Probirbio 31 - Maung A Balita Biblia

Simbawa ed Sakey ya Ari

¹ Sikara yay balikas na ina nen Ari Lemuel ed sikato:

² “Sikay dilin pinablik ya anak, say ebat na saray pikakasik. Antoy ibagak ed sika?

³ Ag mo dadaraken ed saray bibii so biskeg mo tan say kuartam; dineral la na saray bibii iray arum ya arari.

⁴ Dengel ka, Lemuel. Ag nepeg ya oninom na alak iray arari, odino pampilalekan dan inomen iray mabayanin iinomen.

⁵ No oninom ira nalingwanan da ray ganggan tan napaolyan da la ray kanepegan na saray walad pankaukolan.

⁶ Saray mabayanin iinomen et para saray ompapatey, tan saray walad makapasinagem a kipapasen.

⁷ Paolyan mo ran oninom, pian nalingwanan day kairapan tan kaermenan da.

⁸ “Isalitaan mo ray totoon ag da nisalitaan so sikaran dili. Iyagel mo ray kanepegan da ray pangaskasiyan a totoo.

⁹ Isalitaan mo ra tan pagmaliw mon matonung so panintinsiam. Iyagel mo ray kanepegan da ray mairap-bilay tan saray walad pankaukolan.”

Say Maung ya Asawan Bii

¹⁰ Agaylay irap so mananap na maung ya asawan bii! Mabmabli ni nen saray alahas!

¹¹ Walay panagmatalek ed sikato na asawa to, kanyan ag balut onirap so bilay to.

¹² Legan ton mambibilay, say pankaabigan aliwan say pankaogsan na asawa to so gagawaen to.

¹³ Makoli-kolin manggagaway abel a lana tan linen.

¹⁴ Mangisesempet na saray taganon nanlapud saray arawin pasen, a singa gagawaen da ray bapor na nigosianti.

¹⁵ Abangon la no palbangon, ta mangiparaan na pangalmusalan na pamilya to tan bibilinen to ray katulong ton bibii no antoy gawaen da.

¹⁶ Mannenengneng na alog tan sasaliwen to, insan say nalmoan ton kuarta ikakana tod pantatanem to na ubas.

¹⁷ Mabiskeg a mankimey tan makolikoli.

¹⁸ Amta toy kablian na amin da ray gagawaen to, tan mankikimey ni anggan aralem lay labi.

¹⁹ Gagawaen toy dilin tinebey to tan gagawaen toy dilin abel to.

²⁰ Mabonluk a mangiiter ed saray mairap-bilay tan saray walad pankaukolan.

²¹ Anggapoy pagpaga to anggan ompelag so yilo, lapud makakapal iray kawes na kabyangay pamilya to.

²² Manggagawa na saray apis na katri tan pinon ambalangan linen so ikakawes to.

²³ Bibirbiren ed balay so asawa to tan sakey ed saray manonan mibabaley.

²⁴ Manggagawa na saray abel tan saray balkes, insan to ra ilalako ed saray nigosianti.

²⁵ Mabiskeg tan gagalangen na katoowan tan anggapoy pagpaga to ed arapen a panaon.

²⁶ Mapalna tan napno na kakabatan so panagsalita to.

²⁷ Wala lawas so gagawaen to tan iiter to ray nakakaukolan na pamilya to.

²⁸ Papagalangan na saray anak to, tan idadayew na asawa to.

²⁹ Kuan na asawa to, “Amayamay iray bibiin maung ya asawa, balet sikay sankamaungan ed sikara.”

³⁰ Makapalikdo so limgas tan mangangga so ganggana, balet nepeg ya idayew so biin papagalangan toy Katawan.

³¹ Birbir mo lapud saray gagawaen to. Kanepegan toy pagalangan na amin a totoo.