Saray Huis 21 - Maung A Balita Biblia

Saray Bibiin Para Tribu nen Benjamin

¹ Nen nantitipon ed Mizpa iray Israelita, sinambaan dad Katawan: “Anggapod sikatayo so mangyabuloy ya asawaen na siopaman a Benjaminita so biin anak tayo.”

² Kanyan natan linmad Betel iray Israelita tan nanirung irad arap na Katawan ya anggad labi. Maknul tan ampaipait so impandageyem dad ermen:

³ “Katawan a Dios na Israel, akin et agaway onya? Akin et ngalngali naandipat ed Israel so tribu nen Benjamin?”

⁴ Diad kabkabwasan na ontombuk ya agew binmangon ira may totoo tan amaalagey irad man na altar. Angisaklang ira na saray bagat a popoolan tan saray bagat a para kareenan.

⁵ Tinepet da, “Walay grupo ed amin da ray tribu na Israel ya ag akitipon ed arap na Katawan diad Mizpa?” (Sinambaan da nen saman a siopamay ag linmad Mizpa et nepeg a pateyen).

⁶ Saray Israelita et inermenan da ray lalakin agagi ran Benjaminita tan kuanda, “Natad sayan agew say Israel et akabalang na sakey ed saray tribu to.

⁷ Antoy gawaen tayo, pian naitdan tayo na saray asawa iray lalakin Benjaminita ya akeraan? Sinambaan tayod Katawan ya ag tayon balut paasawad sikara iray anak tayo.”

⁸ Nen tinepet da no wala kasiy grupo ed saray tribu na Israel ya ag akitipon ed Mizpa, naamtaan da ya anggapoy taga Jabes na Galaad ya akitipon diman;

⁹ anggapoy taga Jabes ya inmebat nen tinawag so kangaranan da ray sondalo.

¹⁰ Kanyan samay tipon angibaki ra na labinduan libon sankasebegan a sondalon lalaki tan onyay bilin dad sikara: “Laka yo, ta patey yo ray amin a totoo ed Jabes, pati saray bibii tan saray ogogaw.

¹¹ Patey yo ray amin a lalaki tan amin a biin aliwan birhin.”

¹² Akarumog ira na apat a lasus a birhin ed saray totood Jabes, kanyan inawit da rad kampod Silo a sakop na dalin na Canaan.

¹³ Insan nampabakian na intiron tipon na saray Israelita ira may Benjaminitan walad baleg a Baton-dampay na Rimmon tan impaibaga rad sikara tondaan da la so bakal.

¹⁴ Amawil la sirin ira may Benjaminita, tan saramay arum ya Israelita inter dad sikara ira may bibiin taga Jabes ya ag da ra pinatey. Balet kulang iran para sikara.

¹⁵ Kaskasian na saray totoo iray Benjaminita, lapud dineral na Katawan so pankakasakey na saray tribu na Israel.

¹⁶ Kanyan saray pangulo na tipon kuanda, “Anggapo lay biin atilak ed tribu nen Benjamin. Antoy gawaen tayo, pian naitdan tayo na saray asawa iray lalakin Benjaminita ya akeraan?

¹⁷ Ag nepeg a nabalangan na sakey a tribu so labinduan tribu na Israel. Mananap tayo na polaing a makapangituloy na kiwawalay tribu nen Benjamin.

¹⁸ Balet ag tayo ra nayarin pangasawaen ed saray anak tayo, lapud sinambaan tayo a nisamba so siopaman a mangyabuloy ya asawaen na Benjaminita so anak to.”

¹⁹ Insan anunotan da ya asingger lan onsabi manaya so tinaon a pista na Katawan ed Silo. (Walad baybay na Betel so Silo, abalaten na Lebona, tan bokig na dalan a nanleetan na Betel tan Sikem.)

²⁰ Inkuandad saramay Benjaminita, “Laka yon onamut ed saray kaubasan

²¹ tan mambantay kayo. No ompaway ya onsayaw iray bibiid Silo legan na pista, paway kayo met ed inamutan yon kaubasan. Balang sakey ed sikayo et mangalad pasootan na asawaen to ed saramay bibii tan awit yo rad man ed dalin na Benjamin.

²² No onlad sikayo a manriklamo ray ama odino agagi ran lalaki, nayarin ibaga yo ed sikara, ‘Ipangasi yon ag yo la ra aalaen lapud ag mi ra inalad sikayod bakal, pian naasawa mi ra. Bangta ag yo ra inter ed sikami, ag kayo mankasalanan ed ag yo impanoor ed sipan yo.’”

²³ Ginawa ya na saramay Benjaminita; amili so balang sakey ed sikara na asawaen to ed saray bibiin onsasayaw ed Silo, insan to imbatik. Pinmawil irad dilin dalin da, impaalagey da lamet iray baley, tan nanayam irad man.

²⁴ Diad saman lamlamang a panaon tinmaynan ya amin iray arum ya Israelita; pinmawil ed dilin tribu to so balang sakey a too, tan diad dilin pamilya to tan diad dilin kayaryan to.

²⁵ Diad saman a panaon anggapoy ari ed Israel. Ginawa na balang sakey a too so labay ton gawaen.