Saray Hebreo 10 - Maung A Balita Biblia

¹ Say Ganggan anino labat tan aliwan nagnap a pakanengnengan na saray maung nin bengatla ya onsabi. Ag ton balut nayarian a gawaen a nagnap iray onsingger ed Dios diad panamegley na saray bagat ya isaklang a tinaon-taon.

² No talagan napirdona so saray mangigagalang ed Dios lapud sarayan bagat, ag da la komun nunoten a nankasalanan ira, tan ontonda met lad satay amin a bagat.

³ Ingen, sarayan bagat ipanunot dan tinaon-taon iray kasalanan na totoo.

⁴ Ta ag balut makapaandi na saray kasalanan so dala na saray bakan kalakyan tan saray kanding.

⁵ Lapud saya, nen onla la diad mundo si Cristo, inkuantod Dios: “Ag mo labay iray bagat tan saray saklang, ingen, angiparaan kay laman para siak.

⁶ Ag ka apaliket na saray bagat a popoolan, tan saray bagat a mamaandid saray kasalanan.

⁷ Insan inkuanko, ‘Nia ak, O Dios! Sipaparaan ak a mangonur na linawam onung na nisulat nipaakar ed siak diad libroy Ganggan.’”

⁸ Inkuanton onaan, “Ag mo labay tan ag ka apaliket na saray bagat tan saray saklang, o saray bagat a popoolan tan saray bagat a para kasalanan.” Inkuanto ya, anggaman a nibagat ira onung ed Ganggan.

⁹ Insan inkuanto, “Nia ak, O Dios! Sipaparaan ak a mangonur na linawam.” Inekal na Dios sirin so onaan a bagat tan insalat toy bagat nen Cristo.

¹⁰ Lapud impangonur nen Jesu-Cristo na linaway Dios, inorasan to ray kasalanan tayo diad panamegley na impangibagat tod sikaton dili, tan duga la ya.

¹¹ Inagew-agew a manalagey tan manlingkur so balang pari da ray Judio, tan mamimpigan mangisaklang na nampaparan bagat. Balet ag makapaandiy kasalanan ira yan bagat.

¹² Si Cristo, balet, amimpinsan ya angibagat lapud saray kasalanan, tan duga la ya. Kasumpal to, inmirung ed nikawanay Dios.

¹³ Manaalagar ya anggad say Dios napasuko tod sikato ray kalaban to.

¹⁴ Kanyan diad panamegley na saksakey a bagat, ginawa ton nagnap ya andi-anggaan iray naorasan ed kasalanan.

¹⁵ Paneknekan met ya na Ispiritu Santo. Inkuanton onaan,

¹⁶ “Sikato yay pisipanan kod sikara, diad saray agew ya onsabi, kuay Katawan: Iseksek kod kapusoan da iray ganggan ko, tan isulat kod kanunotan da.”

¹⁷ Insan inkuanto, “Ag ko la nunoten iray kasalanan tan saray kaogsan da.”

¹⁸ Kanyan nen apirdona la ra ya, ag la nakaukolay bagat a pangekal na saray kasalanan.

Onsingger itayod Dios

¹⁹ Kanyan, agagi, bolus ti lan onloob ed Sankasantosan a Pasen diad panamegley na impatey nen Jesus.

²⁰ Nilokasan ton para sikatayo so balo tan mabilay a dalan ya ontalus ed biek na kurtina, a salanti say laman to.

²¹ Walay pari tayon matalonggaring a manaasikasoy abung na Dios.

²² Onsingger itayod Dios, sirin, a matoor so puso tayo tan mabiskeg so pananisia tayo. Onsingger itayon malinis lay puso tayo ta alinisan lad maoges a konsinsia, tan naorasan la na puron danum so laman tayo.

²³ Paeleten tayoy ilalo tayo tan ag tayo mapaga, ta matoor so Dios a nansipan ed sikatayo.

²⁴ Nepeg tin nunoten no panoy pananggoyur tayod balang sakey a mangarod kapara ton too tan manggaway kamaungan.

²⁵ Ag tayo nepeg a paolyay pantitipon tayo, a singa gagawaen da ray arum. Ingen, mampapabiskegan tayoy linawa, lautla ni met ta nanenengneng yon asingger lay isabiy Agew na Katawan.

²⁶ No kasumpal tin naamtaay katwaan et gagalaen tayo niy mankasalanan, anggapo lay bagat a makapaandid saray kasalanan tayo.

²⁷ Anggapo lay atilak no ag say itakot tayod panalagar na onsabin Okum tan say manliub ya apoy a mangoput ed saray onsumpad Dios!

²⁸ Pateyen ya anggapoy panangasi so siopaman ya ag mangonur ed Ganggan nen Moises no, lapud pantasi na duara o talora, et nalmoan a nankasalanan.

²⁹ Diad isisip yo, ag kasi lalon ambelat so dusay sakey a toon balawen toy Anak na Dios, murmuraen toy dala ya amabiskeg ed sipanan ya amasantod sikato, tan pabaingan toy mapangasin Ispiritu?

³⁰ Ta kabat tayoy angibagay onya: “Siak so ombawi; siak so manusa.” Tan inkuanto ni, “Sintinsiaan na Katawan iray totoo to.”

³¹ Makapataktakot so napelag ed limay Dios a mabilay!

³² Nunot yo pay agawad sikayo nen saman. Nen saman iran agew, kasumpal ya aliwawaan kayo, agaylay impaniirap yo, balet ag kayo atalo.

³³ No arum, pinapabaingan tan pinapairap da kayod arap na karaklan; no arum met, akidamay kayod saray naniirap na onya.

³⁴ Kinakasian yo ray apriso, tan inako yon sililiket so impangaala da ray kagawaan yo, ta amta yon magmaung ni tan mansiansian anggad angga so kayamanan ya atilak ed sikayo.

³⁵ Ag yo sirin papakapoyey linawa yo, ta balbaleg so tumang ya awaten yon iter to.

³⁶ Nakaukolan a mananos kayo, pian nasumpal yoy linaway Dios tan naawat yoy insipan to.

³⁷ Onung na ibabagay Masanton Sulat, “Asingger lan panaon so isabi na onla dia; ag la manabala.

³⁸ Mambilay ed pananisia so took a matonung, balet no benegan to ak, ag ko pakaliketan.”

³⁹ Aliwa tayon singa saray totoon ombebeneg a mamaarap ed kaderalan. Ingen, singa tayo saray totoon mananisiad Dios tan nilalaban.