Saray Bilang 9 - Maung A Balita Biblia

Say Kumadwan Paskua

¹ Diad ononan bulan na kumadwan taon kayariy intaynan na saray totood Israel manlapud Egipto, say Katawan akisalitad kinen Moises diad Kalawakan na Sinai. Inkuanto,

^2-3 “Diad kumalabinapat ya agew na sayan bulan, manlapud kaselek na agew, saray totood Israel silibraan da so Paskua onung ed amin a bilin tan totontonen a nipaakar ed sayan pista.”

⁴ Kanyan imbaga nen Moises ed saray totoo a silibraan da so Paskua.

⁵ Et diad labi na kumalabinapat ya agew na ononan bulan sinilibraan dan tua diad Kalawakan na Sinai. Ginagawa na saray totoo iray amin ya ingganggan na Katawan ed kinen Moises.

⁶ Balet wala ray pigaran lalakin marotak onung ed ganggan lapud akadiwit ira na sakey a bangkay, kanyan ag ira akapibiang ed pistay Paskua ed saman ya agew. Linma rad kindi Moises tan Aaron

⁷ tan kuanda, “Marotak kami lapud akadiwit kami na bangkay, balet akin et ag kami naabuloyan a mangyapay na bagat na Katawan a singa saray arum ya Israelita?”

⁸ Inmebat si Moises, “Manalagar kayo ya anggad naawat ko ray bilin a manlapud Katawan.”

⁹ Diad panamegley nen Moises say Katawan

¹⁰ kuantod saray totood Israel, “No walad sikayo odino saray kabyangay boleg yo so arotakan onung ed ganggan lapud impakadiwit da na bangkay odino nambiahi kayod arawin pasen, balet labay yo nin siansian silibraan so Paskua,

¹¹ naabuloyan kayo a mansilibra kalabas na sakey bulan, diad labi na kumalabinapat agew na kumadwan bulan. Akan yo so kordiro a katekep na tinapay ya anggapoy libadura tan ampait iran pisipising.

¹² Ag kayo mangikekera ed saray kakanen ya anggad ontombuk a kabwasan tan ag yo popoteren so anggan dinan a pokel na samay ayep. Tombuk yoy amin a totontonen diad pansilibra yo na Paskua.

¹³ Siopamay aliwan marotak onung ed ganggan tan ag mambiabiahi balet et ag to silibraan so Paskua, naekal lan kabyangan na saray totook, lapud ag to insaklang ed siak so bagat diad nigetar a panaon. Nepeg a nadusa lapud kasalanan to.

¹⁴ “No say sakey a sangkailin manaayam ed kawalaan yo et labay ton silibraan so Paskua, nepeg ton onuren iray amin a bilin tan totontonen. Nampara so ganggan a para sangkaili tan para Israelita.”

Say Lorem a Singa Apoy

^15-16 Diad agew na impangilira ed Tuldan Ayamay Katawan, sinmabi so lorem tan sinakbungan to. No labi singa apoy imay lorem.

¹⁷ Kapag onatagey la may lorem, iyalis la na saray totood Israel so kampo ra tan ilira da lamet ed abebaan na samay lorem.

¹⁸ Diad ganggan na Katawan iyalis day kampo ra tan diad ganggan to ilira da. Legan ya akasakbung ed Tulda imay lorem ag da iyalis so kampo ra.

¹⁹ Nen abaybayag ya akasakbung ed Tulda imay lorem, inonur da so Katawan tan ag ira inmalis.

²⁰ No maminsan pigay agew labat ya akasakbung ed Tulda imay lorem; mabayag man odino magano, nansiansia ra ed kampo odino inmalis ira, onung ed ganggan na Katawan ed sikara.

²¹ No maminsan samay lorem mansiansia labat manlapud labi ya anggad kabwasan, et onalis la ra no kaatagey na samay lorem. Kapag onatagey imay lorem, onalis ira.

²² Anggan duaran agew, sakey bulan, sakey taon, odino mabayag nen saya so panakbung ed Tulda na samay lorem, ag ira onalis; balet no onatagey, onalis ira.

²³ Inlira tan inyalis day kampo ra diad panangonur dad saray ganggan na Katawan diad panamegley nen Moises.