Saray Huis 3 - Maung A Balita Biblia

Saray Bansan a Nansiansian Nanayam ed Dalin

¹ Kanyan say Katawan impansiansia ton nanayam ed dalin na Canaan iray pigaran bansa, pian nasubok to ray Israelita ya ag akibakal ed Canaan.

² Ginawa to ya labat, pian nabangatan toy balang kailalakan na saray Israelita nipaakar ed bakal, nagkalalo lad saray ag nin balut akapibakal nen saman.

³ Saray atilak ed dalin na Israel et saray limaran siudad na Filistia, amin da ray Cananeo, saray Sidoneo, tan saray Heveo a manaayam irad Kapalandeyan na Libano manlapud Palandey na Baalhermon ya anggad Dalan na Hamat.

⁴ Sikaray inkana na Dios ed impanubok tod Israel, pian naamtaan to no ononur kasi odino onsumlang iray Israelita ed saray ganggan na Katawan ya inter tod saray atateng da diad panamegley nen Moises.

⁵ Kanyan saray Israelita kaiba ran nanayam ed dalin iray Cananeo, saray Heteo, saray Amorreo, saray Pereseo, saray Heveo, tan saray Jebuseo.

⁶ Akikiasawaan irad sikara tan angigagalang irad saray diriyos da.

Si Otniel

⁷ Alingwanan na saray Israelita so Katawan a Dios da; nankasalanan irad sikato tan inggagalang da ray talintao nen Baal tan Asera.

⁸ Kanyan akapasnuk so Katawan ed Israel, et inabuloyan toy Ari Cusan-risataim na Mesopotamia a nadakep to ra. Waloy taon a nagmaliw iran walad silong na pakaoley to.

⁹ Insan tinmawag ed Katawan iray Israelita, et angibaki na sakey a lakin angilaban ed sikara. Sayan laki et si Otniel ya anak nen Kenaz a yogtan nen Caleb.

¹⁰ Linmoob ed sikato so ispiritu na Katawan, tan nagmaliw a pangulo da ray Israelita. Akibakal si Otniel, et impanalo na Katawan ed ari na Mesopotamia.

¹¹ Nanoley so kareenan ed Israel na apataploy taon, insan inatey si Otniel.

Si Aod

¹² Nankasalanan lamet ed Katawan iray Israelita. Lapud sayan ginawa ra, say Katawan impagmaliw ton mabiskeg niy Ari Eglon na Moab nen say Israel.

¹³ Akigampiy Eglon ed saray Ammonita tan saray Amalecita; tinalo ray Israel tan adakep day Jerico a siudad na saray kiew a palmira.

¹⁴ Labinwaloy taon a walad silong na pakaoley nen Eglon iray Israelita.

¹⁵ Insan tinmawag ed Katawan iray Israelita, kanyan angibaki na sakey a too ya angyagel ed sikara. Sayan too et si Aod a lakin anak nen Gera tan kabyangay tribu nen Benjamin. Kawigi yan too. Imbaki na saray Israelita si Aod ed Moab tan sankaawit to ray rigalon para si Ari Eglon.

¹⁶ Nanggaway Aod na duaray tarem ya ispada a ngalngalin kapalduay mitro so karokey to. Imbalkes tod kawanan a diking to ya asakbungay kawes to.

¹⁷ Insan inyakar to ray rigalo ed kinen Eglon a mataba-taban laki.

¹⁸ Kapangiter nen Aod ed saramay rigalo, imbaga tod angawit na rigalo ya onsempet la ra.

¹⁹ Balet amoliktar si Aod diad kinortin bato ya asingger ed Gilgal tan pinmawil ed kinen Eglon. Inkuanto, “Kagalang ya ari, walay maamut a balitan ibagak ed sika.” Kanyan ingganggan na ari iray aripen to, “Taynan yo kami dian bukor!” Pinmaway sirin ya amin ira may aripen.

²⁰ Insan legan a say ari et mambukbukor a manyodyorung ed dalem na ambetel a kuarto tod toktok na abung to, inasinggeran nen Aod tan kuanto, “Walay papaibagad siak na Dios ed sika.” Inmalagey imay ari.

²¹ Inoyus na kawigin lima nen Aod imay ispadad kawanan a diking to, insan to intoruk ed eges na ari.

²² Pinmanek ed eges to so anggan pati potan to may ispada tan akulyapotan na taba. Ag inoyus nen Aod imay ispada ed eges na ari, kanyan tinmalos ya anggad beneg to diad nanleetan na saray ulpo to.

²³ Insan pinmaway si Aod, insara to ray puirtan pinawayan to, tan

²⁴ tinmaynan la. Pinmawil ira may aripen na ari, et anengneng dan akasara ray puirta. Balet abaloan dan walad dalem so ari tan mampapainawa.

²⁵ Nanalagar irad paway ya anggad naalipanesan la ra. Nen ag nin siansia lokasan na ari so puirta, inala ra so tombuk tan nilokasan day puirta. Wadman ya akarokul ya inatey ed datal so katawan da.

²⁶ Legan dan nanalagar, batik si Aod. Dinmalan ed kawalaay kinortin bato tan tinmuloy ed Seirata.

²⁷ Nen sinmabid man ed kapokdulan na Efraim, pinaknul toy trumpita a panawag ton mibakal iray lalakin Israelita; impangulo to ran inmakseb a nanlapud saray kapokdulan.

²⁸ Inkuantod sikara, “Tombuk yo ak! Impanalo kayo na Katawan ed saray kalaban yon Moabita.” Kanyan tinombuk dan nampaleksab si Aod tan dinakep day pasen a babaliwan na saray Moabita ed Ilog na Jordan; ag da inabuloyan so siopaman a toon ombaliw.

²⁹ Diad saman ya agew apatey da so sakey a samplon libo a sankaabigan a Moabitan sondalo; anggapod sikara so akabatik.

³⁰ Diad saman ya agew tinalo na saray Israelita so Moab, tan walomplon taon a nanarid dalin na Israel so kareenan.

Si Samgar

³¹ Si Samgar a lakin anak nen Anat so tinmombuk a pangulo. Inyagel to met so Israel diad impamatey to na anem a lasus a Filisteo diad panamegley na baston a panagdagdag na baka.