Saray Huis 18 - Maung A Balita Biblia

Si Micaya tan say Tribu nen Dan

¹ Anggapod saman a panaon so ari na Israel. Diad saraman ya agew saray kabyangay tribu nen Dan et peles dan manaanap na nakayaryan dan dalin a panayaman da, lapud diad amin da ray tribu na Israel sikaray ag ni akaawat na nabebetangan dan dalin.

² Kanyan saray totoo nen Dan amili ra na limaran nayarin lalaki ed amin da ray pamilya na tribu tan imbaki da ran manlapud saray baley na Zora tan Istaol. Binilin da ra a liberen day dalin, ta nengnengen da. Nen akasabi rad kapokdulan na dalin na Efraim, akiayam irad abung nen Micaya.

³ Nen wadman ira, abirbir day punto na panagsalita na samay tobun-balo a Levita, kanyan sinmingger irad sikato tan tinepet da, “Antoy gagawaen mo dia? Siopay angyakar ed sika dia?”

⁴ Inmebat, “Walay paknaan min dua nen Micaya a bayaran to ak diad pampaparik ed sikato.”

⁵ Inkuandad sikato, “Tepet mo pad Dios no maaligwas kami ed sayan kurang mi.”

⁶ Inmebat imay pari, “Anggapoy nepeg yon pampagaan. Aasikasoen kayo na Katawan ed sayan kurang yo.”

⁷ Kanyan tinmaynan ira may limaran lalaki tan linma rad baley na Lais. Anengneng da no panon a saray totood man et manaayam iran arawid kaatapan a singa saray Sidonio. Mareen so panagbilay da, anggapo ray mansasangsangan odino mansisiblangan; walad sikaray amin a nakaukolan da. Arawid sikara iray Sidonio tan anggapoy pasisiglaotan dad arum a totoo.

⁸ Nen pinmawil ed Zora tan Estaol ira may limaran lalaki, tinepet ed sikara na saray kabaleyan da no antoy arumog da.

⁹ “Sigi sirin,” ebat da ra may limara, “dogpaan tayo so Lais. Anengneng mi man a dalin, tan agaylay abig to. Ag kayo dia manaayam ya anggapoy gagawaen. Ganatan tayo so onla tan samsamen tayo man a dalin!

¹⁰ No makakar kayod man naimano yo ya anggapoy isisip dan dogpaan ira na anggan siopa. Maawang iman a bansa, tan walan amiy nakaukolan na saray totoo. Inter na Dios iman a dalin ed sikayo.”

¹¹ Kanyan tinaynan day Zora tan Estaol iray anem a lasus a lalaki a kabyangan na tribu nen Dan. Linma ran sipaparaan a mibakal

¹² tan nankampo rad Kiryat-jearim na Juda. Sikato yay makasengeg a natatawag ni man a dalin a Kampo na Dan.

¹³ Manlapud saman a pasen tinmuloy ira, et akasabi ra ed abung nen Micaya diad kapokdulan a dalin na Efraim.

¹⁴ Insan saramay limaran nibaki a mannengneng ed dalin a kaliber-liber na Lais kuandad saray kakaiba ra. “Diad sakey ed saray abung dia walay kiew a talintaon naokupan na pilak. Wala met iray arum a talintao tan walay sakey ya ipod. Antoy kuanyon gawaen tayo?”

¹⁵ Kanyan linma rad abung nen Micaya a panaayaman na samay tobun-balon Levita, tan tinepet da no antoy kipapasen na panagbilay to.

¹⁶ Legan to ya, manalalagey ed puirta ira may anem a lasus a sondalo na Dan ya akaparaan a mibakal.

¹⁷ Tinmuloy ed abung ira may limaran nibaki a mannengneng ed dalin tan inala ra may kiew a talintaon naokupan na pilak, saramay arum a talintao, tan samay ipod, legan a kaiba na samay pari ed puirta ira may anem a lasus a sondalon akaarmas.

¹⁸ Nen linmad abung nen Micaya ira may limaran lalaki tan inala da ra may talintao tan ipod, tinepet na samay pari ed sikara, “Antoy gagawaen yo?”

¹⁹ Inkuandad sikara, “Ag ka maingal. Ag ka onsasalita. Milad kad sikami tan sika so pari tan sumisimbawa mi. Ag mo ta labay so mampari ed intiron sakey a tribu na Israel nen say sakey a pamilya labat?”

²⁰ Lapud saya akaliket imay pari, kanyan inala to ra may talintao tan samay ipod tan akilad sikara.

²¹ Pinmoliktar ira tan ginapwan day linma a walad onaan da ray anak da, saray baka ra, tan saray kayaryan da.

²² Arawi lay nakar da nen tinawag nen Micaya iray kakaabay to, ta mibakal ira. Nabot da ra may kabyangay tribu nen Dan

²³ tan ineeyagan da ra. Pinmoliktar ira may kabyangay tribu nen Dan tan tinepet dad kinen Micaya, “Akin, antoy agawa? Akin ira tay amayamay a totoo?”

²⁴ Inmebat si Micaya, “Imbatik yoy parik tan saray diriyos a ginagawak; anto niy akeraan ed siak? Insan natan tepeten yo no antoy agawa?”

²⁵ Inkuandad kinen Micaya, “Maung lay mandeen ka nen say makapasnuk ira yay lalaki dia, et dogpaan da ka. Andi-saew a nasaplut kayon sankapamilyaan.”

²⁶ Insan intuloy na saramay kabyangay tribu nen Dan so nankurang. Anengneng nen Micaya ya anggapoy nagawaan ton milaban, kanyan amoliktar lan sinmempet.

^27-28 Kayarin inala na saramay kabyangay tribu nen Dan imay pari tan saramay bengatlan ginawa nen Micaya, linma ran dimogpa ed Lais, samay baley a mareen so panagbilay na saray totoo to, tan walad patar a singa Betrehob. Pinapatey da ray totood man tan pinoolan day baley. Anggapoy mangyagel ed sikara, lapud arawi so Lais ed Sidon, tan anggapoy pipiolupan dan arum a totoo. Pinasimbalon impaalagey na saramay kabyangay tribu nen Dan tan nanayam irad man.

²⁹ Sinalatan day ngaran to may baley a Lais; insalat da so Dan; impara ra ed ngaran na ateng da a Dan a lakin anak nen Jacob.

³⁰ Inlira na saramay kabyangay tribu nen Dan imay talintao a galangen da, et si Jonatan a lakin anak nen Gersom tan apo nen Moises so pari na saray kabyangay tribu nen Dan tan saray kabyangay boleg nen Jonatan so pari ra ya anggad nibantak ed arum a bansa iray totoo.

³¹ Nansiansian wadman imay talintao nen Micaya legan a walad Silo so Tulda a panangigalangan ed Dios.