Saray Huis 11 - Maung A Balita Biblia

¹ Si Jefte a taga Galaad et masebeg a sondalo, balet biin marotak so ina to. Si ama ton Galaad

² et wala ni ray arum a lalakin anak tod asawa to. Nen binmaleg ira pinasoot dan pinataynan si Jefte. Inkuandad sikato, “Anggapoy natawir mod kayaryan nen ami mi; anak ka na sananey a bii.”

³ Tinaynan nen Jefte iray agagi to tan nanayam ed dalin na Tob. Naayat tod man ya akiolup ed sikato iray lalakin maoges, tan nanoolup iran nanliber-liber a nanggagawa na kaogsan.

⁴ Kalabas na pigaran agew linman akibakal ed Israel iray Ammonita.

⁵ Nen agawa ya, linmad dalin na Tob iray pangulo na Galaad, ta awiten day Jefte.

⁶ Inkuandad sikato, “Gala, ta ipangulo mo kami, pian nayarian tayon labanan iray Ammonita.”

⁷ Balet inmebat si Jefte, “Mapalaloy impanbosul yod siak, kanyan pinasoot yo ak a taynan koy abung nen amak. Akin et onla kayo dia ed siak natan, ta walay gunigon yo?”

⁸ Inkuandad kinen Jefte, “Wadya kami natan ed sika, lapud labay mi kan milad sikami ta mibakal tayod saray Ammonita tan ipangulom iray amin a totood Galaad.”

⁹ Inkuanen Jefte ed sikara, “No pasempeten yo ak ta mibakal ak ed saray Ammonita, et panaloen ak na Katawan, siak so magmaliw a manoley yo.”

¹⁰ Inmebat ira, “Onabubon kami. Say Katawan so tasi tayo!”

¹¹ Kanyan akilad saramay pangulo na Galaad si Jefte, et saray totoo impagmaliw dan manoley tan pangulo ra. Diad Mizpa pinalinew nen Jefte diad arap na Katawan so labay ton nagawa.

¹² Angibakiy Jefte na pigaran totoo ed ari na Ammon a mangikuan, “Antoy makasengeg na pilalaban mod siak? Akin et nilooban mon bakalen so bansak?”

¹³ Inmebat ed saramay imbaki nen Jefte so ari na Ammon, “Nen pinmaway ed Egipto iray Israelita ginamgam day dalin ko manlapud Ilog na Arnon ya anggad Ilog na Jabok tan say Ilog na Jordan. Natan nepeg mon ipawil ed siak a mabolbolus.”

¹⁴ Pinapawil nen Jefte ed ari na Ammon ira may imbaki to ya

¹⁵ onyay impaiyebat tod sikara: “Aliwan tua a say Israel et ginamgam toy dalin na Moab odino say dalin na Ammon.

¹⁶ Onyay peteg ya agawa: nen tinaynan na saray Israelita so Egipto, dinmalan ira ed kalawakan ya anggad Dayat ya Akaba tan akasabi ra ed Cades.

¹⁷ Insan ira angibakid ari na Edom na saray totoo ya onkerew na abuloy ya ondalan irad dalin to. Balet ag ira inabuloyan na ari na Edom ya ondalan. Kinerew da met ed ari na Moab a padalanen to ra, balet ag to met ira inabuloyan. Kanyan nanayam ed Cades ira may Israelita.

¹⁸ Insan bineltang da so kalawakan; sinmaliberber ira ed dalin na Edom tan samay dalin na Moab ya anggad akasabi ra ed nibokig na Moab, diad basil na Ilog na Arnon. Nankampo rad man, balet ag da bineltang so Arnon, lapud ketegan iman na Moab.

¹⁹ Insan saramay Israelita angibaki ra ed Sehon ya ari na saray Amorreo tan manooley ed Hesbon, ta kerewen dad sikato ya abuloyan to ran ombeltang ed bansa to, pian makakar irad dalin da.

²⁰ Balet ag to inabuloyan ira may Israelita ya ondalan. Impantitipon to ingen ya amin iray sondalo to, nankampod Jahaz, tan dinogpaan toy Israel.

