Saray Bilang 22 - Maung A Balita Biblia

Impaawit na Ari na Moab si Balaam

¹ Inmalis iray Israelita tan nankampo ra ed saray patar na Moab diad bokig na Jordan tan kasumbaliwan na Jerico.

² Nen say ari na Moab a si Balak a lakin anak nen Zippor et nadngelan toy ginawa na saray Israelita ed saray Amorreo tan no panoy karakel da,

³ mapalaloy inkataktakot to, pati saray amin a totoo to.

⁴ Saray Moabita kuandad saray pangulo da ray Madianita, “Ag mabayag sayan olup na totoo et deralen day amin a walad kaliber-liber tayo, a singa ra bakan kalakyan a mankakabkab na dikad pastolan.” Kanyan si Ari Balak

⁵ angibaki na pigaran totoo ed kinen Balaam a lakin anak nen Beor; si Balaam walad Petor ya asingger ed Ilog na Eufrates diad dalin na Amaw. Saya so impaibaga nen Balak ed sikato; “Labay kon ipaamtad sika a walay sakey a bansan sinmabi a nanlapud Egipto; onkakayat ed amin a pasen iray totoo to tan ngalngali da la sakopay dalin mi.

⁶ Dakel ira nen say sikami kanyan ipangasim pan isamban ira para siak. Diad ontan natalo mi ra angangko tan napataynan mi ra ed paway na dalin. Amtak a no mamindision kay too, nabindisionan a tua, tan no mangisamba kay too, nisamban tua.”

⁷ Kanyan saray pangulo da ray Moabita tan saray Madianita inawit da so bayar na samba, linma ra ed kinen Balaam, tan imbaga rad sikato so papaibaga nen Balak.

⁸ Inkuanen Balaam ed sikara, “Ogip kayo la diad sayan labi, et nabwas ibagak ed sikayo so salitaen na Katawan ed siak.” Kanyan naogip lad kawalaan nen Balaam ira may pangulo da ray Moabita.

⁹ Linmad kinen Balaam so Dios tan tinepet to, “Siopa ra yay totoon kaibam natan?”

¹⁰ Inmebat si Balaam, “Imbaki ra ed siak nen Ari Balak na Moab ta ibaga rad siak

¹¹ a wala ray totoon nanlapud Egipto a kinmayat la ra ed intiron dalin. Papaisamba to rad siak a para sikato, pian nayarian to ran bakalen tan pataynanen.”

¹² Say Dios kuantod kinen Balaam, “Ag ka mimilad sarayan totoo, tan ag mo isasamba ray Israelita, ta walad sikara so bindision ko.”

¹³ Diad kaimbuas dinago nen Balaam ira may imbaki nen Balak tan kuanto, “Sempet kayo la ta ag iyabuloy na Katawan a mila ak ed sikayo.”

¹⁴ Kanyan pinmawil irad kinen Balak tan imbaga rad sikato ya ag labay nen Balaam so milad sikara.

¹⁵ Insan si Balak angibaki na dakdakel nin pangulo nen saramay akaonan imbaki tan atagey ni so kipapasen da.

¹⁶ Linma rad kinen Balaam tan sinalita rad sikato so papaibaga nen Balak: “Ag mo kari aabuloyan a nabaat na antokaman so iyakar mo diad siak!

¹⁷ Tumangan ta ka na baleg a kagalangan tan gawaen ko so amin ya ibagam. Gala dia kari tan isambam ira yan totoo para siak.”

¹⁸ Balet inmebat si Balaam, “Anggan iter ed siak nen Balak iray amin a pilak tan balituk na palasio to, ag kon balut nayarian a sumlangen so anggan sankamelagan a ganggan na Katawan a Dios ko.

¹⁹ Balet ogip kayo ni dia a singa ginawa na saramay inmona, pian naamtaan ko no wala o anggapo kasi so arum a labay ya ibaga na Katawan ed siak.”

²⁰ Diad saman a labi say Dios linmad kinen Balaam tan kuanto, “No sarayan lalaki et kerewen dan mila kad sikara, mamparaan kan mila, balet gawam labat so ibagak ed sika.”

