Saray Hebreo 7 - Maung A Balita Biblia

Si Melkisedek a Pari

¹ Sayay Melkisedek ari na Salem tan pari na Sankatageyan a Dios. Nen ompapawil si Abraham, kasumpal ton akibakal a pinapatey to ray arari, inabet nen Melkisedek tan binindisionan to.

² Inter nen Abraham ed sikato so kakaplo na amin a sinamsam to. (Say ononan kabaliksay ngaran nen Melkisedek et “Ari na Katonungan.” Lapud ari met na Salem, say labay met ya ibagay ngaran to et “Ari na Kareenan.”)

³ Anggapoy nisulat nipaakar ed ama o ina to, o nipaakar ed nanlapwan ton boleg. Anggapo met so nisulat nipaakar ed inkianak o impatey to. Singa say Anak na Dios, mansiansian pari ya anggad angga.

⁴ Nanengneng yo, sirin, so ontan lan katalonggaring nen Melkisedek! Inter ed sikato nen Abraham a patriarka so kakaplo na sinamsam tod impibakal to.

⁵ Saramay apilin papari a kabyangay boleg nen Levi et walay bilin na Ganggan a mangawat iray kakaplo ed saray Israelita, saray agagi ra lamlamang, anggaman a kabyangan met iray boleg nen Abraham.

⁶ Si Melkisedek ag kabyangay boleg nen Levi, balet angawat na kakaplo ed kinen Abraham tan binindisionan to yan too ya angawat na saray sipan na Dios.

⁷ Ag napanduaruwaan a say mamindision et matalonggaring nen say bindisionan.

⁸ Ompatey iray papari a mangaawat na kakaplo, balet napaneknekan ed Masanton Sulat a mabilay si Melkisedek.

⁹ Kanyan nayarin ibaga a si Levi a mangaawat na kakaplo et nambayar met na kakaplo diad panamegley nen Abraham.

¹⁰ Ta nayarin ibaga a si Levi et wala nid laman nen laki ton Abraham, nen nabet nen Melkisedek si Abraham.

¹¹ Ta niiter so Ganggan ed saray Israelita diad panamegley na inkapari da ray paparin kabyangay boleg nen Levi. No nagnap so kimey da ray paparin kabyangay boleg nen Levi, ag la komun kinaukolay sananey nin pari onung ed inkapari nen Melkisedek, aliwan onung ed inkapari nen Aaron.

¹² Ta no apasimbaloy inkapari, nakaukolan a napasimbalo met so ganggan.

¹³ Say Katawan tayo, a sikatoy tutukoyen na sarayan asalita la, et kabyangay sananey a tribu; et anggapoy anggan sakey a kabyangan na sayan tribu a nanlapwan to so nanlingkur a pari.

¹⁴ Ta malinlinew a say Katawan kabyangay tribu nen Juda; tan ag binitla nen Moises yan tribu nen nansalita na nipaakar ed saray papari.

Say sananey a Pari, a singa si Melkisedek

¹⁵ Linminew ni ya nen sinmabi so sananey a parin singa si Melkisedek.

¹⁶ Nagmaliw a pari, aliwan lapud ganggan o totontonen ya impaakseb na too, no ag lapud pakayari na sakey a bilay ya anggapoy samput to.

¹⁷ Ta onyay ibabaga na Masanton Sulat nipaakar ed sikato: “Pari kan anggad angga, onung ed inkapari nen Melkisedek.”

¹⁸ Say daan a ganggan, sirin, nakalay pakayari lapud makapoy tan anggapoy kana.

¹⁹ Ta say Ganggan nen Moises anggapoy nagawaan ton nagnap. Balet magmaung so balon ilalo a sinmabid sikatayo ta, diad panamegley na sayan ilalo, onasingger tayod Dios.

²⁰ Aliwan satan labat, wala niy samba na Dios.

²¹ Ag nansambay Dios nen ginawa ton pari ray arum, balet nansamba nen ginawa ton pari si Jesus. Onung na ibabagay Masanton Sulat, “Say Katawan sinambaan to tan ag to benegan: ‘Pari kan anggad angga.’”

²² Sayan pandomaan, sirin, gawaen toy Jesus a kaletan na magmaung a sipanan.

²³ Wala niy sakey a pandomaan: amayamay nen saman iray papari a nansosoblayan lapud inaatey ira tan ag da la nituloy so kimey da.

²⁴ Balet mabilay ya anggad angga si Jesus, tan ag nayarin ipatawir ed sananey so inkapari to.

²⁵ Kanyan nayarian ton ilaban, natan tan lawas, iray onsingger ed Dios diad panamegley to, ta mabilay lawas a mikasin para sikara.

²⁶ Si Jesus sirin, so Pangulon Pari a mangiiter na saray nakaukolan tayo! Ta sikatoy masanto; anggapoy tilul o kasalanan to; nibiig ed saray makasalanan tan nitanduro ya anggad labas da ray katawenan.

²⁷ Si Jesus aliwan singa saray arum a pangulon papari a nakaukolan day mangibagat ya inagew-agew, onona para saray kasalanan da, insan para saray kasalanay katoowan. Amimpinsan ya angibagat si Jesus, tan angga lad angga ya, nen imbagat toy sikaton dili.

²⁸ Saray pangulon papari ya apili ra onung ed Ganggan nen Moises et wala ray kakapoyan da; balet say sipan a tinekepay samba, a naonur a sinmabi nen say Ganggan, tinoro toy Anak ya agawan nagnap ya andi-anggaan.