Saray Bilang 12 - Maung A Balita Biblia

Adusa si Miriam

¹ Si Moises angasawa na sakey a biin Cusita. Lapud saya binalaw di Miriam tan Aaron.

² Inkuanda, “Nansalita sirin so Katawan diad panamegley nen Moises labat? Ag ta met nansalita diad panamegley tan dua?” Say Katawan nadngel to yan imbaga ra. (

³ Mapaabeban too si Moises; anggapo lad tapew na dalin so toon mapaabeba nen say sikato.)

⁴ Kabebekta say Katawan kuantod kindi Moises, Aaron, tan Miriam, “Paway kayon talo ta laka yod Tuldan Ayaman ko.” Pinmaway ira,

⁵ et say Katawan inmakseb a sakey a lusek a lorem, nanalagey ed lolooban na samay Tulda, tan tinawag to ra di Aaron tan Miriam. Inmasingger ira,

⁶ tan say Katawan kuanto, “Dengel yo natan so ibagak! No walad sikayo ray propita, ipaamtak ed sikara so siak a dili diad panamegley na saray pasingayew tan misalita ak ed sikara diad panamegley na saray kogip.

⁷ Doma balet no misalita ak ed aripen kon Moises; impasen ko a makaoley ed amin a totook ya Israelita.

⁸ Kanyan misasalita ak ed sikato a lupa-lupaan; malinew so pisasalitak ed sikato aliwan diad masoliwet a panagsalita; anengneng to ni ingen so alagey ko! Akin et nitepel yo so nansalita na sumpad aripen kon Moises?”

⁹ Ampetang so olo na Katawan ed sikara, tan tinmaynan la.

¹⁰ Et nen tinmaynan ed Tulda imay lorem, biglan alingbus na kating si Miriam tan nagmaliw ya ampotipotin maung. Nen anengneng nen Aaron ya akating si Miriam,

¹¹ inkuantod kinen Moises, “Ipangasim ya ag mo kami panliliknaen na onyan dusa lapud kasalanan min impanbalaw mid sika.

¹² Ag mo pa aabuloyan a magmaliw a singa kapangyanak ya inatey tan abulok lay kapalduan laman to.”

¹³ Kanyan si Moises tinmawag ed Katawan, “O Dios, paabig mo pay Miriam!”

¹⁴ Inmebat so Katawan, “No sikatoy nilukdaan na ama to ed lupa, pitoy agew a nepeg a manakoy kababaingan. Kanyan papaway mon sakey simba ed kampo; kasumpal na satan a panaon nayari lan ipawil ed dalem na kampo.”

¹⁵ Pitoy agew a nanayam ed paway na kampo si Miriam, et saray totoo ag da inyalis so kampo ra ya anggad nipawil ed dalem na kampo.

¹⁶ Insan tinaynan day Hazerot tan inlira dad kalawakan na Paran so kampo ra.