Saray Bilang 6 - Maung A Balita Biblia

Saray Ganggan a Nipaakar ed saray Nazareo

¹ Say Katawan ingganggan toy Moises

² ya iter to ray onggendan a bilin ed saray totood Israel. Siopamay laki odino bii a manggawa na nidoma-doman sipan a magmaliw a sakey a Nazareo tan isaklang toy sikaton dili ed Katawan,

³ nepeg ya ag balut oninom na alak odino antokaman a makabuek. Ag ton balut oninom na iinomen a ginawad tabul na ubas odino mangan na ubas, o pasas.

⁴ Legan a sikatoy sakey a Nazareo, ag ton balut mangan na antokaman a nanlapud tanaman ya ubas, ya anggan say bokel odino ubak na bungay ubas.

⁵ Legan a sikatoy Nazareo, nepeg ya ag mampakatli odino mambalbas. Diad intiron panaon na inkisaklang tod Katawan nepeg a masanto, tan padokeyen toy buek tan balbas to.

^6-7 Say buek to tanda na inkisaklang tod Dios. Ag to nepeg a dotakan so sikaton dili, kanyan ag nepeg ya onsingger ed bangkay ya anggan say bangkay na ateng odino agi to.

⁸ Legan a sikatoy Nazareo, nisaklang ed Katawan.

⁹ No adotakan so nisaklang a buek na sakey a Nazareo lapud biglan inatey so toon walad abay to, nepeg a manalagar na pitoran agew insan to pakiskisay olo to tan say balbas to; diad ontan magmaliw a malinis onung ed ganggan.

¹⁰ Diad kumawalon agew mangyakar ed pari na duaran palekpek odino duaran malapati diad lolooban na Tuldan Ayamay Katawan.

¹¹ Say pari isaklang ton bagat a para kasalanan so sakey a manok tan isaklang ton bagat a popoolan so sakey, ta gawaen to so sirimonya na panlinis ed sikato lapud impakadiwit tod bangkay. Diad saman lamlamang ya agew samay too pasimbaloen ton isaklang so buek to,

¹² tan isaklang to lamet ed Katawan so panaon to a sakey a Nazareo. Ag nibilang imay imbeneg a panaon to lapud adotakan imay nisaklang a buek to. Mangyakar na sakey taon a kordiro ya isaklang ton bagat a pambayar.

¹³ No say sakey a too et mansamput lay panaon na impangisaklang toy sikaton dili a sakey a Nazareo, gawaen to yan sirimonya. Onla ed lolooban na Tulda

¹⁴ tan iyapay tod Katawan so taloran ayep ya anggapoy deral na laman da: sakey taon a kordiron kalakyan a para bagat a popoolan, sakey taon a kabatyan a kordiron ibagat a para kasalanan, tan sakey taon a karniron kalakyan ya ibagat a para kareenan.

¹⁵ Mangibagat met na sanbaskit a tinapay ya anggapoy libadura: saray makapal a tinapay ya agawa rad arinan inkames ed larak na oliba tan saray maimpis a tinapay a pinoranisan na larak na oliba. Mangisaklang met ni na saray bagat a trigo tan alak.

¹⁶ Say pari iyapay to ra yan amin ed Katawan tan isaklang to may bagat a para kasalanan tan samay bagat a popoolan.

¹⁷ Samay karniron kalakyan iyapay tod Katawan a bagat a para kareenan, tan isaklang ton katekep na samay sanbaskit a tinapay; isaklang to met ira may bagat a trigo tan alak.

¹⁸ Diad lolooban na Tulda kiskisan na samay Nazareo so olo to insan to iyan so buek ed apoy a pakapopoolan na samay bagat a para kareenan.

¹⁹ No alambung lay takeb na samay karniron kalakyan, say pari alaen to tan iyan tod saray lima na samay Nazareo a katekep na sakey a makapal a tinapay tan sakey a maimpis a nanlapu rad samay baskit.

²⁰ Insan say pari iyapay to ran nidoma-doman rigalo ed Katawan; masanton bagat ira a para pari, a kaaruman ira na pagew tan ulpo na samay karniro ya onung ed ganggan et kayaryan ira na pari. Kayari to ya, samay Nazareo nayarin oninom la na alak.

²¹ Sikara yay ganggan a nipaakar ed saray Nazareo, balet no say sakey a Nazareo et isipan ton pasolukan toy sakey a bagat so nepeg ton iyapay onung na inkisaklang to, nepeg ton sumpalen so insipan to.

Say Bindision ya Ikana na Pari

²² Say Katawan ingganggan toy Moises

²³ ya ibaga tod kinen Aaron tan saray lalakin anak to ya ikana ray onggendan a balikas diad pamindision dad saray totood Israel:

²⁴ Bindisionan kayo komun na Katawan tan talimaen to kayo;

²⁵ Abageyen kayo komun na Katawan tan kasian to kayo;

²⁶ Imanoen kayo komun na Katawan tan itdan to kayoy kareenan.

²⁷ Insan say Katawan kuanto, “No ibalikas day ngaran ko a pamindision ed saray totood Israel, bindisionan ko ra.”