Probirbio 15 - Maung A Balita Biblia

¹ Say mapalnan ebat pakekepaen toy pasnuk, balet say ansakit ya ebat palolooren to.

² No mansalita ray makabat a totoo, parakepen day pakatalus, balet andi-kabaliksan so lalabiren da ray makulang-kulang.

³ Sankanengneng na Katawan iray nagagawa ed inerman a pasen; bambantayan to itayo, maung man o maoges so gagawaen tayo.

⁴ Bilay so iiter na marakep iran salita, balet makaderal na kalakal iray maruksan salita.

⁵ Inkakulang-kulang so ag mo idengel ed bangat na amam; balet kakabatan so pangako na panametek to.

⁶ Saray totoon matonung isisinup da ray kayamanan da, balet saray totoon maoges nababalang da ra no panaon na kairapan.

⁷ Say pakaamta ikakayat na saray totoon makabat, aliwan saray makulang-kulang.

⁸ Makaliliket so Katawan no mampikasi iray totoon maptek, balet kabosul to ray bagat ya iyaakar ed sikato na saray totoon maoges.

⁹ Kabosul na Katawan so kagagawa da ray totoon maoges, balet inaro to ray manggagaway kaptekan.

¹⁰ No aliwa so gawaen mo mapalaloy kadusam; ompatey ka no ag mo labay so papetek.

¹¹ Amta na Katawan so anggan walad pasen a panaayaman da ray inaatey; panon sirin ya iyamut na too ed Dios iray kanunotan to.

¹² Saray totoon mapaatagey ag da labay so papetek; ag iran balut onkekerew na simbawa ed saray totoon makabat.

¹³ No maliket iray totoo onimis ira, balet no maermen ira ombilonget so lupa ra.

¹⁴ Saray totoon ikakana ray olo ra labay day manaral, balet saray makulang-kulang maliket la ra, anggan anggapoy amta ra.

¹⁵ Andi-tondan irap so bilay da ray totoon mairap-bilay, balet magayaga lawas so bilay da ray totoon maliket.

¹⁶ Maung niy mairap-bilay a walay panamagalang ed Katawan, nen say mayaman a walad gunigon.

¹⁷ Magmaung niy mangan na pising a karongom iray totoon inarom, nen say mangan na sankamaungan a karni a walay bosulan.

¹⁸ Say toon mapetang na olo igagapo toy sangsangan, balet say toon maanos mangiiter na kareenan.

¹⁹ No mangiras ka kairapay nasagmak mo ed anggan iner, balet no matwa ka, anggapoy onsabid sikan gunigon.

²⁰ Say anak a makabat paliliketen toy ama to. Say makulang-kulang labat ya anak so mambabalaw ed ina to.

²¹ Saray totoon anggapoy kalakal maliket irad kaambagelan da, balet saray totoon makabat gawaen day kaptekan.

²² Dengel kad amin a simbawa, et onaligwas ka, balet no ibeneg mo ra kasumpalan moy aliwa-liwa.

²³ Agaylay gayaga na pakalmo na dugan salita para dugan okasyon!

²⁴ Saray totoon makabat mankukurang irad dalan a mamaarap ed bilay diad tagey, aliwan diad dalan a mamaarap ed pasen a panaayaman da ray inaatey diad leksab.

²⁵ Deralen na Katawan so kaabungan na saray totoon mapaatagey, balet iyagel toy kayamanan na saray bibiin balo.

²⁶ Kabosul na Katawan iray maoges a kanunotan, balet pakaliliketan to ray salitan makaruyruyo.

²⁷ Say toon masaol mangiiter na gunigon ed pamilya to. Ag ka mangaawat na pasoksok, et andokey so bilay mo.

²⁸ Saray maung a totoo mannununot ira kasakbayan iran onebat. Saray totoon maoges bengat-bengat iran onebat, balet panlalapwan ya na golo.

²⁹ No mampikasi ray maung a totoo, ondengel so Katawan, balet ag to aasikasoen iray totoon maoges.

³⁰ Saray makakaimis a lupa pagmamaliwen da kan maliket, tan say maung a balita pagmamaliwen ton maung so liknaan mo.

³¹ Makabat ka no ondengel kad maung a simbawa.

³² No ag mo labay so manaral, sisibletan moy sikan dili. No awaten moy maung a simbawa naaromay kakabatan to.

³³ Say pangigalang ed Katawan et sakey a pakaaralan. Nepeg a mampaabeba ka kasakbayan a napagalangan ka.