Saray Bilang 28 - Maung A Balita Biblia

Saray Inagew-agew a Bagat

¹ Say Katawan ingganggan toy Moises

² a bilinen to ray Israelita a mangyapay irad Dios diad saray niganan panaon na saray bagat a popoolan a makapaliket ed sikato.

³ Saraya so bagat a popoolan ya iyapay yod Katawan: para bagat ya inagew-agew, duaran sakey taon a kordiron kalakyan ya anggapoy deral na laman da.

⁴ Iyapay yod kabwasan so ononan kordiro tan diad labi say kumadwan kordiro.

⁵ Kapag sakey ed sikara katekep to so sakey kilon arina a nikames ed sakey litron sankaabigan a larak na oliba.

⁶ Sikatoy inagew-agew a bagat a poolan, inmonan nibagat a popoolan diad Palandey na Sinai, tan makapaliket ed Katawan so balingit to.

⁷ Singa inkisaklang na bagat ya alak a katekep na onaan a kordiro, mangikalbo kayod altar na sakey a litron alak.

⁸ Diad labi iyapay yoy kumadwan kordiro a singa say bagat ed kabwasan a katekep toy bagat ya alak. Sikato met so bagat a popoolan a makapaliket ed Katawan so balingit to.

Say Bagat no Agew na Panagpainawa

⁹ Diad Agew na Panagpainawa mangyapay kayo na duaran sakey taon a kordiron kalakyan ya anggapoy deral na laman da, duaran kilon arina a nikames ed larak na oliba a sikatoy bagat a trigo, tan say bagat ya alak.

¹⁰ Sayan bagat a popoolan et isaklang kapag Agew na Panagpainawa tan kaaruman na bagat ya inagew-agew a katekep toy bagat ya alak.

Say Bagat ed Ononan Agew na Kapag Bulan

¹¹ Iyapay yod Katawan so bagat a popoolan diad ononan agew na kapag bulan: duaran malangwer a bakan kalakyan, sakey a karniron kalakyan, pitoran sakey taon a kordiron kalakyan; nepeg ya anggapoy deral na laman da.

¹² Mangyapay kayoy arinan nikames ed larak na oliba a sikatoy bagat a trigo: kapag sakey a bakan kalakyan tekepan yo na taloran kilon arina; samay karniron kalakyan, duaran kilon arina;

¹³ tan kapag sakey a kordiro, sakey a kilon arina. Bagat ira yan popoolan a makapaliket ed Katawan so balingit da.

¹⁴ Say manepeg a bagat ya alak et duaran litron alak ya itekep ed kapag sakey a bakan kalakyan, sakey tan kapalduan litro ed kapag sakey a karniron kalakyan, tan sakey a litro ed kapag sakey a kordiro. Sikato ya so totontonen a para bagat a popoolan ya isaklang ed ononan agew na kapag bulan ed intiron taon.

¹⁵ Mangisaklang kayo na sakey a kanding a kalakyan ya ibagat a para kasalanan a sikatoy kaaruman na inagew-agew a bagat a popoolan a katekep toy bagat ya alak.

Saray Bagat no Pistay Tinapay ya Anggapoy Libadura

¹⁶ Say Pista na Paskua a pamagalang ed Katawan et gawaen ed kumalabinapat agew na ononan bulan.

¹⁷ Diad kumalabinliman agew onggapo so pitoran agew a pista tan legan to ya say tinapay ya anggapoy libadura labat so nayarin kanen.

¹⁸ Diad ononan agew na pista nepeg a mantitipon kayon mangigalang, tan nepeg ya anggapoy kimey a gawaen.

¹⁹ Mangyapay kayod Katawan na sakey a bagat a popoolan: duaran malangwer a bakan kalakyan, sakey a karniron kalakyan, tan pitoran sakey taon a kordiron kalakyan; nepeg ya anggapoy deral na laman da.

²⁰ Mangyapay kayo na manepeg a bagat a trigo, say arinan nikames ed larak na oliba; kapag sakey a bakan kalakyan tekepan yo na taloran kilon arina, kapag sakey a karniron kalakyan duaran kilon arina,

²¹ tan kapag sakey a kordiro, sakey kilon arina.

²² Mangyapay kayo met na sakey a kanding a kalakyan a sikatoy bagat a para kasalanan, et diad onya nagawa so sirimonyan panlinis ed saray totoo.

²³ Isaklang yo ra ya a kaaruman na kinabwasan a bagat a popoolan.

²⁴ Onya met so pangisaklang yon pitoy agew ed Katawan na sakey a bagat a popoolan a makapaliket ed Katawan so balingit to. Iyapay yo ya a kaaruman na inagew-agew a bagat a popoolan tan say bagat ya alak.

²⁵ Mantitipon kayon mangigalang ed Dios diad kumapiton agew tan ag kayo mankikimey.

Saray Bagat no Pistay Panagani

²⁶ Diad ononan agew na Pistay Panagani, no mangyapay kayod Katawan na bagat a balon trigo nepeg a mantitipon kayon mangigalang ed Dios tan ag kayo mankikimey.

²⁷ Mangisaklang kayo na bagat a popoolan a say balingit to et makapaliket ed Katawan: duaran kilaw a bakan kalakyan, sakey a karniron kalakyan, tan pitoran sakey taon a kordiron kalakyan; nepeg ya anggapoy deral na laman da.

²⁸ Mangyapay kayo na manepeg a bagat a trigo, say arinan nikames ed larak na oliba: kapag sakey a bakan kalakyan tekepan yo na taloran kilon arina, samay karniron kalakyan duaran kilon arina,

²⁹ tan kapag sakey a kordiro sakey kilon arina.

³⁰ Mangyapay kayo met na sakey a kanding a kalakyan a sikatoy bagat a para kasalanan, et diad onya nagawa so sirimonyan panlinis ed saray totoo.

³¹ Isaklang yo ra ya tan saray bagat ya alak a kaaruman na inagew-agew a bagat a popoolan tan say bagat a trigo.