Probirbio 6 - Maung A Balita Biblia

Saray Arum nin Pasakbay

¹ Anak ko, insipan mo a sikay onebat ed utang na arum a too?

² Narel ka na saray dilin salitam, apatitan ka na saray dilin sipan mo?

³ On anak, wala kad pakayari na satan a too, balet onyay pakaokpus mod lima to: mangganat kan onlad sikato, ta mikasi kad sikaton ibolus to ka.

⁴ Ag mo aabuloyay sikan dili a makaogip odino ontondan mampainawa.

⁵ Paway kad patit a singa manok odino singa sakey ya ulsan ibabatikan toy umaanup.

⁶ Mangingiras a totoo, laka yod kawalaan da ray gilata; imano yoy panagbilay da, pian makaaral kayod sikara.

⁷ Anggapoy pangulo, opisyal, odino manoley da,

⁸ balet mantitipon ira no tiagew na pambilay dad nepnep.

⁹ Anggad kapigan so panilakilak na mangiras a too ed dokulan to? Kapigan so ibangon tod ogip to?

¹⁰ “Mampainawa ak a magano,” ikuanto; “mantalikepkep ak tan mampainawa ak a magano.”

¹¹ Balet legan ton naogip, onsabid sikatoy kairapan na bilay a singa isabi na matakew a walay awit ton armas.

¹² Onlan manliber-liber a mantila iray totoon maoges tan andi-kana.

¹³ Mankindat tan mansinyas ira pian napalikdo da ka,

¹⁴ legan dan mamplaplanoy kaogsan, tan manggagaway golo ed amin a pasen.

¹⁵ Lapud saya, anggapoy pasakbay tan bigla-biglan onsabid sikaray deral, tan ipatey day kasugat da.

^16-19 Wala ray pitoran bengatla a kabosul tan ag labay na Katawan: Say mapaatagey a nengneng, say matilan dila, saray liman managpatey na totoon anggapoy kasalanan, say kanunotan a managplano na saray kaogsan, saray salin masiglat a managgaway kaogsan, say tasin mantotombukay tila to, tan say toon manangigapoy golo ed saray sankakaaro.

Pasakbay a Sumpad Pikakaloguran

²⁰ Anak ko, onur moy ganggan na amam tan ag mo lilingwanan so bangat na inam.

²¹ Iyan mo ra lawas ed olom tan isulat mo rad pusom.

²² Say bangat da iwanwan da kad pankurang mo, iyagel da ka no labi, tan simbawaan da ka no agew.

²³ Saray bilin da singa ra liwaway silew; say panametek da ibangat da ka no panoy pambilay mo.

²⁴ Niarawi da kad saray marotak a bibii tan nipaliis da kad makaayat a panagsalita da ray asawa na arum a lalaki.

²⁵ Ag ka patutuksod ganggana ra; ag ka pasasagyat ed panagkindat da.

²⁶ Say sakey a laki nayarin nabayaran to na sakey a pan di bara so sakey a marotak a bii, balet diad pikakaloguran naalan amin so kayaryan to.

²⁷ Naakwal moy apoy ya ag napoolay kawes mo?

²⁸ Makapanakar kad ngalab ya ag nasinit so salim?

²⁹ Onya so nagawa no miakdul so sakey a laki ed asawa na arum a laki. Nadusa so siopaman a manggawa ed saya.

³⁰ Ag balawen na saray totoo so matakew no mantakew na nakan no sikatoy narasan;

³¹ balet no narel, ipawil ton mamimpitoy karakel imay tinakew to—iter toy amin a kayaryan to.

³² Balet anggapoy kalakal so lakin mikakaloguran. Dederalen to labat so sikaton dili.

³³ Sakit na laman tan kaandiay kagalangan so nasagmak to; ag manganggay pakapelag tod kababaingan.

³⁴ Mapalaloy petang na olo na asawan laki no sikatoy mangimon; ag manganggay ibawi to.

³⁵ Ag to mangawat na antokaman a bayar; anggapoy rigalon makapabetel na pasnuk to.