Saray Huis 16 - Maung A Balita Biblia

Si Samson ed Gaza

¹ Aminsan ya agew linmay Samson ed Gaza a siudad na Filistia. Akabat tod man so sakey a marotak a bii tan akiakdulan to.

² Akabatan na saray totood Gaza a wadmay Samson, kanyan niliktub da may pasen tan sanlabi ran inalagar ed puirta na siudad. Mareereen iran sanlabi tan ninunot dad sikaran dili, “Manalagar itayo dia ya anggad kabwasan, insan tayo pateyen.”

³ Balet anggad pegley labi labat ed dokulan si Samson, insan la binmangon. Inegnaan to may puirta na siudad, binagut to ya akila ray lusek, kaput, balewet tan amin a parti to. Sinakbat to tan inawit to ya anggad toktok na pokdul a tantandagan toy Hebron.

Si Samson tan si Delila

⁴ Kayari to yan agawa, inmibeg si Samson ed sakey a biin manngaran na Delila a manaayam ed Patar na Sorek.

⁵ Linmad samay bii iray limaran arari na saray Filisteo tan kuanda, “Tanggoyur moy Samson ya ibaga tod sika no akin et mabisbiskeg tan no panon min natalo, nabalur, tan napagmaliw min anggapo lay nagawaan to. Balang sakey ed sikami et itdan mi kad satan na sanlibo tan sanlasus a kuartan pilak.”

⁶ Kanyan inkuanen Delila ed kinen Samson, “Ibagam pad siak no akin et mabisbiskeg ka. No walay malabay a mamalur ed sika tan pagmaliwen to kan anggapoy nagawaan, antoy gawaen to?”

⁷ Inmebat si Samson, “No baluren da ak na pitoran balon lobir na pana ya ag ira impamaga, magmaliw a singa biskeg na arum a too so biskeg ko.”

⁸ Kanyan saramay arari na saray Filisteo ed kinen Delila na pitoran lobir na pana ya ag ira impamaga, insan to binalur si Samson.

⁹ Impanalagar nen Delila iray pigaran lalaki diad sakey a kuarto, nen abalur to la inmeyag, “Samson! Nitan la ray Filisteo!” Balet pinoltut to ra may lobir a singa labat tinebey ya asinit na apoy. Kanyan ag da ni amta so maamut a panlalapway biskeg to.

¹⁰ Inkuanen Delila ed kinen Samson, “Lulukoen mo ak, ta ag mo ibabagad siak so tua. Ibagam la kari no panon kan nabalur na siopaman.”

¹¹ Inkuantod sikato, “No baluren da ak na balon lobir ya ag nin balut inkana, magmaliw a singa biskeg na arum a too so biskeg ko.”

¹² Kanyan angalay Delila na pigaran balon lobir, insan to binalur si Samson. Kabebekta inmeyag, “Samson! Nitan la ray Filisteo!” Manaalagar ed sananey a kuarto ira may lalaki. Balet singa tinebey a pinopoltut to ra may lobir ed taklay to.

¹³ Inkuanen Delila lamet ed kinen Samson, “Lulukoen mo ak ni, ta ag mo ibabagay tua ed siak. Ibagam pa la kari no panoy pakabalur na siopaman ed sika.” Inkuanen Samson ed sikato, “No ilagam ed panaglagaay abel so pitoran lapir na buek ko, insan mo sigpitan na palpal, magmaliw a singa biskeg na arum a too so biskeg ko.”

¹⁴ Et nen naogip si Samson, inala toy pitoran lapir na buek nen Samson, nilaga tod panaglagaay abel, insan to sinigpitan na palpal. Kabebekta inmeyag, “Samson! Nitan la ray Filisteo!” Balet binmangon tan ginoyur to ray buek tod panaglagaay abel.

