Saray Huis 2 - Maung A Balita Biblia

Pimpanengneng ed Bokim so Anghil na Katawan

¹ Manlapud Gilgal say anghil na Katawan linmad Bokim tan kuantod saray Israelita, “Impaway ta kayod Egipto tan inyakar ta kayod dalin ya insipan kod saray atateng yo. Inkuanko, ‘Ag kon balut deralen so impisipanan kod sikayo.

² Ag kayon balut misisipanan ed saray totoon manaayam ed sayan dalin. Nepeg yon igeba iray altar da.’ Balet ag yo sinumpal so imbagak ed sikayo. Sinumlang yo laingen!

³ Kanyan ibabagak ed sikayo natan ya ag ko pataynanen ira yan totoo legan yon mankukurang. Magmaliw iran kalaban yo, tan napatitan kayo ed pangigalang ed saray diriyos da.”

⁴ Nen imbaga ya na samay anghil na Katawan, inmakis ya amin iray Israelita,

⁵ kanyan atawag iman a pasen a Bokim. Angisaklang irad man na bagat ed Katawan.

Say Impatey nen Josue

⁶ Insan imbaki la nen Josue iray totoo, tan linman mangayaryan ed betang ton dalin so balang sakey.

⁷ Legan a mabilay si Josue, nanlingkur ed Katawan iray totoo tan anggan kayariy impatey to, intuloy day nanlingkur legan a mabilay ni ray pangulon akanengneng na amin da ray makapakelaw a ginagawa na Katawan ed Israel.

⁸ Say aripen na Katawan a si Josue a lakin anak nen Nun et inatey nen mantaon na sanlasus tan samplora.

⁹ Nipompon ed dilin parti na dalin to ed Timnat-sera diad pokdul na Efraim, diad baybay na Palandey na Gaas.

¹⁰ Inaatey ya amin iray kabyangan na saman a kailalakan; alingwanan na saray kabyangan na sinmalat a kailalakan so Katawan tan saray ginagawa tod Israel.

Say Intonda na Israel a Mangigalang ed Katawan

¹¹ Insan nankasalanan ed Katawan iray totood Israel tan nanlingkur ira ed saray Baal.

¹² Tinondaan day angigalang ed Katawan a Dios na saray atateng da, say Dios ya angipaway ed sikara ed Egipto. Inggapo da met so angigalang ed saray arum a diriyos na saray totood kaliber-liber da. Dinmadakmomo ra ed sikara, kanyan impampasnuk day Katawan.

¹³ Tinondaan day angigalang ed Katawan tan nanlilingkur ira ed saray Baal tan Astarot.

¹⁴ Kanyan mapalaloy impakapasnuk na Katawan ed sikara tan inabuloyan ton dinogpaan ira na saray kalaban da tan tinakewan ira. Inabuloyan to ran nipasilong ed pakayari na saray kalaban dad kaliber-liber da, tan saray Israelita et ag da niagel so sikaran dili.

¹⁵ Kapag onla ran mibakal, sumpad sikara so Katawan onung na sinambaan to lan gawaen to. Mapalaloy inkairapan da.

¹⁶ Insan say Katawan initdan to ra na saray pangulon huis ya angyagel ed sikarad saray kalaban da.

¹⁷ Balet ag da dinengel ira yan pangulo ra. Aliwan matoor iray Israelita ed Katawan tan angigalang ira ed saray arum a diriyos. Inmonur ed saray ganggan na Katawan iray atateng da, balet tinondaan na sayan balon kailalakan so tinmoluk ed Katawan.

¹⁸ Kapag say Katawan et mangiter ed Israel na pangulo, say Katawan tulongan to yan pangulo tan iyagel to ray totoo to ed saray kalaban da legan a mabilay yan pangulo. Kinasian ira na Katawan lapud manngesnges irad kairapan da, ta pinapasegsegang da ra.

¹⁹ Balet kapatey na pangulo, saray totoo ompawil irad gendat a kabibilay da tan mapalalo niy kaogsan da nen say kaogsan na imbeneg a kailalakan. Nanlilingkur tan angigagalang irad saray arum a diriyos, tan diad gaway awet na olo ra intuloy day maoges a kabibilay da.

²⁰ Insan say Katawan pinmetang so olo tod Israel tan kuanto, “Sayan bansa dineral day sipanan ya ingganggan kon onuren na saray atateng da. Lapud ag da ak inonur,

²¹ ag ko la pataynanen iray bansan wala nid dalin nen inatey si Josue.

²² Ikanak ira yan bansa ed panubok kod saray Israelita no matoor irad siak kasi a singa inkatoor na saray atateng da.”

²³ Kanyan inabuloyan na Katawan a mansiansiad dalin ira yan bansa; ag to impanalod sikara si Josue odino pinataynan ira kapatey nen Josue.