Probirbio 17 - Maung A Balita Biblia

¹ Magmaung niy amagaan a tinapay a dongoan a walay kareenan, nen say baleg a ponsia a dongoan diad magolon abung.

² Say aripen a masilib naoleyan to so andi-kakanaan a lakin anak na amo to, et makapiapag ed tawir.

³ Say balituk tan say pilak susuboken na apoy, tan say puso na too susuboken na Katawan.

⁴ Saray totoon maoges ondedengel ed saray maoges a kanunotan tan saray matila ondedengel ira ed saray tila.

⁵ No ludlureyen mo ray mairap-bilay ludlureyen moy Dios ya amalsad sikara. Nadusa ka no panliketan moy segsegang a sinmabid sakey a too.

⁶ Saray mamasiken ikikinon da ray apo ra, a singa saray anak a lalaki ikikinon da ray kaamaan da.

⁷ Mantitila ray totoon gagalangen, tan anggapoy makabaliksan ya ibabaga na saray makulang-kulang.

⁸ Walay totoon abaloan da a singa salamangka so gagawaen na pasoksok; sisiaen dan nagawaan toy amin a bengatla.

⁹ No labay mon aroen ka na kaparam a too, pirdonam ira no mankasalanan irad sika. Say ag pakalingwan ed saray kakapoyan, makaderal na pankakaaro.

¹⁰ Say toon walay pakatalus, dakel niy naaral to ed sakey a pasnuk nen say naaral na toon makulang-kulang ed sanlasus a lewet.

¹¹ Singa maruksan manangibalita so isabi na patey ed saray totoon maoges a naynay a manangigapo na golo.

¹² Magmaung niy makasabat na uson imbatik da ray anak to nen say makasabat na toon makulang-kulang a walay getma ton maoges a gawaen.

¹³ No kaogsan so ibales mod kamaungan, ag naandian na kaogsan so abung mo.

¹⁴ Say gapo na sangsangan et singa abut ed diki; kanyan patondam kasakbayan ya ombaleg ni.

¹⁵ Makapaingungot ed Katawan so panusa ed toon anggapoy kasalanan tan say pangibolus ed toon maoges.

¹⁶ Anggapoy kakanaan na panggastos na makulang-kulang ed pakagamur toy aral, ta ag to ikakanay olo to.

¹⁷ Saray kakaaro ipanengneng da lawas so panangaro ra. Antoy kana na sanaagi no ag ira mantatambayan ed gunigon?

¹⁸ Say too labat ya ag to ikakanay olo to, so mangisipan a sikatoy makaoley ed utang na kapara ton too.

¹⁹ Say panlabay ed kasalanan et panlabay ed golo. No malastug ka lawas, goloy aanapen mo.

²⁰ Ag onaligwas so siopaman a toon mannununot tan mansasalitay kaogsan; kaderalan labat so pansumpalan to.

²¹ Baleg ya ermen na ama so anak a manggagaway kalokowan.

²² Say gayaga pansiasiansiaen toy abig na laman mo. Say ermen mankalkalnan mansumpal ed patey.

²³ Saray maoges a huis mangaawat ira na maamut a pasoksok; napikewet ed satan so inkatonung.

²⁴ Say toon ikakana toy olo to gawan napnoy kakabatan so gegetmaen to, balet say toon makulang-kulang amayamay a bengatlay gegetmaen to.

²⁵ Say anak a makulang-kulang mangiiter ed ama to na kaermenan tan diad ina to say makapasinagem a liknaan.

²⁶ Sumlang ed katonungan so panmulta na toon anggapoy kasalanan; napikewet so katonungan no nadusa ray maung a totoo.

²⁷ Say toon madangka ed panagsalita amta toy gagawaen to, tan say toon popokpokan toy sikaton dili walay pakatalus to.

²⁸ Ta nayarin ipasen a makabat tan walay pakatalus so sakey a toon makulang-kulang no mandeen tan pepetan toy sangi to.