Saray Bilang 16 - Maung A Balita Biblia

Say Insumpa di Core, Datan, tan Abiram

^1-2 Si Core, a lakin anak nen Izar tan sakey a Levitan kabyangay boleg nen Coat, et sinmumlang ed kinen Moises. Akigampid sikato ray taloran kabyangay tribu nen Ruben a di Datan tan Abiram a lalakin anak nen Eliab, tan si On a lakin anak nen Pelet. Ontan met, akigampid sikara iray arum a duanlasus tan limamplon Israelita a bantug iran pangulon pinili na saray katoowan.

³ Nantitipon ira ed arap di Moises tan Aaron tan kuandad sikara, “Nalalabas kayo la! Amin da ray totood Israel et kayaryan ira na Katawan, tan oolupen itayon amin na Katawan. Akin sirin, Moises, et ipapasen moy sikan dili ya atagey nen saray amin a katoowan?”

⁴ Nen nadngel ya nen Moises, intiblak tod dalin so laman to tan nampikasi.

⁵ Insan inkuantod kinen Core tan saramay kagampi to, “Nabwas na kabwasan say Katawan ipanengneng tod sikatayo no siopa ray kayaryan to; abuloyan to so siopaman a kayaryan to, salanti say pinili to, ya onsingger ed sikato ed altar.

^6-7 Nabwas na kabwasan sika, Core, tan saray kagampim et mangala kayo na saray pananginay insinso, kargaan yo ra na ngalab tan insinso, tan iyakar yo ra ed altar. Diad satan nanengneng tayo no siopad sikatayo so pinili na Katawan. Sikayo ran Levita so talagan nalalabas la!”

⁸ Intuloy nen Moises so nansalita ed kinen Core, “Dengel kayo, sikayon Levita!

⁹ Leleglemewen yo so impangibiig ed sikayo na Dios na Israel ed saray arum ya Israelita, pian makaasingger kayod sikato, nagawaan yoy kimey yo ed Tuldan Ayamay Katawan, tan makapanlingkur kayo ed saray katoowan?

¹⁰ Inter to yan kagalangan ed sika, Core, tan arum ni ran Levita—et natan labay yo ni so magmaliw a papari!

¹¹ No manriklamo kayo a sumpad kinen Aaron, say Katawan a talaga so susumlangen yo, sika tan saray kagampim.”

¹² Insan impaawit nen Moises ira di Datan tan Abiram, balet kuanda, “Ag kami ondago!

¹³ Ag ka ta ni nakda ed impangipaway mod sikami manlapud mataban dalin na Egipto pian napatey mo kami diad kalawakan? Oleyan mo kami ni?

¹⁴ Talagan ag mo kami inyakar ed mataban dalin odino initdan na kaalogan tan kaubasan, et natan labay mo kami nin palikdoen. Ag kami ondago!”

¹⁵ Akapasnuk si Moises kanyan kuantod Katawan, “Ag mo pa aawaten so antokaman ya ibagat na sarayan totoo. Anggapoy ginawak a makapoy ed siopaman ed sikara; anggapoy inalak ya anggan sakey ed saray asno ra.”

¹⁶ Inkuanen Moises ed kinen Core, “Nabwas sika tan saray kagampim a duanlasus tan limamplo et nepeg ya onla kayod Tuldan Ayamay Katawan; onlad man met si Aaron.

¹⁷ Balang sakey ed sikayo et awiten to so pananginan to na insinso, kargaan to na insinso, tan iyapay to ed altar.”

¹⁸ Kanyan balang sakey ed sikara inala toy pananginan to na insinso, kinargaan to na ngalab tan insinso, insan nanalagey ed lolooban na Tulda a kaiba toy Moises tan si Aaron.

¹⁹ Insan si Core tinipon to ray amin ya Israelita, tan nanalagey iran akaarap ed kindi Moises tan Aaron diad lolooban na Tulda. Kabebekta pinmatnag ed amin a katoowan so kagalangan na Katawan;

²⁰ insan say Katawan kuantod kindi Moises tan Aaron,

²¹ “Arawian yo ra yan totoo, ta deralen ko ran tampol.”

²² Balet di Moises tan Aaron dinmakmomo ra ya anggad dalin tan kuanda, “O Dios, sika so nanlapwan na amin a bilay. No mankasalanan so sakey a too, mampasnuk ka kasi ed amin a totoo?”

²³ Say Katawan kuantod kinen Moises,

²⁴ “Ibagam ed saray totoo ya onarawi ra ed saray tulda di Core, Datan, tan Abiram.”

²⁵ Insan si Moises tan saray pangulo na Israel linma ra ed kindi Datan tan Abiram.

²⁶ Inkuanen Moises ed saray totoo, “Arawian yo ray tulda na sarayan maoges a totoo tan ag yo didiwiten so antokaman a kayaryan da. Ta no diwiten yo, nakaiba yo ran naandipat lapud saray amin a kasalanan da.”