²¹ Kanyan kaimbuas si Balaam kinmabayod asno to tan akilad saramay pangulo da ray Moabita.

Si Balaam tan say Asno to

²² Akapasnuk so Dios ta mimilay Balaam ed saramay pangulo. Nen mangabkabayo si Balaam ed asno to a kaolup na duaran aripen to, nanalagey ed dalan so anghil na Katawan ta sinaraan to so dalan nen Balaam.

²³ Nen samay asno et anengneng to may anghil a manalalagey diman a sankaegnaan toy sakey ya ispada, sinmipa tan amaarap ed kaalogan. Nilewet nen Balaam imay asno tan pinaarap tod dalan.

²⁴ Insan samay anghil nanalagey ed mainget a partiy dalan diad nanleetan na duaran kaubasan tan apadir na bato so balang dapag.

²⁵ Nen anengneng na samay asno imay anghil, ginmilig ed padir et apildit so sali nen Balaam. Nilewet lamet nen Balaam imay asno.

²⁶ Samay anghil inonaan to ra lamet ed dalan; nanalagey ed mainget a partiy dalan ya anggapon balut so napaliisan ed anggan iner a dapag.

²⁷ Diad saya, nen anengneng na samay asno imay anghil, dinmokul imay asno. Akapasnuk si Balaam kanyan nilewet tan pinekpek to na baston to.

²⁸ Insan say Katawan initdan to na pakayarin makasalita imay asno, tan kuantod kinen Balaam, “Antoy ginawak ed sika? Akin et pinekpek mo ak ya amitlo?”

²⁹ Inmebat si Balaam, “Lapud lolokoen mo ak! No walay ispadak pinatey ta ka la.”

³⁰ Inmebat imay asno, “Ag ta asno mo ak a gendat lan luluganan mo? Onya tay ginagawak ed sika nen saman?” “Andi,” ebat nen Balaam.

³¹ Insan say Katawan inabuloyan toy Balaam a nanengneng to may anghil a manalalagey a sankaegnaan toy sipada to; et intiblak nen Balaam ed dalin.

³² Inkuanto may anghil, “Akin et amitlom a pinekpek yay asnom? Linma ak diad mamaat na kurang mo, lapud ag ka nepeg a mila.

³³ Balet anengneng ak na asnom kanyan amitlon sinmipad dalan. No ag sinmipad dalan apatey ta ka la tan inabuloyan kon nambilay so asnom.”

³⁴ Inmebat si Balaam, “Nankasalanan ak. Ag ko amta a manalalagey kad dalan a mamaat ed siak; balet natan no isisipen mon makapoy ya ituloy koy mila, ompawil ak la.”

³⁵ Balet inkuan na samay anghil, “Mila kad sarayan totoo, balet salitam labat so paibagak ed sika.” Kanyan intuloy nen Balaam so akilad sikara.

Maliket ya Inawat nen Balak si Balaam

³⁶ Nen nadngelan nen Balak ya onsasabi lay Balaam, nila ton inabet ed Ar, sakey a siudad a walad gilig na Ilog na Arnon diad ketegan na Moab.

³⁷ Inkuanen Balak ed sikato, “Akin et ag ka akila ed saramay inmonan imbakik? Abaloan mo, ag ta ka nayarian a tumangan na manepeg a kagalangan?”

³⁸ Inmebat si Balaam, “Ag ta wadya ak la natan? Balet antoy pakayarin walad siak? Salitaen ko labat natan so paibagad siak na Dios.”

³⁹ Kanyan akilay Balaam ed kinen Balak ya anggad baley na Huzot,

⁴⁰ a dimay amatasan nen Balak na saray baka tan karniro insan to initdan na karni si Balaam tan saramay pangulon kaiba to.

Say Onaan a Propisiya nen Balaam

⁴¹ Diad kaimbuas intagar nen Balak si Balaam ed Bamot-baal ta manlapud man a pasen nabantag nen Balaam iray arum a kabyangan na saray totood Israel.