Saray Gawgawa 23 - Maung A Balita Biblia

¹ Ninengneng a maung nen Pablo ra, insan inkuanto, “Agagi! Malinis so konsinsiak a mambibilay ed arap na Dios, anggad sayan agew.”

² Si Ananias a Pangulon Pari ingganggan to ra may manalalagey ed abay nen Pablo a tibeben day maksil so songut to.

³ Inkuanen Pablo ed sikato, “Kabilen kay Dios, sikan mansimpisimpitan! Wadtan kan manyodyorung a manintinsiad siak onung ed Ganggan, balet sikan dili et susumpaen moy Ganggan diad pangigaganggan mon tibeben da ak.”

⁴ Saray totoon walad abay nen Pablo inkuanda, “Oy, lelemlemewen moy Pangulon Pari na Dios!”

⁵ Inmebat si Pablo, “Ag ko amta, agagi, a sikato et Pangulon Pari manaya. Ta ibabagay Masanton Sulat, ‘Ag ka mansasalitay maoges sumpad manoley ed saray totoom!’”

⁶ Nen anengneng nen Pablo a wadman iray pigaran Saduseo tan saray arum a Pariseo, inkuantod maksil a bosis, “Agagi, sakey ak a Pariseo tan anak na saray Pariseo. Iimbistigaen da ak natan, lapud ilalok ya onolid bilay iray inaatey.”

⁷ Kasumpal to yan imbaga, nansasangsangan iray Pariseo tan saray Saduseo, kanyan nankadway Sanidrin.

⁸ (Ta ibabaga da ray Saduseo ya ag onolid bilay iray inaatey tan anggapoy anghil o ispiritu, balet saray Pariseo panisiaan da ra yan talo.)

⁹ Kinmasil so ingalan da. Inmalagey iray pigaran iskriba a kakaiba ray Pariseo tan inkuandan sinmumlang, “Anggapoy naalmo min kasalanan to yan too! Ompan walan tuay sakey ya ispiritu o anghil ya akitongtong ed sikato!”

¹⁰ Nen ampetang lan maung so pansasangsangan da, tinmakot imay kapitan ta ag la pigan nadanel-danel si Pablo, kanyan pinaleksab to ray sondalo, impaala toy Pablo, tan impailoob tod kuartil.

¹¹ Nen ontombuk a labi, nanalagey so Katawan ed abay nen Pablo tan inkuanto, “Pabiskeg moy linawam! Tinasian mo ak diad Jerusalem. Nepeg mo met yan gawaen diad Roma.”

Implano ran Pateyey Pablo

¹² Nen ontombuk a kabwasan, nantitipon iray pigaran Judio tan sinambaan day ag mangan o oninom, anggad ag da napatey si Pablo.

¹³ Masoluk iran apataplo a namplano yan kaogsan.

¹⁴ Linma rad manonan papari tan saray mamatakken na baley tan inkuanda, “Masimsimoon min sinambaan ya ag kami ontimtin na anggan anton kakanen, anggad ag mi napatey si Pablo.

¹⁵ Kanyan sikayo tan say Sanidrin, kerew yod kapitan ya ibaki tod sikayo si Pablo. Ibaraan yo a labay yo nin tepetan a maung na nipaakar ed sikaton dili. Balet sipaparaan kamin mamatey ed sikato, kasakbayan a makasabi dia.”

¹⁶ Balet nadngelan na lakin anak na biin agi nen Pablo so sayan plano. Kanyan linmad kuartil tan imbalita tod kinen Pablo.

¹⁷ Tinawag nen Pablo so sakey ya opisyal tan inkuanto, “Ibaan mo pa yan tobun-balo ya onlad kapitan, ta walay ibaga to.”

¹⁸ Inibaan to sirin, tan inyakar tod kapitan. Inkuanto, “Tinawag ak nen prison Pablo, tan kinerew ton iyakar ko yan tobun-balod sika, ta walay ibaga to kono.”

¹⁹ Binembenan na kapitan so lima to may balolaki, inyarawi to, tan tinepet to, “Anto tay labay mon ibagad siak a?”

²⁰ Inmebat, “Nampapaknaan na saray Judio a kerewen dad sikan paleksaben moy Pablo nabwas, tan iyarap mod Sanidrin. Konwarin labay da nin tepetan a maung na nipaakar ed sikaton dili.

²¹ Balet ag mo ra panisisiaan, ta masoluk ya apataplon lalakiy kaiba ran manaalagar a manabat ed sikato. Sinambaan da ya ag ira mangan o oninom ya anggad ag da napatey. Akaparaan la ra natan. Aalagaren da labat so iyesel mo.”

²² Inkuanto may kapitan, “Ag mo ibabagad siopaman ya impakabat mod siak ya.” Insan to la pinasempet.

Inyakar day Pablo ed kinen Gobirnador Felix

²³ Anawag imay kapitan na duarad saray opisyal to tan inkuanto, “Iparaan yo ya onlad Cesarea so duan lasus a sondalo, a kaiba ray pitomplon akakabayo, tan duan lasus a managpika. Onla kayoy alas nuibi ed sayan labi.

²⁴ Iparaan yo met so pigaran kabayo a loganan nen Pablo, tan iyakar yod kinen Gobirnador Felix.”

²⁵ Insan nansulat imay kapitan ed gobirnador. Onyay imbaga tod sulat:

²⁶ “Nanlapud Claudio Lisias yan sulat a para sika, kagalgalang a Gobirnador Felix: awat moy pabanok.

²⁷ Inerel na saray Judio yan too tan pateyen da la lawari. Akabatan kon mibabaley na Roma manaya, kanyan intagar ko ray sondalo tan inyagel ko.

²⁸ Labay kon naamtaan no antoy ipapakasalanan dad sikato, kanyan imparontal kod saray kabyangay Sanidrin.

²⁹ Nalmoan kon nipaakar ed ganggan day ipapakasalanan dad sikato, balet ag to nepeg so pateyen o ipriso lapud saya.

³⁰ Nen nadngelan kon implano na saray Judio a pateyen da, impaiyakar kon tampol ed sika. Imbagak ed saray mangaakusad sikato a diad sika lay pangisegepan day kaso.”

³¹ Inonur na saray sondalo ray ganggan ed sikara. Inala ray Pablo tan inyakar dan anggad Antipatris.

³² Nen ontumbok ya agew, pinmawil ed kuartil ira may sondalon manaakar, balet atilak ira may akakabayo, ta sikaray angolup ed kinen Pablo.

³³ Kasabi rad Cesarea, inyakad dad gobirnador imay sulat tan impalima ray Pablo ed sikato.

³⁴ Nen abasa nen gobirnador imay sulat, tinepet tod kinen Pablo no taga iner. Nen naamtaan ton taga Cilicia

³⁵ inkuanto, “Bistaen ta ka no onsabi la ray mangaakusad sika.” Insan to impabantayan si Pablo ed palasio nen Herodes.