Saray Huis 13 - Maung A Balita Biblia

Say Inkianak nen Samson

¹ Nankasalanan lamet ed Katawan iray Israelita, kanyan inyabuloy ton apataploy taon ya inoleyan na saray Filisteo iray Israelita.

² Diad saman a panaon walay sakey a lakin manngaran na Manoa a taga baley na Zora tan kabyangay tribu nen Dan. Ag mananak so asawa to, ta lepes.

³ Pinmanengneng so anghil na Katawan ed asawa nen Manoa tan kuanto, “Lepes ka, balet ag mabayag manlokun ka tan mananak kay sakey a laki.

⁴ Manlapud natan ag ka lan balut oniinom na antokaman ya alak, odino mangan na kakanen a sebel;

⁵ tan kapaway na anak mo ag mon balut popotutay buek to, lapud manlapud inkianak to sikatoy isaklang ed Dios a sakey a Nazareo. Igapo toy pangyagel tod saray Israelita ed lima da ray Filisteo.”

⁶ Insan samay bii linmad kinen asawa to tan kuanto, “Dinmagod siak so sakey a too na Dios, tan singa makapataktakot ya anghil na Dios so nengneng to. Ag ko tinepet ed sikato no taga iner, tan ag to imbagad siak so ngaran to.

⁷ Balet imbaga tod siak a manlokun ak tan mananak ak na sakey a laki. Imbaga to nid siak ya ag ak balut oninom na anton klasiy alak odino mangan na antokaman a kakanen a sebel, lapud legan a mambilay so iyanak ko sikatoy isaklang ed Dios a sakey a Nazareo.”

⁸ Insan nampikasi ed Katawan si Manoa, “Katawan, ipangasim a papawil mod sikami imay too na Dios, ta ibaga tod sikami no antoy nepeg min gawaen no kapaway na ogaw.”

⁹ Sinumpal na Dios imay kinerew nen Manoa, et pinmawil imay anghil to ed samay bii nen manyodyorung ed alog. Ag kaiba na samay bii si asawa ton Manoa,

¹⁰ et batik a tampol tan imbaga tod kinen asawa to, “Gala, Manoa! Samay toon dinmagod siak ed samay aminsan ya agew et pinmanengneng lamet ed siak.”

¹¹ Inmalagey si Manoa tan tinombuk toy asawa to. Linmad samay laki si Manoa tan tinepet to, “Sika may laki ya akitongtong ed asawak?” “Siak,” ebat to may laki.

¹² Insan inkuanen Manoa, “Natan sirin, no ontua ray salitam, antoy nepeg a gawaen na ogaw? Anton klasiy bilay so pambilay to?”

¹³ Inmebat may anghil na Katawan, “Nepeg a sumpalen na asawam iray amin ya imbagak ed sikato.

¹⁴ Ag to nepeg so mangan na antokaman a manlapud sengeg na ubas; ag to nepeg so oninom na anton klasiy alak odino mangan na antokaman a kakanen a sebel. Nepeg ton gawaen so antokaman ya imbagak ed sikato.”

^15-16 Diad ag pikakabat nen Manoa ya anghil na Katawan so katongtong to, inkuantod sikato, “Ag ka ni onaalis. Ilutoan mi ka ni na kilaw na kanding.” Balet inkuan na samay anghil, “No ag ak ni ontaynan, ag ko kanen lamlamang so iparaan mon kanen. Balet no labay moy mamparaan, isaklang mo lan bagat a popoolan ed Katawan.”

¹⁷ Inmebat si Manoa, “Ibagam ed sikami so ngaran mo, pian nagalang mi ka no ontua ra may salitam.”

¹⁸ Inkuan na samay anghil, “Akin et labay mon kabaten so ngaran ko? Say ngaran ko et sakey a makapakelaw a ngaran.”

¹⁹ Kanyan angalay sakey a kilaw na kanding si Manoa tan daiset a trigo, insan diad baton-dampay ya altar insaklang to ra a para Katawan a manggagawa na saray pakelaw.

^20-21 Legan a mamapaatagey manlapud samay altar so apoy, anengneng Manoa tan samay asawa to imay anghil na Katawan dimad apoy a nampaatagey ed tawen. Abirbir ed satan nen Manoa a samay laki et anghil na Katawan, kanyan tinmikleb iran duad dalin nen asawa to. Ag da lan balut anengneng imay anghil.

²² Inkuanen Manoa ed samay asawa to, “Andi-saew ya ompatey ita, ta anengneng ta lay Dios!”

²³ Balet inmebat imay asawa to, “No tuan labay na Katawan a pateyen ita, ag to la komun inawat ira may bagat ta; ag to la komun impanengneng yan amin ed sikata tan ag to la komun imbagad sikata yan bengatla.”

²⁴ Nananak imay bii na sakey a laki tan inngaran to na Samson. Binmaleg imay ogaw tan binindisionan na Katawan.

²⁵ Ginapwan na ispiritu na Katawan a pabiskegen si Samson legan a walad nanleetan na Zora tan Estaol diad Kampo nen Dan.