Saray Bilang 31 - Maung A Balita Biblia

Say Masanton Bakal sumpad Madian

¹ Say Katawan kuantod kinen Moises,

² “Dusam iray taga Madian lapud ginawa ra ed saray totood Israel. Kasumpal mon gawaen itan, ompatey ka la.”

³ Kanyan inkuanen Moises ed saray totoo, “Mamparaan kayon mibakal, pian nayarian yon dogpaan iray taga Madian et nadusa yo ra lapud ginawa ra ed Katawan.

⁴ Mangibaki na sanlibon lalakin mibakal so kapag tribu na Israel.”

⁵ Kanyan sanlibon lalaki so apili ed kapag tribu; labinduan libo ya amin iray lalakin akaparaan a mibakal.

⁶ Si Moises imbaki to ran mibakal diad panangipangulo nen Finees a lakin anak nen Eleazar a pari, tan sikatoy makaoley ed saray masanton bengatla tan saray trumpita a mangiter na saray tanda.

⁷ Dinogpaan day Madian onung na ingganggan na Katawan ed kinen Moises tan pinatey da ray amin a lalaki,

⁸ pati saray limaran ari na Madian a di Evi, Rekem, Zur, Hur, tan Reba. Pinatey da met si Balaam a lakin anak nen Beor.

⁹ Saray totood Israel et dinadakep da ray bibii tan saray ogogaw a taga Madian, inaala da ray baka ra tan saray karniro ra, tan sinasamsam da ray amin a kayamanan da.

¹⁰ Pinopoolan da ray amin a siudad da tan saray kampo ra.

¹¹ Inala da ray amin ya asamsam da, pati saray adakep dan priso tan saray ayayep,

¹² insan da ra inyakar ed kindi Moises tan Eleazar tan saray arum ya Israelita, a wala rad kampo diad saray patar na Moab diad nibaliw na Jordan manlapud Jerico.

Pinmawil iray Sondalo

¹³ Si Moises, si Eleazar, tan arum nin pangulo na saray Israelita et pinmaway irad kampo a mangabet ed saramay sondalo.

¹⁴ Akapasnuk si Moises ed saray opisyal, saray pangulo na tunggal libo tan tunggal lasus a sondalo a pinmawil ira kayari ran akibakal.

¹⁵ Tinepet tod sikara, “Akin et ag yo pinatey iray bibii?

¹⁶ Nepeg yon nunoten a saray bibii so inmoonur ed saray bilin nen Balaam tan, diad Peor, inggolo da ray totoo ya onsumpad Katawan. Sikatoy makasengeg a dinmalan so salot ed saray totoo na Katawan.

¹⁷ Kanyan natan patey yo ray amin a lalakin ogogaw tan saray bibiin asali da lay akiakdul.

¹⁸ Balet ag yo papateyen iray bibiin ogogaw tan saray mamarikit, ta ala yo ran para sikayo.

¹⁹ Natan amin yo ya akapatey na siopaman odino aniwit na bangkay et nepeg a manayam a pitoy agew ed paway na kampo. Diad kumatlo tan diad kumapiton agew linisan yoy sikayon dili onung ed ganggan tan saray bibiin adakep yo.

²⁰ Nepeg met a linisan yo onung ed ganggan so balang kawes tan amin a bengatlan ginawad katat, bagoy kanding, odino kiew.”

²¹ Si Eleazar a pari kuantod saray lalakin pinmawil a nanlapud bakal, “Saraya so totontonen ya inter na Katawan ed kinen Moises.

^22-23 Amin a bengatlan ag napoolan a singa balituk, pilak, gansa, balatyang, lata, odino ismay et nepeg a nalinisan onung ed ganggan diad pangipadalan ed apoy. Saray arum nin bengatla nepeg a nalinisan na danum.

²⁴ Diad kumapiton agew nepeg yon ipesak so kawes yo et diad ontan nalinisan kayo onung ed ganggan tan nayarian yo lay onloob ed kampo.”

Say Panagapag ed Asamsam

²⁵ Say Katawan kuantod kinen Moises,

²⁶ “Sika tan si Eleazar tan saray arum a pangulo da ray totoo et nepeg a bilangen yo ray amin ya adakep, pati saray priso tan saray ayayep.

²⁷ Pankadua yo ra; say kapaldua betang na saray sondalo tan saray kapaldua betang na saray totoo.

²⁸ Diad betang da ray sondalo mamawas kay buis a para Katawan, sakey a priso ed kapag limanlasus; ontan met so gawaen mod saray baka, asno, karniro, tan kanding.

²⁹ Iter mo ra ed kinen Eleazar a pari a nidoma-doma ran rigalo ed Katawan.

³⁰ Diad betang da ray totoo, mamawas ka na sakey a priso ed kapag limamplo; ontan met so gawaen mod saray baka, asno, karniro, tan kanding. Iter mo rad saray Levita a makaoley ed Tulda na Katawan.”

³¹ Ginawa di Moises tan Eleazar so ingganggan na Katawan.

^32-35 Say onggendan et say listaan na saray adakep na saray sondalo, a kaaruman ira na saray inaala ran kayaryan para sikara: anem a lasus, pitomplo tan liman libon karniro tan kanding, pitomplo tan duan libon baka, anemamplo tan sakey a libon asno, tan talomplo tan duan libon mamarikit.

^36-40 Say kapalduan betang na saray sondalo et talon lasus, talomplo tan piton libo tan limanlasus a karniro tan kanding a say binawas a buis a para Katawan et anem a lasus, pitomplo tan lima; talomplo tan anem a libon baka a say binawas a buis a para Katawan et pitomplo tan dua; talomplon libo tan limanlasus ya asno a say binawas a buis a para Katawan et anemaplo tan sakey; tan labinanem a libon mamarikit a say binawas a buis a para Katawan et talomplo tan dua.

⁴¹ Kanyan inter nen Moises ed kinen Eleazar yan buis a nidoma-doman rigalo ed Katawan, onung na ingganggan na Katawan.

^42-46 Say betang da ray totoo et kapara na betang na saramay sondalo: talon lasus, talomplo tan piton libo tan limanlasus a karniro tan kanding, talomplo tan anem a libon baka, talomplon libo tan liman lasus ya asno, tan labinanem a libon mamarikit.

⁴⁷ Diad sayan betang amawas si Moises na sakey a priso ed kapag limamplo; onya met so ginawa tod saray ayayep. Onung ed ganggan na Katawan, inter to rad saray Levita a makaoley irad Tulda na Katawan.

⁴⁸ Insan saray opisyal ya angipangulo ed saray sondalo linma rad kinen Moises

⁴⁹ tan inkuandad sikato, “Binilang mi ray sondalon ipapangulo mi et anggapoy anggan sakey a naandi.

⁵⁰ Kanyan inaawit mi ra diay balituk ya alahas, saray pulsiras, saray singsing, saray ikaw, tan saray kolintas ya inaala na balang sakey ed sikami. Iyapay mi ra ed Katawan a bayar ira na bilay mi, pian iyagel to kami.”

⁵¹ Inawat di Moises tan Eleazar ira may amin ya alahas a balituk.

⁵² Say belat na amin ya inrigalo na saramay opisyal et sanlasus tan walomplon kilo.

⁵³ Saray aliwan opisyal et insisinup da lan kayaryan iray asamsam da.

⁵⁴ Kanyan si Moises tan si Eleazar inyakar dad Tulda ira may balituk, pian iyagel na Katawan iray totood Israel.