²⁷ Kanyan saramay totoo inmarawi ra ed saray tulda di Core, Datan, tan Abiram. Pinmaway ira di Datan tan Abiram tan nanalagey ira ed lolooban na saray tulda ra a kaiba da ray kaasawaan da tan saray anak da.

²⁸ Inkuanen Moises ed saray totoo, “Onya so pakapikabat yo a say Katawan so angibaki ed siak a manggawa na sarayan amin a bengatla tan ag ko kaliktan a gawaen ira.

²⁹ No sarayan totoo et ompatey ira ya aliwan lapud panusa na Dios ed sikara, mapatnag ya ag ak imbaki na Katawan.

³⁰ Balet no say Katawan et manggawa na bengatlan ag nin balut nadngelan, ta onsangi so dalin tan akmunen to ran amin a pati saray kayaryan da, et onla ran mabilay ed pasen a panaayaman da ray inaatey, naamtaan yo a sarayan totoo et impolisay day Katawan.”

³¹ Kayari nen Moises a nansalita, say dalin a panaalageyan di Datan tan Abiram et sinmangi

³² tan inakmun to ra tan saray kabyangay pamilya ra; ontan met ed saray amin a kagampi nen Core tan saray kayaryan da.

³³ Ontan sirin mabilay iran linma ed pasen a panaayaman da ray inaatey a pati saray kayaryan da. Kinmopit imay dalin a sinmangin angakmun ed sikara, et naandipat ira.

³⁴ Amin da ray totood Israel a wadman et batik ira nen nadngel day akis da. Inmeyag ira, “Batik kayo! Ompan akmunen itayo met na dalin!”

³⁵ Insan say Katawan angipelag na sakey a manliub ya apoy tan pinoolan to ra may duanlasus tan limamplon lalaki ya angyapay na insinso.

Saray Pananginay Insinso

³⁶ Insan say Katawan kuantod kinen Moises,

³⁷ “Ibagam ed kinen Eleazar a lakin anak nen Aaron a pari, ta ekalen tod bangkay da ra may apoolan a lalaki iray gansan pananginay insinso, tan ikaykayat tod arum a pasen iray ngalab, lapud masanto ra may pananginan.

³⁸ Nagmaliw iran masanto nen niapay ira ed altar na Katawan. Kanyan alam ira may pananginay insinso a kayaryan na saramay totoon inaatey lapud kasalanan da, pitpit mo ra tan gawam iran okup na altar. Sikatoy sakey a pasakbay ed saray totood Israel.”

³⁹ Kanyan inaala nen Eleazar a pari ira may pananginay insinso tan pinipitpit to ra tan ginawa to ran okup na altar.

⁴⁰ Sikatoy sakey a pasakbay ed saray Israelita ya anggapoy onsingger ed altar a mampool na insinso para Katawan no aliwan kabyangay boleg nen Aaron. Ta no gawaen da, naparaan day agawad kinen Core tan saramay totoo to. Agawa yan amin onung na ingganggan na Katawan ed kinen Eleazar diad panamegley nen Moises.

Inyagel nen Aaron iray Totoo

⁴¹ Diad ontombuk ya agew amin ya Israelita nanriklamo ra sumpad kindi Moises tan Aaron tan kuanda, “Pinatey yo ray arum a totoo na Katawan.”

⁴² Kayari na impantitipon dan nanriklamo sumpad kindi Moises tan Aaron, linmingaw irad Tulda et anengneng dan ontatarung ed samay Tulda so lorem tan pinmatnag so kagalangan na Katawan.

⁴³ Di Moises tan Aaron et linma ran nanalagey ed arap na samay Tulda,

⁴⁴ et say Katawan kuantod kinen Moises,

⁴⁵ “Arawian yo ra yan totoo, ta deralen ko ran tampol ed kawalaan da!” Dinmakmomon anggad dalin ira may duara,

⁴⁶ et si Moises kuantod kinen Aaron, “Alam so pananginay insinso, kargaan mo na saray ngalab a manlapud altar, insan mo inan na insinso so ngalab. Insan ka mangganat ya onlad saray totoo ta gawam so sirimonya a panlinis ed sikara. Ganatan mo! Tinmerak lay pasnuk na Katawan tan ginmapo lay salot.”

⁴⁷ Inmonur si Aaron, inala toy pananginay insinso tan batik ed pegley na saramay totoon nantitipon. Nen anengneng nen Aaron a ginmapo lay salot, ininan to na insinso iray ngalab tan ginawa to so sirimonya a panlinis ed saray totoo.

⁴⁸ Lapud saya apatonda may salot, tan manalalagey si Aaron ed nanleetan da ray mabilay tan saray inaatey.

⁴⁹ Say karakel na saray totoon inatey et labinapat a libo tan piton lasus, andi-bali ni ra may inaatey lapud insumlang nen Core.

⁵⁰ Nen tinmonda la may salot, pinmawil si Aaron ed kinen Moises diad lolooban na samay Tulda.