantod sikato, “Loob ka; loob ka diad tuldak. Ag ka natatakot.” Kanyan linmoob tan inyamut nen Jael ed sanib na kurtina.

¹⁹ Inkuanen Sisara ed sikato, “Itdan mo ak pay inomen, ta napgaan ak la.” Nilokasan nen Sisara so katat a supot a pananginay gatas, pinainom to, tan pinaamut to lamet.

²⁰ Insan inkuanen Sisara ed kinen Jael, “Manalagey kad puirtay tulda, et no walay onsabi tan tepeten to no walay too dia, ibagam ya anggapo.”

²¹ Mapalaloy inkaksawan nen Sisara, kanyan akaogip na malmalet. Angalay Jael na martilyo tan sakey a palpal na tulda, nankalkalnan nilooban toy Sisara, insan to pinatey diad panamegley na impangipanek ton anggad dalin na samay palpal ed alupising nen Sisara.

²² Nen sinmabiy Barac a manaanap ed kinen Sisara, pinmaway si Jael a mangabet ed sikato tan kuantod sikato, “Gala dia! Ipanengneng kod sikay toon aanapen mo.” Kanyan linmoob si Barac a kaiba toy Jael, tan wadman si Sisara ya akarokul ya inatey a nipanek a tinmalus ed alupising to so palpal na tulda.

²³ Diad saman ya agew impanalo na Dios iray Israelita ed kinen Jabin ya arin Cananeo.

²⁴ Sinonson da lan sinonson a dinogpaan si Jabin ya anggad apatey da.