Puyan 13 - Maung A Balita Biblia

Saray Duaran Ayep

¹ Insan anengneng koy sakey ya ayep ya onsasakbit a nanlapud dayat. Pitoray olo to tan samploray saklur to. Akoronaay balang saklur to, tan akasulat ed balang olo to so ngaran a sumpad Dios.

² Singa liopardo man ya ayep ya anengneng ko. Singa sali na uso ray sali to, tan singa sangiy lion so sangi to. Inter na dragon ed samay ayep so dilin pakayari to, say trono to, tan say baleg a pakaoley to.

³ Asugat so sakey ya olo to may ayep kanyan ngalngali la ompatey, balet inmabig met lamlamang. Kinmelaw so sankamundoan tan tinmombuk ed sikato ray totoo.

⁴ Inggalang na amin a totoo may dragon, lapud inter tod samay ayep so pakayari to. Inggalang da met imay ayep. Inkuanda, “Siopay miparad samay ayep? Siopay makalaban ed sikato?”

⁵ Naabuloyan imay ayep a mampasirayew, mansalitay sumpad Dios, tan manoley ed loob na apataplo tan duay bulan.

⁶ Inayew toy Dios, say ngaray Dios, say abung na Dios, tan saray manaayam ed tawen.

⁷ Naabuloyan met a labanan tan taloen to ray totoo na Dios, tan naabuloyan met ya oleyan toy amin a tribu, too, salita, tan bansa.

⁸ Mangigalang ed sikatoy amin a mambibilay ed tapew na dalin, a salanti saray totoon ag nisulat so ngaran da, kasakbayay inkapalsa na mundo, ed libro na bilay a kayaryay Kordiro a pinatey.

⁹ “Sikayo ran walay layag, dengel kayo sirin!

¹⁰ Siopamay niganan nadakep, nadakep a tua. Siopamay niganan ompatey diad panamegley na ispada, ompatey a tua diad panamegley na ispada. Kanyan saray totooy Dios nakaukolan a mananos tan manisia ra.”

¹¹ Insan anengneng kon pinmaway a nanlapud dalin so sakey nin ayep. Duaray saklur to a singa saklur na kilaw a karniro, balet say bosis to singa bosis na dragon.

¹² Inkana ton amiy pakayari na samay onaan ya ayep diad arap to. Impangigalang toy mundo tan amin a katoowan ed samay onaan ya ayep a say sugat to et inmabig la.

¹³ Makapakelkelaw iray milagron ginagawa to may kumadwan ayep. Impelag tod dalin so apoy a nanlapud tawen, diad arap da ray katoowan.

¹⁴ Pinalikdo toy katoowan ed tapew na dalin diad panamegley na saray milagron ginagawa tod arap na samay onaan ya ayep. Imbaga tod sikaran manggaway talintao na samay ayep ya asugatay ispada balet ag to impatey.

¹⁵ Naabuloyan may kumadwan ayep ya itdan toy linawa may talintaoy onaan ya ayep, pian makapansalita may talintao tan napapatey toy amin ya ag mangigagalang ed sikato.

¹⁶ Impamarkaan na samay ayep so kawanan a lima o muling da ray amin a katoowan, atagey may abeba ed kipapasen, mayaman may mairap-bilay, aripen may andi.

¹⁷ Ag nayari met a manaliw o manlako so siopaman ya anggapod sikatoy nimarkan ngaran to may ayep, o say numiro na ngaran to.

¹⁸ Nipaakar ed saya, nakaukolay kakabatan. Nayarin naamtaay siopaman a makabat so kabaliksay numiro to may ayep, ta ngaran na sakey a too yan numiro. Say numiro to anem a lasus tan anemaplo tan anem.