Probirbio 24 - Maung A Balita Biblia

-19-

¹ Ag ka oniibeg ed saray totoon maoges, tan ag ka mikakaaro ed sikara.

² Say panggulo labat so nununoten da; tan kapag mansalita ra walay napasakitan da.

-20-

³ Saray abung et nipaalagey ira ed pundasion a kakabatan tan pakatalus.

⁴ Lapud pakaamta saray kuarto aparakep ira na mabmabli tan marakep iran kagawaan.

-21-

⁵ Matalona ni so toon makabat nen say toon mabiskeg; on, magmaung ni so pakaamta nen say biskeg.

⁶ Ta say katwaan to, nakaukolan niy maung a pamplanom kasakbayan na pibakal mo, tan no panoy karakel na naalam a maung a simbawa ontan so kaasingger na panalom.

-22-

⁷ Saray balikas a napnoy kakabatan et ag ira natokur na toon makulang-kulang. Anggapoy nibaga to no ambelat lay pantotongtongan.

-23-

⁸ No maoges lawas so iplaplanom, napangaranan ka a managgaway golo.

⁹ Kasalanan so antokaman ya iplaplano na makulang-kulang. Kabosul na saray totoo so toon managbalaw na kapara ton too.

-24-

¹⁰ No makapoy ka no panaon na kairapan, peteg a makapoy ka.

-25-

¹¹ Ag ka ontatalaw a mangyagel ed toon anggapoy kasalanan ya iyakar da lan pateyen.

¹² Nayarin ibagam ya anggapoy pibabalim, balet amta na Dios iray getmam tan simbangen to ra. Say Dios a mamabantay ed sika amta toy peteg a nagagawa. Tumangan to ka onung ed gagawaen mo.

-26-

¹³ Anak ko, mangan kay dilo, ta maung a kanen. Masamit ed dila so dilo a nanlapud obung na bayaong;

¹⁴ ontan met, maung ed kamarerwa so kakabatan. No nawalaan kay kakabatan maung so pansumpalan mod arapen a panaon.

-27-

¹⁵ Ag mo aaligen iray totoon maoges a mannununot na pantakew dad toon matonung odino panamsam dad abung to.

¹⁶ Anggan mamimpigay katumba na toon maptek so panagbilay to, ombangon ya ombangon. Balet say toon maoges deral so onsasabid sikato.

-28-

¹⁷ Ag mo panliliketan so kaderal na kalaban mo, tan ag ka manggagayaga no natumba.

¹⁸ Naamtaan na Katawan no panliliketan mo, et ag to labay; insan nayarin ag to la dusaen.

-29-

¹⁹ Ag ka pagugunigon ed saray totoon maoges; ag ka oniibeg ed sikara.

²⁰ Anggapoy maung ya arapen na toon maoges—naandi so antokaman a kawalaay ilalo to.

-30-

²¹ Anak ko, igalang moy Katawan tan pagalangan moy ari. Ag ka mibabalid saray totoon onlalaban ed sikara.

²² Saratan a totoo et nayarin biglan naderal ira. Amtam so deral ya ipasabid sikara na Dios odino say ari?

Saray Arum nin Balikas a Napnoy Kakabatan

²³ Sikara ya met so balikas na saray totoon makabat: Makapoy a say sakey a huis et walay kikilingan to.

²⁴ No sintinsiaan na huis ya anggapoy kasalanan so toon nankasalanan, sikatoy isamba tan bosulen na saray katoowan.

²⁵ Balet saray huis a dudusaen da ray nankasalanan et onaligwas ira tan panliketan day pakaidayew da.

²⁶ Say pangiter na tuan ebat sikatoy sakey a tanda na peteg a pikakaaro.

²⁷ Mananap ka niy pankimeyan mo, iparaan moy alog mo, kasakbayan a mangipaalagey kay abung mo tan mampamilya ka.

²⁸ Ag ka mantatasi na sumpad kaparam a too likud no walay makasengeg, odino mangibabaga na saray bengatlan makapalikdon nipaakar ed sikato.

²⁹ Ag mo ikukuan, “Gawaen kod sikato so singa ginawa tod siak! Bayaran to so antokaman a ginawa to!”

³⁰ Dinmalan ak ed kaalogan tan kaubasan na toon mangiras tan makulang-kulang.

³¹ Napno ra na saray masabit a tanaman tan saray dikarika. Ageba ray padir ed kaliber-liber da.

³² Ninengneng ko ya, dinalepdep ko, tan saya so naaralan ko:

³³ Lirep kay daiset tan ogip kay daiset. Mantalikepkep ka tan mampainawa kan magano,

³⁴ balet legan mon naogip, onsabid sikay kairapan na bilay a singa matakew ya akaarmas.