Saray Huis 1 - Maung A Balita Biblia

Dinakep na Tribu di Juda tan Simeon si Adoni-bezec

¹ Kayariy impatey nen Josue saray Israelita tinepet dad Katawan, “Dinan ed saray tribu mi so ononan onla ya ondogpad saray Cananeo?”

² Say Katawan inmebat, “Say tribu nen Juda so ononan ondogpa. Impasilong ko lad pakaoley da so dalin na Canaan.”

³ Saray totoo nen Juda kuandad saray totoo nen Simeon ya agi nen Juda, “Mila kayod sikami ed pasen a nipabetang ed sikami, ta mantulongan itayon mibakal ed saray Cananeo. Insan kami met milad sikayo ed pasen a nipabetang ed sikayo.” Nanolup sirin ya akibakal iray tribu di Simeon

⁴ tan Juda. Impanalo ra na Katawan ed saray Cananeo tan saray Perezeo, tan tinalo ray samplon libon totoo diad Bezek.

⁵ Arumog dad man si Adoni-bezec tan nilabanan da.

⁶ Batik si Adoni-bezec, balet inosilan da, narel da, tan pinopotut da ray tangan na lima tan sali to.

⁷ Inkuanen Adoni-bezec, “Nandodokdok nen saman na ibung ed silong na lamisaan ko iray arari ya apotut-potut so tangan na lima tan sali ra. Gagawaen ed siak natan na Dios imay ginagawak ed sikara.” Niakar ed Jerusalem si Adoni-bezec, tan diman la inatey.

Dinakep na Tribu nen Juda so Jerusalem tan Hebron

⁸ Dinogpaan na saray totoo nen Juda so Jerusalem tan adakep da. Pinapatey da ray totoo to tan pinoolan day siudad.

⁹ Kayari to ya, linma ran akibakal ed saray Cananeon manaayam ed kapokdulan a bario, diad saray alusadsar na pokdul, tan diad saray patar ed abalaten

¹⁰ Linma ran akibakal ed saray Cananeon manaayam ed siudad na Hebron a tatawagen nen saman na Kiryat-arba. Tinalo dad man iray boleg di Sesai, Ahiman, tan Talmai.

Tinalo nen Otniel so Siudad na Debir

¹¹ Manlapud man saray totoo nen Juda linma ran akibakal ed siudad na Debir a tatawagen nen saman na Kiryat-sefer.

¹² Inkuan na sakey ed saramay totoo nen Juda a si Caleb, “Paasawak si anak kon Acsa ed lakin makadakep ed Kiryat-sefer.”

¹³ Si Otniel, say anak na lakin yogtan nen Caleb a si Cenaz, so akadakep ed samay siudad, kanyan impaasawa nen Caleb ed sikato si Acsa a marikit to.

¹⁴ Diad agew na bansal, impurpurek nen Otniel ed kinen asawa to ya onkerew na alog ed kinen ama to. Inmepas ed asno to si Acsa, insan tinepet nen Caleb ed sikato no antoy labay to.

¹⁵ Inmebat si Acsa, “Rigaloan yo ak pa na dalin a walay sobul to. Samay inter yod siak a dalin ed bandad baybay et amaga tan araldalem so sobul.” Kanyan inter nen Caleb ed sikato so sobul ed bandad tulo tan leksab.

Saray Impanalo na saray Tribu di Juda tan Benjamin

¹⁶ Saray Cineo a kabyangay boleg na katolangan nen Moises et akila rad saray totoo nen Juda manlapud Jerico, say siudad na saray kiew a palmira, ya anggad kalawakan na Juda diad abalaten na Arad. Nanayam irad man a kaiba da ray Amalecita.

¹⁷ Nankakaiba iray totoo nen Juda tan saray totoo nen Simeon tan tinalo da ray Cananeo a manaayam ed siudad na Zefat. Sigput dan dineral yan siudad, kanyan inngaran da na Horma.

^18-19 Tinulongan na KATAWAN iray totoo nen Juda, kanyan asakup da ray kapokdulan a dalin. Balet ag da alooban iray Gaza, Ascalon, tan Ecron, pati saray kaliber-liber dan pasen. Sarayan totoon manaayam ed gilig na dayat et wala ray balatyang a karwahi ra, kanyan ag ira apataynan na saray totood Juda.

²⁰ Onung na ingganggan nen Moises, niiter so Hebron ed kinen Caleb ya amataynan ed siudad na taloran boleg a si Anak so sengeg da.

²¹ Balet ag pinataynan na saray totood tribu nen Benjamin iray Jebuseo a manaayam ed Jerusalem, tan nanlapud saman saray Jebuseo kaiba dan nanayam diman iray totoo nen Benjamin.

Dinakep na saray Tribu di Efraim tan Manases so Betel

^22-23 Dinogpaan na saray tribu di Efraim tan Manases so siudad na Betel a tatawagen na Luz ed saman a panaon. Tinulongan ira na KATAWAN. Angibaki ra ed siudad na saray ispia.

²⁴ Akanengneng ira yan ispia na sakey a lakin ompapaway ed siudad tan kuandad sikato, “Ibagam ed sikami no panoy kaloloob ed siudad, et ag mi ka diwiten.”

²⁵ Kanyan imbangat to ra. Saray totoo nen Efraim tan Manases pinapatey da ray amin a totood siudad, likud ed samay too tan saray kabyangay pamilya to.

²⁶ Insan linmad dalin da ray Heteo imay laki, amaalagey na siudad diman, tan inngaran to na Luz a ngaran to ni ya anggad natan.

Saray Totoon ag Pinataynan na saray Israelita

²⁷ Ag pinataynan na tribu nen Manases iray totoon manaayam ed saray siudad na Get-sean, Taanac, Dor, Ibleam, Megido, tan saray kaabay dan baley; nansiansian nanayam irad may Cananeo.

²⁸ Nen binmiskeg iray Israelita, pinasoot dan nankimey para sikara iray Cananeo, balet ag da ni ran siansia pinataynan.

²⁹ Ag pinataynan na tribu nen Efraim iray Cananeo a manaayam ed siudad na Gezer, kanyan nansiansian kaiba da ray Cananeo a nanayam diman.

³⁰ Ag pinataynan na tribu nen Zabulon iray totoon manaayam ed saray siudad na Kitron tan Nahalol, kanyan saray Cananeo nansiansian kaiba da ran nanayam diman tan a pasoot iran nankimey para saray totoo nen Zabulon.

³¹ Ag pinataynan na tribu nen Aser iray totoon manaayam ed saray siudad na Acco, Sidon, Ahlab, Aczib, Helba, Afec, tan Rehob.

³² Saray totoo nen Aser et kaiba da ran nanayam iray Cananeo, bangta ag da ra pinataynan.

³³ Ag pinataynan na tribu nen Neftali iray totoon manaayam ed saray siudad na Bet-semes tan Bet-anat. Saray totoo nen Neftali et kaiba da ran nanayam iray Cananeo, balet pinasoot da ran nankimey para sikara.

³⁴ Sinonson na saray Amorreo ed kapokdulan a pasen iray totood tribu na Dan tan ag da ra inabuloyan a manayam ed patar.

³⁵ Nansiansia ray Amorreo a nanayam ed Ayalon, Saalbim, tan diad Palandey na Heres, balet nansiansia ya inoleyan ira na saray tribu di Efraim tan Manases tan pinasoot da ran nankimey para sikara.

³⁶ Say baybay na Sela a ketegan da ray Edomita et ontalonton ya anggad Dalan na Acrabim.