Santiago 5 - Maung A Balita Biblia

Say Pasakbay ed saray Mamayaman

¹ Dengel yo ya, sikayon mamayaman! Nangisan tan panogaogan yoy kairapan ya onsabid sikayo!

² Aboluk la ray kayamanan yo, tan abootan la ray kawes yo.

³ Kinan lay lati iray balituk tan pilak yo, tan satan met a lati mantasin sumpad sikayo tan singa apoy a mangoput na laman yo. Diad sarayan kaonuran ya agew so impanipon yoy kayamanan.

⁴ Dengel yoy riklamo da ray totoon nankimey ed dalin yo, ta ag yo ra inoopaan. Nadngel na Katawan a Makapanyarin-amin so dageyem da ray omaani yo!

⁵ Nanlikeliket tan nanggaygayaga kayo diad tapew na dalin. Pinataba yo ray laman yon singa ra ayayep a pateyen ed niganan agew.

⁶ Sinintinsiaan yon nadusa tan pinatey yo ray totoon matonung; ag ira linmaban ed sikayo.

Say Anos tan say Pikakasi

⁷ Kanyan, agagik, mananos kayo anggad isabiy Katawan. Imano yoy dumaralus. Aanosan ton maung ya alagdey mabmabli ran bungay dalin a daralusan to, tan say iterter na onaan tan kaonuran ya oran.

⁸ Mananos kayo met. Pabiskeg yoy linawa yo, ta asingger lay isabiy Katawan.

⁹ Agagi, ag kayo mansasalitay maoges a sumlang ed sakey tan sakey, pian ag kayo sintinsiaay Dios. Maganggano lan onsabiy Huis!

¹⁰ Agagi, alig yoy impantetepel tan impanaanos da ray propitan nansalitad ngaray Katawan.

¹¹ Ipasen tayon maliket ira, ta nanaanos ira. Nadngelan yoy impananos nen Job tan amta yo so ginaway Katawan ed sikato diad kaonuran, ta maaro tan mapangasin maung so Katawan.

¹² Manonad amin, agagik, ag kayo mansasamba no mansipan kayo. Ag yo pansasambaay tawen, o say dalin, o arum ni ran pansambaan. Duga lay pangibaga yoy “On” no on, tan “Andi” no andi, pian ag kayo sintinsiaay Dios.

¹³ Walay gunigon na siopaman ed sikayo? Nepeg toy mampikasi. Maliket so siopaman ed sikayo? Nepeg toy mankanta na pangigalang ed Dios.

¹⁴ Mansasakit so siopaman ed sikayo? Nepeg ton patawag iray mamatakken na iglisia, pian ipikasi ra tan poyukan day larak na oliba diad ngaray Katawan.

¹⁵ Say pikakasin katekep toy pananisia paabigen toy mansasakit, pabiskegey Katawan, tan napirdona ray kasalanan to.

¹⁶ Kanyan mampapatwaan kayo ray kasalanan yo, tan mampipikasiyan kayo, pian onabig kayo. Dakel so nagawaay pikakasi na toon matonung.

¹⁷ Si Elias et kapara tayon too. Pinasyay impangipikasi ton ag onoran, tan ag inmoran a tua ed loob na taloy taon tan anem bulan.

¹⁸ Nampikasi lamet tan inmoran, kanyan nambubunga ray tantanaman.

¹⁹ Agagik, no walad sikayoy onarawid katwaan tan apapawil na sakey,

²⁰ sayay tandaan yo: siopamay makapapawil na sakey a toon makasalanan a manlapud maoges a panagbilay to, nilaban tod patey so kamarerwa na satan a makasalanan, tan apapirdona to ray amayamay a kasalanan.