Probirbio 18 - Maung A Balita Biblia

¹ Saray totoon ag da amtay miolup ed kapara ran totoo et say pankaabigan da labat so nununoten da; sumpaen day ipapasen a maptek na amin a totoo.

² Say toon makulang-kulang anggapoy walad sikato no natalusan toy sakey a bengatla odino andi; say labay to labat say pangipanengneng toy kasiliban ton dili.

³ Mambansag ya onsabi so kaogsan tan say kababaingan. Ibalang mo so kagalangan mo, et nabalaw ka.

⁴ Saray salita na too nayarin sakey a sobul na kakabatan, aralem a singa dayat, tan tariwan singa managagos a danum.

⁵ Aliwan maung a pilaan so toon walay kasalanan tan ekalan na katonungan so anggapoy kasalanan.

⁶ No igapo la na sakey a toon makulang-kulang so sangsangan, onkekerew na pakalewetan to.

⁷ No mansalita so makulang-kulang, dederalen toy sikaton dili, nanaerel ed patit na saray dilin salita to.

⁸ Masamsamit a singa kakanen so talabutob—labalabay tayon akmonen!

⁹ Say toon mangiras kapinsay toon managderal.

¹⁰ Say Katawan et singa mabiskeg a torin nasalimbengan na saray totoon matonung, pian niarawi rad kaatapan.

¹¹ Abaloan na saray mayaman a say kayamanan da so mangyaagel ed sikara, a singa say atagey tan mabiskeg a padir ya akaliber ed siudad.

¹² Anggapoy toon napapagalangan likud no sikatoy mapaabeba; mamapaarap ed deral iray totoon mapaatagey.

¹³ Dengel ka ni kasakbayan kan onebat. No andi, makulang-kulang tan managpabaing ka.

¹⁴ Say biskeg na linawam a mambilay sikatoy mamabiskeg ed sika no mansasakit ka; balet no naandi yad sika anggapo lay ilalom.

¹⁵ Say toon maung ya impanolo lawas mampipilalek tan akaparaan a manaral.

¹⁶ No labay mon napiarapan so toon atagey so kipapasen, iyawitan mo na rigalo.

¹⁷ Say ononan mansalita ed korti et singa sikatoy walad katwaan anggad gapwan na kalaban to a tepetan.

¹⁸ Nayarin naarigloan so kaso na duaran makapanyari a manlalaban ed korti diad panamegley na pampapalaranan.

¹⁹ Tulongan moy agim, et iyagel to ka a singa panangyagel na padir ed siudad, balet no kolkolen mo ag to ka palooben ed abung to.

²⁰ Anien mo iray bunga na panagsalitam.

²¹ Makaiter odino makaderal na bilay so panagsalitam; kanyan nepeg mon awaten iray bunga na panagsalitam.

²² Say toon akalmo na maung ya asawa to akarumog na maung a bengatla; ipapanengneng na saya a maung so linawa na Katawan ed sikato.

²³ No mansalitay mairap-bilay, nakaukolan a mikasi; balet no onebat so mayaman, ansakisakit iray salita to.

²⁴ Wala ray totoon konkonwarin kaaro, balet saray arum a kaaro matoor ira nen saray dilin agagi.