Saray Bilang 23 - Maung A Balita Biblia

¹ Inkuantod kinen Balak, “Igawaan mo ak dia na pitoran altar, tan iyakaran mo ak na pitoran bakan kalakyan tan pitoran karniron kalakyan.”

² Ginawa nen Balak so nibagad sikato, insan angibagat iran dua nen Balaam na sakey a bakan kalakyan tan sakey a karniron kalakyan diad kapag altar.

³ Insan inkuanen Balaam ed kinen Balak, “Manalagey ka diad abay na isasaklang mon bagat a popoolan, ta nengnengen ko no kasi abeten ak na Katawan o andi. Ibagak ed sika so antokaman ya ipaamta tod siak.” Kanyan linman bukor ed toktok na sakey a pokdul,

⁴ et inabet diman na Dios. Inkuanen Balaam ed Dios, “Amaalagey ak na pitoran altar tan angibagat ak na sakey a bakan kalakyan tan sakey a karniron kalakyan ed kapag altar.”

⁵ Imbaga na Katawan ed kinen Balaam no antoy salitaen to tan imbaki to la ed kinen Balak pian nasalita toy papaibaga tod sikato.

⁶ Kanyan pinmawil si Balaam et asabian toy Balak a manalalagey ni ed abay na isasaklang ton bagat a popoolan tan kaiba to rad may amin a pangulo na Moab.

⁷ Imbalikas nen Balaam so sayan propisiya: “Manlapud Aram ed nibokig iran kapalandeyan Impaawit ak nen Balak ya ari na Moab. Inkuanto, ‘Gala, ta isalitaan mo ak, Isamban iray Israelita.’

⁸ Panon kon isamba so ag insamba na Dios, Odino paogesen so ag pinaoges na Katawan?

⁹ Manlapud tagey na kapokdulan nanengneng ko ra; Manlapud kapokdulan nabantag ko ra. Sakey iran bansan mambibilay a mambukbukor; Amta ra a magmaung niy inkabindisionan da nen saray arum a bansa.

¹⁰ Singa karakel na dabuk so karakel na saray Israelita. Diad gaway karakel da ag ira nabilang. Ompatey ak komun a sakey a matonung, Mangangga komuy bilay ko a sakey ed saray totoo na Dios.”

¹¹ Insan si Balak kuantod kinen Balaam, “Antoy ginawam ed siak? Inawit ta ka dian mangisamba ed saray kalaban ko, balet binindisionan mo ra lalaingen.”

¹² Inmebat si Balaam, “Say nayarin salitaen ko labat say papaibagad siak na Katawan.”

Say Kumadwan Propisiya nen Balaam

¹³ Insa inkuanen Balak ed kinen Balaam, “Mila kad siak ed sananey a pakabantagan mo na pigara labat ya Israelita. Manlapud man isambam ira para siak.”

¹⁴ Intagar tod alog na Zofim diad toktok na Palandey na Pisga. Nanggawa met diman na pitoran altar, insan angibagat na sakey a bakan kalakyan tan sakey a karniron kalakyan ed kapag altar.

¹⁵ Inkuanen Balaam ed kinen Balak, “Manalagey ka diad abay na isasaklang mon bagat a popoolan ta banaen koy Dios diman.”

¹⁶ Inabet na Katawan si Balaam, imbaga to no antoy salitaen to, tan imbaki to la ed kinen Balak pian nasalita toy papaibaga tod sikato.

¹⁷ Kanyan pinmawil si Balaam et asabian toy Balak a manalalagey ni ed abay na isasaklang ton bagat a popoolan, tan kaiba to rad may pangulo na Moab. Tinepet nen Balak no anto so imbaga na Katawan,

¹⁸ et imbalikas nen Balaam yan propisiya: “Gala, Balak a lakin anak nen Zippor Ta dengel moy ibagak.

¹⁹ Say Dios et aliwan singa saray totoo a mantila; Aliwan singa too a mangoman na kanunotan to. No antoy insipan to tooren to; No antoy imbaga to sumpalen to.

²⁰ Niganggan ak a mamindision, Et no mamindision so Dios, ag ko nayarin babawien.

²¹ Nanengneng kon say arapen na Israel Et anggapoy gunigon odino kakapoyan. Kaolup da so Katawan a Dios da; Ibabawag da a sikatoy ari ra.

²² Say Dios impaway to ra manlapud Egipto; Singa bakad katakelan a mibabakal para sikara.

²³ Anggapoy panamalikdo odino panagsalamangka diad pananulong na maoges ya ispiritu A makasumpa ed bansan Israel. Natan saray totoo ikuanda nipaakar ed Israel. ‘Nengneng yo no antoy ginawa na Dios!’

²⁴ Say bansan Israel et singa masebeg a lion: Ag mandeen anggad abuag to lay narel to, Anggad nainom to lay dala na apatey to.”

²⁵ Insan si Balak kuantod kinen Balaam, “No ag mo ra labay ya isamba, ag mo met sirin ira bibindisionan!”

²⁶ Inmebat si Balaam, “Ag ko ta la imbagad sika a no antoy imbaga na Katawan et sikatoy gawaen ko?”

Say Kumatlon Propisiya nen Balaam

²⁷ Inkuanen Balak, “Gala, ta onla tad arum a pasen. Ag la pigan manlapud man say Dios abuloyan to kan mangisambad sikara para siak.”

²⁸ Kanyan intagar toy Balaam ed toktok na Palandey na Peor a tantandagan toy kalawakan.

²⁹ Inkuanen Balaam ed kinen Balak, “Igawaan mo ak dia na pitoran altar tan iyakaran mo ak na pitoran bakan kalakyan tan pitoran karniron kalakyan.”

³⁰ Ginawa nen Balak so nibagad sikato, insan angibagat na sakey a bakan kalakyan tan sakey a karniron kalakyan diad kapag altar.