Probirbio 12 - Maung A Balita Biblia

¹ Say toon pinabli toy pakaamta labay ton naamtaay kalilingo to, balet say toon makulang-kulang bobosulen toy panametek.

² Pakaliliketan na Katawan iray totoon matonung, balet sisintinsiaan ton nadusa iray mamplaplanoy kaogsan.

³ Say kaogsan mangiiter na kaatapan ed too, balet maligen so bilay na toon matonung.

⁴ Say maung ya asawan bii pakagagayagaan tan ikikinon na asawa to. Balet say bii a mangiiter na kababaingan ed asawa to et singa kanser ed saray pokel to.

⁵ Matwa so gawaen ed sika na saray totoon maptek; pamalikdo labat so labay a gawaen ed sika na saray totoon maoges.

⁶ Makapatey iray salita na totoon maoges, balet makapangyagel iray salita na totoon matonung.

⁷ Nadederal iray totoon maoges tan anggapoy ititilak dan kabyangay boleg da, balet mansiansia ray pamilya da ray totoon matonung.

⁸ No makabat ka nadayew ka, balet no makulang-kulang ka nabalaw ka.

⁹ Say toon abebay kipapasen a walay anapay bilay et maung ni nen say toon konkonwarin matalonggaring balet eges toy narasan.

¹⁰ Say toon matonung kokomponien to ray ayayep to, balet saray totoon maoges maruksa ed saray ayayep da.

¹¹ Say makolin dumaralus daakan so kakanen to, balet kinaambagelan so pandarak na panaon ed andi-kakanaan iran pamaakaran.

¹² Say pilalek na saray totoon maoges et say panggaway kaogsan ed katoowan, balet malet so inkiletneg da ray totoon matonung.

¹³ Say toon maoges naeerel ed saray dilin salita to, balet say toon matonung makalolokpus ed gunigon.

¹⁴ Saray salita tan gawgawa na too so pakatumangan to; say manepeg ed sikato so nagamuran to.

¹⁵ Saray totoon makulang-kulang abaloan dan maptek lawas so gagawaen da. Saray makabat a totoo onderengel irad simbawa.

¹⁶ No makapasnuk so makulang-kulang a too tampol ya ipapatnag to, balet say toon makatalus palalabasen toy panamabaing.

¹⁷ No ibagam so katwaan, nagawa so katonungan, balet no saray tila, mansusumpal ira ed pakapikewet na katonungan.

¹⁸ Saray salitan andi-nunotan singa ra ispadan makasugat, balet makapaabig iray salitan napnoy kakabatan.

¹⁹ Antikey so bilay na tila, balet mansiansiad anggad angga so katwaan.

²⁰ Panamalikdo so walad kanunotan da ray manggegetman manggaway kaogsan, balet liket so nagamuran da ray manggagaway kamaungan.

²¹ Anggapoy makapoy a nagagawad saray totoon matonung, balet natatabunan na gunigon iray totoon maoges.

²² Kabosul na Katawan iray matila, balet maliket ed saray matoor ed salita ra.

²³ Saray totoon makabat ag to ipanpanta a walay amta to, balet say makulang-kulang ibabawag toy inkakulang-kulang to.

²⁴ Say toon makoli nawalaan na pakayari; say toon mangiras magmaliw ya aripen.

²⁵ Say kapagaan napaandi toy liket mo, balet saray marakep a salita paliketen da ka.

²⁶ Say toon matonung iwawanwan toy kaaro to, balet say dalan da ray totoon maoges ibabalang to ra.

²⁷ Say mangiras a too ag to nagamuray gegemtan to, balet say toon makoli makagamur na kayamanan iran ankabli.

²⁸ Say katonungan so dalan a mamaarap ed bilay; say kaogsan so dalan a mamaarap ed patey.