Saray Bilang 35 - Maung A Balita Biblia

Saray Siudad a Nipabetang ed saray Levita

¹ Diad saray patar na Moab ed nibaliw na Jordan manlapud Jerico say Katawan kuantod kinen Moises,

² “Ibagam ed saray Israelita a diad saray naawat dan kayaryan nepeg ya itdan da ray Levita na pigaran siudad a panayaman da tan dalin a panagpastolan ed kaliber-liber na saray siudad.

³ Kayaryanen ira ya na saray Levita tan panayaman da ra. Say dalin a panagpastolan et para saray baka ra tan saray arum ya ayayep da.

⁴ Manlapud balang dapag na saray padir na siudad say dalin a panagpastolan et onlaknab a mamapaway na apat a lasus limamplo tan apat a mitro.

⁵ Kanyan walay kuadradon dalin a siam a lasus tan waloran mitro so karokey na balang dapag, tan walad pegley so siudad.

⁶ Nepeg yon itdan iray Levita na anemiran siudad a salimbengan a nayarin batikan na sakey a toon akapatey ya ag to ginagala. Itdan yo ni ra na apataplo tan duan siudad

⁷ a pati say dalin a panagpastolan da; kanyan apataplo tan walon amin a siudad so iter yod sikara.

⁸ Say karakel na siudad da ray Levita ya iter na kapag tribu et ontokuy ed kabaleg na dalin to. Say baleg a tribu dakel so iter to; say melag daiset so iter to.”

Saray Siudad a Salimbengan

^9-10 Say Katawan kuantod saray totood Israel diad panamegley nen Moises: “No nabaliw yo lay Ilog na Jordan tan makaloob kayo lad dalin na Canaan,

¹¹ mamili kayo na saray siudad a salimbengan a nayari ran batikan na toon akapatey, ya ag to ginagala.

¹² Diad siudad a batikan na akapatey ag la nayarin tombuken na kanayon na apatey a labay toy onbawi. Ag nepeg a pateyen so toon naakusan amatey no ag ni asalaysay ed arap na karaklan.

¹³ Mamili kayo na anemiran siudad,

¹⁴ talora ed bokig na Jordan tan talora ed dalin na Canaan.

¹⁵ Sikara so siudad a salimbengan na saray Israelita tan saray sangkailin magano ra labat odino mansiansia ran manayam ed kawalaan yo. Siopamay makapatey ya ag to ginagala et nayarin ombatik ed sarayan siudad.

^16-18 “Balet no say sakey a too et mangikana na armas a balatyang odino bato odino kiew ed pamatey to, mankasalanan lapud impakapatey toy too, kanyan nepeg a pateyen.

¹⁹ Say sankaasinggeran a kanayon na pinatey so akaoley a mamatey na samay amatey. No narumog to, nepeg a pateyen to.

²⁰ “No kabosul na sakey a too so siopaman tan napatey to diad pangitulak to odino panupak tod sikato

²¹ odino pamoniti to, sikatoy mankasalanan lapud impakapatey toy too, kanyan nepeg a pateyen. Say sankaasinggeran a kanayon na pinatey so akaoley a mamatey na samay amatey. No narumog to, nepeg a pateyen to.

²² “Balet no bilang ag ginagalan napatey na sakey a too so siopaman ya ag to kabosul, lapud impakapangitolak to odino lapud impakatupak to,

²³ odino lapud andi-nengnengen a pangitupak to na bato et napatey toy sakey a toon ag to ginetman pasakitan tan ag to kalaban,

²⁴ say karaklan et nepeg ya ag da pankasalananen imay toon akapatey tan ag da nepeg a pilaan so toon labay toy ombawi a kanayon to may napatey.

²⁵ Say karaklan et nepeg ya iyagel dad kanayon na samay toon napatey imay toon makapatey, kanyan nepeg dan ipawil ed siudad na salimbengan a binatikan to la. Nepeg a manayam diman ya anggad ipatey na Pangulon Pari ed saman a panaon.

²⁶ No taynan na toon akapatey so siudad na salimbengan a binatikan to,

²⁷ et pinatey na akarumog ed sikaton kanayon na samay apatey to, sayan bales et aliwan kasalanan na impakapatey ed sakey a too.

²⁸ Samay toon nankasalanan na impakapatey nepeg a manayam ed siudad na salimbengan ya anggad ipatey na Pangulon Pari, balet kapatey to nayarian to lay onsempet.

²⁹ Sarayan totontonen et onkanad sikayo tan saray kabyangay boleg yo, anggan iner so panayaman yo.

³⁰ “Say toon naakusa lapud impakapatey toy too et nayari labat a sintinsiaan a nankasalanan tan pateyen diad panamegley na pantasi na duara odino masoluk a duaran too; say sakey a tasi et aliwan magenap a mamaneknek na impakapatey ed sakey a too.

³¹ Say toon mamatey na kapara ton too et nepeg a pateyen. Ag nayarin paliisan toy dusa na kasalanan to diad pambayar to na kuarta.

³² No say sakey a too et batik ed sakey a siudad a salimbengan, ag yo aabuloyan a mambayar pian makasempet la kasakbayan na ipatey na Pangulon Pari.

³³ No pambayaren yo, dotakan yoy dalin a panayaaman yo. Ta say pamatey na too et dotakan toy dalin, tan likud ed pamatey ed toon amatey anggapoy sirimonya a nayarin gawaen a makapanlinis ed dalin ya impamateyan ed sakey a too.

³⁴ Ag yo dodotakan so dalin a panaayaman yo, lapud siak so Katawan tan manaayam ak ed kawalaan yon totood Israel.”