²¹ Balet impanalo na Katawan a Dios na Israel iray Israelita ed kinen Sehon tan saray sondalo to. Kanyan inala na saray Israelita ya amin iray dalin na saray Amorreo a manaayam ed saman a bansa.

²² Nanayaman day amin a dalin na saray Amorreo manlapud Armon diad abalaten ya anggad Jabok diad baybay tan manlapud kalawakan diad bokig ya anggad Jordan diad sagur.

²³ Kanyan say Katawan a Dios na Israel so amataynan ed saray Amorreo, pian napanayaman na saray Israelita so dalin da. Labay mo a babawien iman a dalin?

²⁴ Kayaryan mo labat so antokaman ya inter ed sika na dios mon Cemos. Balet kayaryanen mi met so antokaman ya inter ed sikami na Katawan min Dios.

²⁵ Abaloan mon matalonggaring ka ni nen si Balac a lakin anak nen Zippor tan ari na Moab? Inmangat a mibakal ed Israel? Akibakal ed sikamin Israelita?

²⁶ Talon lasus taon a nanayam so Israel ed Hesbon tan Aroer, tan diad saray kaliber-liber dan baley, tan diad amin a siudad ed gilig na Ilog na Armon. Akin et ag mo ra binabawi ed loob to man a panaon?

²⁷ On, ag ta kan balut nanggawaay antokaman a makapoy. Sika so manggagaway makapoy diad pibabakal mod siak. Say Katawan so huis a manintinsia natan ed saray Israelita tan saray Ammonita.”

²⁸ Balet ag dinengel na samay ari na Ammon imay impaibaga nen Jefte.

²⁹ Insan nanayam ed Jefte so ispiritu na Katawan. Dinmalan si Jefte ed Galaad tan Manases, insan pinmawil ed Mizpa na Galaad tan linmad Ammon.

³⁰ Insipan nen Jefte ed Katawan: “Katawan, no panaloen mo ak ed saray Ammonita,

³¹ isaklang kon popoolan a bagat ed sika so ononan too ya ompaway ed abung ko ya onabet ed siak, no ompawil ak ya analod bakal.”

³² Kanyan binaliw nen Jefte so ilog, ta labanan to ray Ammonita, et impanalo na Katawan.

³³ Dinogpaan to ra manlapud Aroer ya anggad pasen a kaliber-liber na Minnit, duamplon siudad ya amin, tan anggad Abeleramin. Agaylay karakel na apatey ed saman a bakal, tan tinalo na Israel iray Ammonita.

Say Biin Anak nen Jefte

³⁴ Nen pinmawil si Jefte ed abung tod Mizpa, wadmay biin anak to ya ompapaway ed abung, ta onabet ed sikato. Onsasayaw tan manotogtog na tamborin. Saksakey yan anak to.

³⁵ Kanengneng tod sikato, pinilat toy kawes tod ermen to tan kuanto, “O anak ko! Paniingeten moy pagew ko! Akin et sikay makasengeg na mapalalon kagunigon ko. Walay sinambaan kod Katawan, et ag ko la nababawi.”

³⁶ Inkuan ed sikato na samay anak, “Ama, no nansipan kayo ed Katawan, sumpal yoy imbaga yon gawaen ed siak, bangta pinabawi kayo na Katawan ed saray kalaban yon Ammonita.”

³⁷ Balet kinerew tod kinen ama to, “Iyabuloy yo pa yan gawaen ko. Paolyan yo ak a bukor a duay bulan, pian makapanakar-akar ak ed kapalandeyan a kaibak iray kakaarok; panermenan koy ipatey ko a sakey a birhin.”

³⁸ Imbaga nen Jefte ya onla, kanyan pinasiput ton onarawi ed loob na duay bulan. Linma sirin ed kapalandeyan a kaiba to ray kakaaro to. Nanermen na mapalalo, lapud ompatey ya anggapoy asawa tan anggapoy anak.

³⁹ Kalabas na duay bulan pinmawil ed kinen ama to. Ginawa nen Jefte imay insipan tod Katawan, kanyan inatey a birhin imay anak to. Sikato yay gapowan na ogali ed Israel

⁴⁰ a saray Israelitan bibii et ompaway iran apat agew kapag taon tan ermenan day biin anak nen Jefte a taga Galaad.