Saray Huis 15 - Maung A Balita Biblia

¹ Ag abayag kayariy bansal, nen panaganiy trigo, binmisitay Samson ed kinen asawa to tan inawitan to na kilaw na kanding. Inkuantod kinen katolangan ton laki, “Looban kod kuarto si asawak.” Balet ag to palooben si Samson.

² Inkuantod kinen Samson, “Tuan abaloan kon kabosul mo, kanyan inter kod kaarom. Balet magana ni may yogtan to. Sikato lay asawaen mo.”

³ Inkuanen Samson, “Ag ak la natan natetel ed antokaman a gawaen kod saray Filisteo!”

⁴ Kanyan linman nanerel na talon lasus ya asod katakelan. Sanderwa to ran sinisinger ed ikul tan diad namboknulan sinisingeran to ra na nipotan a panagsilew.

⁵ Insan dinangatan to ra may panagsilew tan imbobolus to rad kaalogan na trigo a kayaryan na saray Filisteo. Lapud saya ag to labat pinoolan iray naani, no ag ingen pati saray wala nid alog ya aaniyen. Apoolan met iray kaolibaan.

⁶ Nen tinepet na saray Filisteo no siopay nanggawad saya, akabatan da a si Samson, lapud si katolangan ton taga Timna et inter tod kaaro nen Samson si asawa nen Samson. Kanyan saray Filisteo pinoolan dan mabilay imay bii tan pinoolan da met so abung nen ama to.

⁷ Inkuanen Samson ed sikara, “Lapud sayan ginawa yo ag ak ontonda anggad ag ak makabawid sikayo!”

⁸ Mapalaloy indogpa tod sikara, et amayamay so pinatey to. Insan linman nanayam ed ongib a walad Etam.

Say Impanalo nen Samson ed saray Filisteo

⁹ Sinmabi ray Filisteo tan nankampo rad Juda tan dinogpaan day baley na Lehi.

¹⁰ Tinepet na saray totood Juda, “Akin et dodogpaan yo kami?” Inmebat ira, “Linma kami dian mangerel ed kinen Samson tan gawaen mid sikato so singa ginawa tod sikami.”

¹¹ Kanyan sarayan talon libon lalaki ed Juda et linma rad ongib ed Etam tan kuandad kinen Samson, “Ag mo ta amtan saray Filisteo so manooley ed sikatayo? Anto yay ginawam ed sikami?” Inmebat si Samson, “Ginawak ed sikara so singa ginawa rad siak.”

¹² Inkuandad sikato, “Linma kami dian mamalur ed sika, pian nipalima mi kad sikara.” Inkuanen Samson, “Sambaan yo sirin ya ag yo ak papateyen.”

¹³ “Sigi,” kuanda, “baluren mi ka labat tan ipalima mi kad sikara. Ag mi ka pateyen.” Kanyan binalur da na duaran balon lobir tan inlasur dan nanlapud samay ongib.

¹⁴ Kasabiy tod Lehi, mambabtik a dinmagod sikato iray Filisteo tan ineeyagan da. Kabebekta pinabiskeg na ispiritu na Katawan, et pinopoltut ton singa apoolan a tinebey ira may lobir ya akabalur ed saray taklay to.

¹⁵ Insan akarumog na pokel na saray pangal na asno ya agano nin inatey. Ginawat ton inala, tan sikatoy impamatey to na sanlibon Filisteo.

¹⁶ Kanyan kinanta nen Samson, “Diad panamegley na pokel na saray pangal na asno, pinatey koy lalakin sanlibo; Diad panamegley na pokel na saray pangal na asno, impabubuntonan ko.”

¹⁷ Kayari to ya, imbantak to may pokel. Atawag a Ramat-lehi imay pasen ya akagawaan ed saya.

¹⁸ Insan napnapgaan si Samson, kanyan tinmawag ed Katawan tan kuanto, “Impanalo mo ak na baleg; natan ompatey ak, lapud inkapgaan tan, lapud nadakep ak na sarayan paganon Filisteo?”

¹⁹ Insan nilokasan na Dios so nibobun a dalin diman ed Lehi, et pinmaway dimay danum. Inminom si Samson tan binmiskeg lamet. Kanyan samay sobul atawag na Hakkore; wadman ni ya anggad natan.

²⁰ Duamploy taon ya impangulo nen Samson so Israel legan na impanoley na Filistia ed dalin.