Probirbio 9 - Maung A Balita Biblia

Say Kakabatan tan say Inkakulang-kulang

¹ Say kakabatan amaalagey na abung to tan nanggawa na pitoran lusek to.

² Amatas na ayep a para pista, nilaokan toy rikado so alak, insan to insaklang so lamisaan.

³ Imbaki to ray katulong ton bibii ya onla rad sankatageyan a pasen ed baley ta ibando ra:

⁴ “Loob kayo, sikayon totoon anggapoy amta!” Insan diad toon makulang-kulang kuanto,

⁵ “Gala dia, mangan kad kakanen ya imparaan ko tan inom kad alak a tinimplak.

⁶ Taynan moy olupan da ray totoon anggapoy amta, tan mambilay ka. Mankurang kad dalan na pakaamta.”

⁷ No peteken moy toon mapaatagey, nabaingan ka labat. No pampasnukan moy toon maoges, nasakitan ka labat.

⁸ Ag mo pepeteken so toon mapaatagey, ta bosulen to ka. Balet no peteken moy toon makabat, pagalangan to ka.

⁹ Say antokaman ya ibagam ed toon makabat pagmaliwen ton lalon makabat. Say antokaman ya ibagam ed toon matonung aruman toy pakaamta to.

¹⁰ Pian nawalaan kay kakabatan nepeg mon pagalangan ya onona so Katawan. No kabat mo may Masanto, walay pakatalus mo.

¹¹ Say kakabatan parokeyen toy bilay mo diad tapew na dalin.

¹² Sikay makalay tumang no walay kakabatan mo, balet sikay manliknay kairapan no ipolisay mo.

¹³ Say inkakulang-kulang et singa makmaknul, anggapoy amta, tan anggapoy kababaingan a bii.

¹⁴ Manyodyorung yan bii ed puirta na abung to, odino diad yorungan ed sankatageyan a pasen ed baley,

¹⁵ tan ibabando tod saray totoon ondadalan ya ag da pibabalian iray arum a totoo.

¹⁶ “Gali dia, sikayon anggapoy amta a totoo!” Kuantod toon makulang-kulang,

¹⁷ “Masamit ni so tinakew a danum. Mananam ni so tinakew a tinapay.”

¹⁸ Ag amta na saray napapalikdo to ya ompatey iray totoon oonlad abung to, tan saray totoon linmoob la et wala la rad dalem na pasen a panaayaman da ray inaatey.