Saray Hebreo 2 - Maung A Balita Biblia

Say Baleg a Kilalaban

¹ Kanyan nepeg tayon bembenan na malet iray katwaan a nadngel tayo, pian ag itayo nabalang.

² Say salitan impaamta da ray anghil et apaneknekan a sikatoy tua, tan siopaman ya ag inmonur odino anumlang ed salita et inawat toy dusan kanepegan to.

³ Panon sirin a naliktaran tayoy dusa, no palpaolyan tayoy ontan lan kabaleg na kilalaban? Say Katawan so onaan ya angibawag na sayan kilalaban, tan saray akadngel ed sikato pinaneknekan dad sikatayo a tua ya.

⁴ Pinaneknekan met ya na Dios diad panamegley na saray tanda, saray pakelaw, saray nandoroman milagro, tan diad panamegley na saray langkap na Ispiritu Santo a sikaray iniiter to onung ed linawa to.

Say Mangipangulo ed Kilalaban

⁵ Aliwan saray anghil so impanoley na Dios ed mundo ya onsabi, say mundo a sasalitaen mi.

⁶ Ingen, nibaga ed sakey a parti na Masanton Sulat: “Antoy too et nununoten mo, O Dios; say mugmon too, et aasikasoen mo?

⁷ Diad aganon panaon pinaabebam nen saray anghil, kinoronaan mo na galang tan dayew,

⁸ tan ginawam a manoley ed amin a bengatla.” Nen say Dios et ginawa ton manoley so too ed amin a bengatla, anggapoy bengatlan ag to inoleyan. Balet ag tayo ni nanengneng a manooley natan so too ed amin a bengatla.

⁹ Balet nanenengneng tayoy Jesus! Diad aganon panaon apaabeba nen saray anghil, pian diad panamegley na baleg a panangaroy Dios, nepeg ya ompatey para amin a katoowan. Nanenengneng tayo ya akoronaan natan na kagalangan tan dayew lapud asagmak ton kairapan ed impatey to.

¹⁰ Manepeg ed Dios—say amalsa tan manaasikasod amin a bengatla—a ginawa toy Jesus a nagnap diad panamegley na kairapan, pian pinabangen tod kagalangan to ray amayamay ya anak. Ta si Jesus so mangipapanguloy kilalaban da.

¹¹ Lilinisan nen Jesus iray totoo ed saray kasalanan da; sikato a manlinis tan saray nalilinisan et saksakey so Ama ra, kanyan si Jesus ag ambaing a manawag na agagi ed sikara.

¹² Inkuantod Dios, “Ibagak ed saray agagik no anto ray ginagawam; idayew ta kad olupan da.”

¹³ Inkuanto met, “Manmatalek ak ed Dios.” Inkuanto ni, “Wadya ak a kaibak iray anak ya inter ed siak na Dios.”

¹⁴ Lapud sarayan anak et totoo ran walay laman tan dala, si Jesus et nagmaliw a too a singa sikara. Ginawa to ya pian diad panamegley na impatey to, naderal toy Diablo a walay pakayari tod patey.

¹⁵ Diad ontan imbolus to ray amin a nagmaliw ya aripen ed legay bilay da lapud takot dad patey.

¹⁶ Malinew ya aliwan saray anghil so tutulongan to, no ag ingen “saray kabyangan na boleg nen Abraham,” onung na ibabagay Masanton Sulat.

¹⁷ Kanyan kinaukolan a magmaliw a singa saray agagi to diad amin a pamaakaran. Diad ontan nagmaliw a maabagey tan matoor a Pangulon Pari ra diad panaglingkur tod Dios, pian napaandi ray kasalanan na saray katoowan.

¹⁸ Lapud nanirap tan atukso, natulongan to met natan iray natutukso.