Saray Huis 19 - Maung A Balita Biblia

Say Levita tan say Inamung ton Bii

¹ Diad saramay agew ya anggapo niy ari na Israel, walay sakey a Levita a manaayam ed niarawin pasen ed kapokdulan a dalin na Efraim. Angyamung na sakey a biin taga Betlehem na Juda.

² Balet akapasnuk ed sikato imay bii, amawil ed kinen ama to ed Betlehem, tan nanayam diman ya apat bulan.

³ Insan samay laki ginetma to a tombuken, ta koyungen ton ompawil ed sikato. Intagar toy aripen to tan kaiba toy duaran asno. Pinaloob na samay bii imay Levita ed abung nen ama to; nen anengneng na samay ama imay Levita, malikeliket ton inawat.

⁴ Pinilit na samay ama a manayam nid man imay Levita, kanyan nanayam diman a taloy agew. Nanaakan tan inmoogip irad man.

⁵ Diad kaimbuas na kumapat ya agew asaksakbay iran binmangon tan namparaan iran ompikal. Balet inkuan na samay ama ed samay Levita, “Mangan kayo ni, pian mabiskeg kayon mambiahi. Kayari yon mangan, insan kayo la onla.”

⁶ Kanyan inmirung ira may duaran lalaki, angan tan inminom ira. Insan samay ama na bii kuantod samay Levita, “Mansanlabi ka ni dia kari tan manliket ka.”

⁷ Inmalagey ya onla la may Levita, balet mapilit may ama a mansanlabi ni imay Levita, kanyan inmogip nid man.

⁸ Diad kabkabwasan na kumaliman agew ginapwan toy mampatanir imay Levita, balet inkuan na samay ama, “Mangan kayo ni. Mampangarem kayo ni.” Kanyan angan ni ra may duaran lalaki.

⁹ Nen ompikal la lamet imay laki, samay kaamung ton bii, tan samay aripen, inkuan na samay ama, “Onlalabi la; ogip kayo ni dia laingen. Mansanlabi kayo ni dia; dia kayo ni tan manliket kayo. Mangabkabwasan kayo lan ompikal nabwas.”

^10-11 Balet ag la labay na samay Levita so mansanlabid man, kanyan nampikal ya onsempet la a pati samay biin kaamung to. Walay duaran asno ra a walay silya na beneg da. Ngarngarem la nen asingger la rad Jebus (say Jerusalem), kanyan samay aripen kuantod kinen amo to, “Ontonda tayo, ta dia lad sayan siudad na saray Jebuseo so pamalabasan tayoy labi.”

^12-13 Balet inkuan na samay amo to, “Ag itayo ontondad siudad ya aliwan Israelita iray totoo to. Ituloy tayo lay panaakar tayo, ta mamalabas tayo la na labi ed Gabaa odino diad Rama.”

¹⁴ Kanyan nilabasan day Jebus tan intuloy day kurang da. Sinmelek lay agew nen akasabi ra ed Gabaa a sakop na dalin na tribu nen Benjamin.

¹⁵ Inmarawi rad dalan, ta diman la ra mamalabas na labi. Linmoob irad baley tan nanirung irad plasa, balet anggapoy toon mamatuloy ed sikarad abung to a naogipan da.

¹⁶ Legan dan wadman, walay masiken ya onsesempet la kayari ton nankimey ed daralusan to. Gendat a taga kapokdulan a dalin na Efraim, balet manaayam la natan diad Gabaa. (Kabyangan na tribu nen Benjamin iray arum a totood man.)

¹⁷ Naimano na samay masiken imay mambibiahi a walad plasa, et tinepet tod sikato, “Nanlapwan yo? Iner so laen yo?”

¹⁸ Inmebat imay Levita, “Nanlapu kamid Betlehem na Juda, et natan onsempet kami la ed arawdawin pasen na kapokdulan a dalin na Efraim. Anggapoy mamatuloy ed sikami,

¹⁹ anggaman a sankaawit miy abasto mi tan say dayamin para saray asno mi. Walay tinapay tan alak a para sayay asawak tan sikamin dua yay aripen ko. Walan amiy nakaukolan mi.”

²⁰ Inkuan na samay masiken, “Tuloy kayod abung ko! Asikasoen ta kayo; aliwan manepeg a mamalabas kayoy labi diad plasa.”

²¹ Kanyan intagar to rad abung to tan pinakan to ra may asno ra. Inorasan na saramay sangkaili so kasaliyan da, insan ira nandem.

²² Manliliket ira nen kabebekta walay ray pigaran lalakin marotak so inkatoo ra a sinmabi ran nanlapud baley. Niliktub da may abung tan ginapwan day nantoktok ed kaput. Inkuandad samay masiken, “Ipaway mo dia tay lakin kaibam a sinmempet! Labay miy miakdul ed sikato!”

²³ Balet pinmaway imay masiken tan kuantod sikara, “Aleg, kakaaro! Ag yo kari gagawaen itan a maoges tan mabanday a bengatla! Sangkailik yan tooy wadya.

²⁴ Say maung, samay asawa to tan say anak kon marikit so iter kod sikayo. Gawa yo lay labalabay yod sikara. Balet ag yo gagawaen so mabambanday ed sayan laki!”

²⁵ Balet ag ondengel ira may lalaki. Kanyan inala na samay Levita imay asawa to tan impaway ton inter ed sikara. Pinasoot tan nanliketan dan sanlabi tan ag da tinondaan ya anggad kabwasan.

²⁶ Sinmabid palbangon imay bii tan aloknut lad puirta na abung na samay masiken ya akipunduan na asawa to. Wadman ni ya anggad maliwawa la.

²⁷ Binmangon imay asawa to diad saman a kabwasan, et nen nilokasan toy puirta ya ompikal la, anengneng tod may asawa to ya akarokul tan akaonat so lima ton onggagawat ed kaput.

²⁸ Inkuanto may laki, “Bangon ka, ta onla itayo la. Balet ag onebat. Kanyan sinakloy ton impabenlag ed beneg na asno tan ginapwan toy onsempet.

²⁹ Kasabi tod abung to, angalay yuron baleg. Inala to may bangkay na asawa to, impankalabindua ton tegteg tan impaiyakar to so sakey a tegteg ed kapag tribu na Israel.

³⁰ Amin a totoon akanengneng ed saman inkuanda, “Ag kami ni akanengneng na onyan agawa! Ag ni yan balut agawa nanlapu lad intaynan da ray Israelita diad Egipto! Nakaukolan a nudnunoten tan tongtongen tayoy nepeg tin gawaen nipaakar ed saya!”