Saray Gawgawa 22 - Maung A Balita Biblia

¹ “Atateng tan agagi, dengel yo pay ibagak a pangyagel koy laman kon dili!”

² Kadngel dan mansasalita na Hebreo, lalon nandeen ira. Intuloy nen Pablo:

³ “Sakey ak a Judio, nianak ak ed Tarso ed Cilicia, balet dia ak binmaleg ed Jerusalem. Nanaral ak ed kinen Gamaliel, tan malet so inkabangat kod Ganggan da ray lalaki tayo. Maseseg so impanlilingkur kod Dios, a singa gagawaen yon amin a wadya natan.

⁴ Pinapairap kon anggad inaatey iray ontotombuk ed sayan Dalan. Binabalur tan impriprisok ira, bibii man o lalaki.

⁵ Say Pangulon Pari tan saray kabyangay Sanidrin so makapantasin tua yay ibabagak. Initdan da ak na sulat a para saray Judio ed Damasco. Linma ak met nid man a mangerel, mamalur tan mangyakar ed sikara diad Jerusalem a pairapen ira.”

Tinongtong nen Pablo no panoy Impanisia to

⁶ “Nen asingsingger ak lad Damasco, tan ngalngalin alas dosi la, walay silew a nanlapud tawen tan biglan kinmidyam ed kaliber-liber ko.

⁷ Apaktak tan nipasobsob ak ed dalin, insan nadngel koy sakey a bosis a nankuan ed siak, ‘Saulo, Saulo! Akin et papairapen mo ak?’

⁸ Tinepet ko, ‘Siopa ka, Katawan?’ ‘Siak si Jesus a taga Nazaret a papairapen mo,’ ebat to.

⁹ Anengneng da ray kaibak imay silew, balet ag da nadngel may bosis na nansalitad siak.

¹⁰ Tinepet ko, ‘Antoy nepeg kon gawaen, Katawan?’ Inkuanto, ‘Alagey ka, tan lakad Damasco, ta diman nibagad sikay amin a niganan gawaen mo.’

¹¹ Ag ak makanengneng lapud kinaliwawa to may silew, kanyan intabin ak na saray kaibak ya anggad Damasco.

¹² “Walad may sakey a lakin manngaray Ananias. Rilihioso yan too, manusumpal na Ganggan, tan gagalangen na amin a Judion manaayam diman.

¹³ Dinmagod siak, nanalagey ed abay ko, tan inkuanto, ‘Agin Saulo, makanengneng ka la lamet!’ Diad saman a bekta, pinmawil so pakanengneng ko tan ninengneng koy Ananias.

¹⁴ Inkuanto, ‘Pinili kay Dios da ray lalaki tayo a mangamtay linawa to, makanengneng na Masanton Aripen to, tan makadngel na bosis to.

¹⁵ Ta magmaliw kan tasi to a mangibagad amin a katoowan no anto ray anengneng tan arengel mo.

¹⁶ Natan sirin, ag ka la mantatayam-tayam. Alagey ka tan pabinyagan ka, tan paorasan mo ray kasalanan mo diad panamegley na itawag mod ngaran to.’”

Nibakid saray Hintil si Pablo

¹⁷ “Pinmawil ak ed Jerusalem. Nen wala ak ed dalem na Timplo a mampipikasi, walay payawar ed siak.

¹⁸ Anengneng koy Katawan tan inkuantod siak, ‘Aporam! Taynan kan tampol ed Jerusalem, ta ag awaten na saray totoo dia so pantatasim ed siak!’

¹⁹ ‘Katawan,’ ebat ko, ‘amta ran linma ak ed saray sinagoga, impriprisok tan kinakabil ko ray mananisiad sika.

²⁰ Nen pateyen day Esteban a tasim, wadman ak. Inabuloyan koy impamatey dad sikato, tan siak so angasikasod saray kawes da ray amatey ed sikato.’

²¹ Balet inkuan na Katawan, ‘Laka la, ta ibaki ta kad arawidiad kawalaan da ray Hintil.’”

²² Anggad sayan bekta, onderengel iray totood kinen Pablo; balet kabebekta ginapoan day naneeyag-eyag. Inkuanda, “Papateyen itan a klasiy too! Ag to nepeg so mambilay!”

²³ Ag ira tinmondan naneeyag-eyag; nansisibwag iray dabuk ed tagey, tan inwawasiwas da ray kolibemben da.

²⁴ Kanyan ingganggan na samay kapitan ya iyakar day Pablo ed kuartil tan siplatan da, pian naamtaan to no akin et ontan lay paneeyag-eyag da ray Judio a panusumlang ed sikato.

²⁵ Balet nen asumpal da lan binalur a siplatan inkuanen Pablo ed samay opisyal a manalalagey diman, “Akin iyabuloy tay ganggan a nayarian yon siplatan so sakey a mibabaley na Roma ya ag ni asintinsiaan?”

²⁶ Nen nadngel ya na samay opisyal, linmad samay kapitan tan inkuanto, “Antoy gagawaen mo? Mibabaley na Roma manaya man a too!”

²⁷ Kanyan dinmago may kapitan ed kinen Pablo tan tinepet to, “Ibagam pad siak: mibabaley ka tay Roma?” “On,” ebat to.

²⁸ Inkuanto may kapitan, “Balbaleg so agastos ko, pian magmaliw ak a mibabaley na Roma.” Inmebat si Pablo, “Siak balet, nianak ak a mibabaley na Roma.”

²⁹ Inmarawin tampol ira may totoon manimbistiga lawari ed kinen Pablo, tan ataktakot met imay kapitan lapud impabalur toy Pablo, anta sakey manayan mibabaley na Roma.

Inyarap dad Sanidrin si Pablo

³⁰ Labay to may kapitan a naamtaan no anton talagay angakusaan da ray Judio ed kinen Pablo. Kanyan kaimbuas, impaokbaran to tan ingganggan to a mantitipon iray manonan papari tan amin da ray arum a kabyangay Sanidrin. Insan to inyakar si Pablo tan pinaalagey tod arap da.