Santiago 2 - Maung A Balita Biblia

Say Pasakbay sumpad Panaglabi

¹ Agagik, bangta mananisia kayod Katawan tin Jesu-Cristo, say mapagalang a Katawan, ag yo nepeg a labien iray arum a totoo.

² Bilbilang: linmoob ed tipon yo so toon mayaman ya akasingsing na balituk tan akakawes na mabmabli, insan linmoob met so toon mairap-bilay ya apilatpilat so kawes to.

³ No asikasoen yo may mabmabliy kawes to tan kuanyo: “Yorung ki diad sankamaungan a yorungan,” balet kuanyod samay mairap-bilay, “Alagey ka lad tan, o yorung kad mad sokung,”

⁴ wala lay lalabien yod satan, tan nagmaliw kayon managsintinsia a wala ray maoges a kanunotan.

⁵ Dengel kayo, inararok iran agagi! Ag ta say Dios pinili to ray mairap-bilay ed tapew na dalin ya onyaman ed pananisia tan manawir ed Panarian ya insipan tod saray mangaarod sikato?

⁶ Balet nilemlemew yo ray mairap-bilay! Aliwa kasin saray mamayaman so mamapasegsegang ed sikayo tan mangigagayugoy ed sikayod korti?

⁷ Aliwa kasin sikaray mansasalitay maoges a sumpad gagalangen a ngaran a niiter ed sikayo?

⁸ Maung so gawaen yo no onuren yoy manonan ganggan a walad Masanton Sulat, “Arom so kaparam a too, a singa panangarom ed sikan dili.”

⁹ Balet no walay nilabi ed pangipasen yod totoo mankasalanan kayo tan, onung ed Ganggan, nepeg yoy nadusa.

¹⁰ Ta siopamay mangonur ed amin a ganggan balet et sumlangen toy sakey, sinumlang to lan amin.

¹¹ Ta say angibaga, “Ag ka mikakaloguran,” imbaga to met, “Ag ka mamapatey.” Anggan ag ka mikaloguran balet et amatey ka, mananumlang ka met lamlamang ed ganggan.

¹² Kanyan manalwar kayod saray kagagawa tan pananalita yo, ta totoo kayon nasintinsiaan na ganggan a mangibobolus ed sikatayo.

¹³ Ta diad panagsintinsiay Dios, ag to kasiay toon ag to amtay mangasi; balet say panangasi taloen toy sintinsia.

Say Pananisia tan saray Gawgawa

¹⁴ Agagik, antoy nagunggonay toon mangibagan walay pananisia to, balet et ag papaneknekan na saray gawgawa to? Nilaban kasi na onyan pananisia?

¹⁵ Bilbilang: wala ray agagin bibii o lalaki ya anggapoy nipales tan anggapoy nakan da.

¹⁶ No say sakey ed sikayo ikuantod sikara, “Bindisionan kayo komuy Dios! Napetangan tan makapangan kayo komun a maung!” balet et ag to ra itday nakaukolan da, wala kasiy nagunggona rad satan?

¹⁷ Ontan met, inatey so pananisian anggapoy katekep to ran gawa.

¹⁸ Balet walay mangikuan, “Walay pananisiam, balet wala ray gawak.” Ebat ko met balet, “Ipanengneng mod siak so pananisiam ya anggapoy katekep to ran gawa, tan ipanengneng kod sikay pananisiak diad panamegley da ray gawak.”

¹⁹ Sisiaen mon saksakey so Dios, anto? Maung itan! Saray dimonyo sisiaen da met, tan manggiwgiw ni ra ingen.

²⁰ Labay mo nin paneknekan kod sika, makulang-kulang, ya andi-kakanaan so pananisian anggapoy katekep to ran gawa?

²¹ Ag ta apaandiay kasalanan ed arap na Dios si ama tayon Abraham lapud saray ginagawa to, nen insaklang tod altar si anak ton Isaac?

²² Ditan yo nanengneng a nantekep a nankimey so pananisia to tan saray gawa to, tan nagmaliw a nagnap so pananisia to diad panamegley na saray gawa to.

²³ Tinmua so ibabagay Masanton Sulat, “Si Abraham anisiad Dios, tan lapud pananisia to, say Dios impasen ton matonung.” Sikato ni ingey atawag a kaaroy Dios.

²⁴ Ditan yo nanengneng a say too napaandiay kasalanan ed arap na Dios lapud saray gawa to, ya aliwan lapu labat ed pananisia to.

²⁵ Ontan met ed kinen Rahab, sakey a biin marotak so impanbilay to. Maliket ton pinatuloy iray Israelitan nibaki, tan inturo to ni ingen ed sikara so sananey a dalan pian makabatik ira. Lapud saraman a ginagawa to, nipasen a matonung ed arap na Dios.

²⁶ Inatey so laman ya anggapoy ispiritu; ontan met ya inatey so pananisia ya anggapo ray gawa.