¹⁵ Kanyan inkuanen Delila ed sikato, “Panoy pangibabagam ya inaro mo ak, anta andi manaya. Amitlo mo ak lan niluko, tan ag mo nin siansia imbagad siak no akin et mabisbiskeg ka.”

¹⁶ Inagew-agew ton tinepet lan tinepet ed kinen Samson. Sinmawan siansiay Samson tan naingungotan la,

¹⁷ kanyan imbaga toy tua, “Ag nin balut apotutan so buek ko,” inkuanto. “Nisaklang ak ed Dios a sakey a Nazareo nanlapu lad inkianak ko. No napotutan so buek ko, naandi so biskeg ko tan magmaliw a singa biskeg na arum a too so biskeg ko.”

¹⁸ Nen abirbir nen Delila ya imbaga lad sikato nen Samson so tua, impaikuantod saramay Filisteon arari, “Pawil ki ni dian maminsan. Imbaga to lad siak so tua.” Sinmabi ra tan sankaawit da la may kuartan insipan dan iter.

¹⁹ Inayat nen Delila a makaogip si Samson ed akwalan to, insan anawag na sakey a laki ya amotut na pitoran lapir na buek nen Samson. Ginapwan nen Delila a pairapen si Samson, ta naandi lay biskeg to.

²⁰ Insan inmeyag, “Samson! Nitan la ray Filisteo!” Binmangon tan ninunot to, “Makaokpus ak tan nabolus ak a singa gendat.” Ag to amta a tinaynan la na Katawan.

²¹ Dinakep na saray Filisteo si Samson tan sinokit da ray mata to. Inyakar da ed Gaza, ginolunggolungan da na gansa, insan da impankimey ed gilingan diad dalem na prisowan.

²² Balet ginmapon tinmubo so buek to.

Say Impatey nen Samson

²³ Nantitipon a mansilibra iray arari na Filistia tan mangisaklang iray baleg a bagat ed dios dan Dagon. Nankanta ra, “Impatalo na dios mi so kalaban min Samson!”

^24-25 Manliliket ira tan kuanda, “Tawag yo diay Samson, ta paliketen to itayo!” Nen impaway dad prisowan si Samson, ingganggan dan paliketen to ra tan pinaalagey dad nanleetan na saray lusek. Nen anengneng na saray totoo, nankanta ray pangidayew dad dios da. “Say dios tayo impanalo to itayo ed kalaban tayo a nandederal na dalin tayo tan nampapatey na amayamay ed sikatayo!”

²⁶ Inkuanen Samson ed ogaw a mangitatabin ed sikatod lima, “Ipakarapas mod siak iray lusek na paalagey, ta onsaral ak.”

²⁷ Aseksek na bibii tan lalaki imay paalagey. Wadman ya amin ira may limaran arari na Filistia, tan sakey a talon libon lalaki tan bibii iray walad atep na paalagey a mambabantay ed kinen Samson a mamapaliket ed sikara.

²⁸ Insan nampikasiy Samson, “Katawan a Dios, nunot mo ak pa; O Dios, pabiskeg mo ak pa nin maminsan labat natan, pikasik ed sika, pian makabawi ak ed sarayan Filisteo ed impanokit dad saray matak.”

²⁹ Kanyan pinmeket si Samson ed saray duaran lusek ed pegley na paalagey. Impeket ton sansakey iray lima to ed saramay duaran lusek, intolak to ra

³⁰ tan inmeyag, “Ompatey ak komun a kaibak ira yan Filisteo!” Intolak tod anggaay nayarian to may paalagey, et nagbad saramay limaran arari tan amin da ray arum a totoon wadman. Dakel niy apatey nen Samson diad samay impatey to nen say apatey to legan ton nambilay.

³¹ Saray agagi ton lalaki tan saray arum nin kabyangay pamilya to et dinmago ran angalay bangkay to. Insempet da tan impompon dad nanleetan na Zora tan Estaol diad lobuk nen ama ton Manoa. Duamploy taon a sikatoy pangulo na Israel.