Saray Gawgawa 4 - Maung A Balita Biblia

Di Pedro tan Juan diad arap na Sanidrin

¹ Mansasalita ni rad totoo di Pedro tan Juan nen sinmabi ray papari, say kapitan da ray managguardiay Timplo, tan saray Saduseo.

² Makapapasnuk irad saramay duaran apostol lapud pangibabangat tan pangipupulong dad saray totoo ya inmolid bilay si Jesus, et diad ontan, papaneknekan da met ya onolid bilay iray inaatey.

³ Kanyan inerel da ra tan inkolung da ni rad prisowan ya anggad kabwasan, ta onlalabi la.

⁴ Anggaman ontan, amayamay ed saray akadngel na impupulong da so anisia. Diad sarayan anisia, sakey a liman libo la ray lalaki.

⁵ Diad ontombuk ya agew, nantitipon ed Jerusalem iray manoley a Judio, saray mamatakken na baley, tan saray iskriba.

⁶ Kaiba ray Anas a Pangulon Pari, si Caifas, si Juan, si Alejandro, tan amin a kabyangay pamilya to may Pangulon Pari.

⁷ Pinaalagey da ray apostol ed arap da tan tinepet da, “Panoy impanggawa yod saya? Diad anton pakayari o ngaran so impanggawa yo ya?”

⁸ Napnoy Ispiritu Santo ya inmebat si Pedro, “Sikayon manoley tan mamatakken na baley,

⁹ no say labay yon tepeten ed sikami natan et say nipaakar ed kamaungan ya agawad sayan lopuy tan no panoy inyabig to,

¹⁰ nepeg yo ya amtaen tan amin a totood Israel, a manalalagey yan tood arap yo tan nagnap so inyabig to, lapud pakayari na ngaran nen Jesu-Criston taga Nazaret. Impasak yod krus, balet say Dios pinaoli tod bilay.

¹¹ Si Jesus so labay ya ibaga na Masanton Sulat nen inkuanto, ‘Say baton impasen yon andikakanaan, sikayo ran karpintiro, nagmaliw lamlamang a sankakanaan a bato.’

¹² Diad sikato labat so pakalmoay kilalaban, ta anggapoy arum a ngaran ya inter na Dios ed saray katoowan diad intiron mundo a nepeg tayon kilabanan.”

¹³ Mankelaw iray kabyangay Sanidrin ed tepel na linawa di Pedro tan Juan. Lalon mankelaw ira nen naamtaan da ya ordinario labat iran totoo, tan anggapoy aral da. Naamtaan dad satan a kabkaiba ray Jesus nen saman.

¹⁴ Balet anggapoy niebat da, ta sankanengneng da may toon inmabig a kaiba ran manalalagey di Pedro tan Juan.

¹⁵ Kanyan pinapaway da ni ra, insan ira nansisingbatan.

¹⁶ “Antoy gawaen tayod sarayan totoo?” tepet da. “Kabat na amin a totood Jerusalem a ginawa ra yan makapakelkelaw a milagro. Ag tayo ya napaandin agawa!

¹⁷ Balet pian ag la ombuyak yan balita, sebelan ti ran mansalitad anggan siopa na nipaakar ed ngaran nen Jesus.”

¹⁸ Kanyan impatawag da ra lamet tan ingganggan dan ag la ran balut mansalita o mambangat na nipaakar ed kinen Jesus.

¹⁹ Balet inmebat ira di Pedro tan Juan, “Sikayo lan diliy manintinsia no dinay maptek ed arap na Dios: say pangonur ed sikayo, o say pangonur ed Dios.

²⁰ Ta ag mi nayarian ya ag ibalitay anengneng tan nadngel mi.”

²¹ Lalon sinebelan iray kabyangay Sanidrin, insan da ra imbolus. Anggapoy naalmo ran makasengeg na panusa rad sikara, ta idadayew na amin a totoo so Dios, lapud sayan agawa.

²² Masoluk lan apataploy taon to may lakin akagawaay milagro.

Impikasi da ray Mananisia a Naitdan iray Biskeg na Linawa

²³ Kablus di Pedro tan Juan, pinmawil iran tampol ed saray kakaiba ra tan imbalita ray imbaga na saray manonan papari tan saray mamatakken na baley.

²⁴ Kadngel dad saya, nankakasakey iran nampikasid Dios: “Katawan, sikay amalsay tawen, dalin, dayat, tan amin a logan da!

²⁵ Sikay nansalita diad panamegley nen laki min David ya aripen mo nen inkuanto, diad puyan na Ispiritu Santo, ‘Akin et agaylay pasnuk da ray Hintil, tan nanggagawa na saray andikakanaan a komplut iray totoo?

²⁶ Saray ararid dalin et imparaan day sikaran dili, tan nantitipon iray manoley a milaban ed Katawan tan say Misias to!’

²⁷ Ta nankasakey ed sayan siudad si Herodes, si Poncio Pilato, saray Hintil, tan saray amin a totood Israel a milaban ed masanton Aripen mon si Jesus, say pinilim a Cristo.

²⁸ Ginagawa ran amiy nakaukolan a nagawa, onung na inggetar mo la nen saman lapud pakayarim tan linawam.

²⁹ Tan natan, Katawan, sesebelan da kami. Tulongan mo kami pa ran aripen mo, pian nipulong min anggapoy takot so salitam.

³⁰ Iyonat moy limam a mamaabig, tan iyabuloy mon nagawa ray milagro tan pakelaw ed ngaran nen Jesus a masanton Aripen mo.”

³¹ Kasumpal dan nampikasi, ayegyeg may nantitiponan da. Napno ran amin na Ispiritu Santo, tan anggapoy takot dan balut a nampupulong na salitay Dios.

Say Pantutulongan da ray Cristiano

³² Nankakasakey so kanunotan tan liknaan da ray amin a mananisia, tan anggapoy mangipapasen a kien ton bukor so kayaryan to, no ag ingen kien dan amin.

³³ Intuloy na saray apostol so manggawa na saray milagro a pamaneknek da ed inkiolid bilay nen Jesus a Katawan. Inter na Dios ed sikaran amin so bindision ton ag nasabsabaan.

³⁴ Anggapod sikaray kinmulang ed pankaukolan, ta saray dalin o abung inlalako na saray akankien

³⁵ tan iniiter dad saray apostol so nanlalakoan da, tan nibunog so kuarta onung ed pankaukolay balang sakey ed sikara.

³⁶ Onyay ginawa nen Jose, sakey a Levitan taga Chipre, tan nginaranan na saray apostol na Bernabe (a say labay ton ibaga, “Managpabiskeg na Linawa”).

³⁷ Inlako toy dalin to tan inter tod saray apostol so nanlakoan to.