Probirbio 11 - Maung A Balita Biblia

¹ Kabosul na Katawan so masaol a simbangan, balet maliket ed dugan simbangan.

² Ag mabayag napelag ed kababaingan iray totoon mapaatagey. Makabat so toon mapaabeba.

³ No maung ka iwawanwan ka na kaptekan. Saray totoon ag napampiaan dederalen ira na inkasaol da.

⁴ Anggapoy kakanaan so kayamanan mo no asabi lay agew na ipatey mo, balet say kaptekan nilaban toy bilay mo.

⁵ Say kaptekan papainomayen toy bilay na maung a too, balet say toon maoges deralen toy sikaton dili.

⁶ Say inkatonung iyaagel toy toon maptek so panagbilay to, balet say toon ag napampiaan nanaerel na dilin inkaagom to.

⁷ No ompatey so toon maoges, naandipat lay ilalo to. Anggapoy kabaliksan so panmatalek ed kayamanan.

⁸ Niaarawid gunigon iray totoon matonung; ingen saray totoon maoges lalaen to.

⁹ Nayarin deralen ka na saray totoon anggapoy Dios, balet nayarin ilaban ka na kakabatan na saray totoon matonung.

¹⁰ Maliket so siudad no saray totoon matonung et maaligwas ira, tan no ompatey iray totoon maoges wala ray eyag na liket.

¹¹ Magmaliw a matalonggaring so siudad no saray totoon matonung et bibindisionan da; balet naderal so siudad lapud panaglabir da ray totoon maoges.

¹² Makulang-kulang so toon mambabalaw ed kapara ton too. No makabat ka mandeen ka.

¹³ Ag nipiya so sikrito ed toon managtalabutob, balet nipiya so antokaman ed toon napanmatalkan.

¹⁴ Naderal so bansa no anggapoy panangiwanwan, balet arawid kaatapan no dakel iray sumisimbawa.

¹⁵ No isipan mon bayaran so utang na toon ag mo kabat magbabawi kad kaonuran. Maung niy kipapasen mo no ag ka mibabali.

¹⁶ Napapagalangan so biin masimpit, balet mangiiter na kabaingan so biin maoges. Ag nawalaay kuarta so toon mangiras, balet onyaman so toon makoli.

¹⁷ Say toon mapangasi iitdan toy kaabigan so sikaton dili, balet say toon maruksa papasakitan toy sikaton dili.

¹⁸ Saray totoon maoges anggapon tuay nagonggona ran kaabigan, balet no gawaen moy kaptekan andi-saew sikay natumangan.

¹⁹ Mambilay so toon pilalek to lawas so manggaway katonungan, balet ompatey so toon ipasoot toy manggaway kaogsan.

²⁰ Kabosul na Katawan iray totoon walay maoges a kanunotan, balet inaro to ray manggagaway kaptekan.

²¹ Andi-saew a nadusa iray totoon maoges, balet makapaliis iray totoon matonung.

²² Say biin maganggana ya aliwan maptek so panagnunot to, aliling toy balituk a singsing a walad songut na baboy.

²³ Say pilalek na saray totoon matonung mansumpal lawas ed kamaungan; no naala na saray totoon maoges so pilalek da, ampetang so olo na amin a totoo.

²⁴ Wala ray totoon magastos, balet onyayaman met ni ran siansia. Wala ra met so mapeget a manggastos, balet mandenden so kairapan na bilay da.

²⁵ Onaligwas so toon mabonluk a mangiter. Say toon matulong makaawat na tulong.

²⁶ Isasamba na katoowan so toon mangisisinup na ilik to, lapud panaalagar toy itagey na bili to, balet idadayew da so toon mangilalako lay ilik to.

²⁷ No kamaungan iray getmam, sikay napagalangan, balet no goloy anapen mo, sikatoy narumog mo.

²⁸ Saray totoon manmamatalek ed kayamanan da et nalemay ira a singa nalnes a tanaman, balet saray totoon matonung onaligwas ira a singa mabonabonan tanaman.

²⁹ Say toon mangiiter na gunigon ed dilin pamilya to et anggapoy naala to diad kaonuran. Say makulang-kulang a too aripen lawas na makabat a too.

³⁰ Bilay so iiter na katonungan, balet eekalen na inkaruksa.

³¹ No natumangan diad tapew na dalin iray totoon matonung, andi-saew a nadusa iray totoon maoges tan makasalanan.