Oseas 4 - Maung A Balita Biblia

Say Dalem na Katawan Sumpad Israel

¹ Say Katawan walay dalem to sumpad saray totoon manaayam ed sayan dalin. Dengel ka, Israel ed kuanto: “Diad sayan dalin anggapoy katooran odino panangaro na saray totoo, tan ag da ak bibirbiren a Dios.

² Mansisipan iray totoo, balet ag da lamlamang totooren; mantitila ra, mampapatey iray totoo, mantatakew ira, tan mankakalugoran ira. Mandakel so nagagawan krimin, tan mantotombukay panagpatey na too.

³ Kanyan say dalin onkelang, tan ompatey ya amin iray manaayam. Ompatey ya amin iray ayayep, amin a manok, tan amin a sira.”

Say Dalem na Katawan Sumpad saray Papari

⁴ Say Katawan kuanto, “Anggapo komuy mangakusa ed saray totoo odino mamasnuk ed sikara—say dalem ko et sumpad sikayon papari.

⁵ Labi-agew a manggagawa kayoy kaogsan; ontan da met iray propita. Deralen ko so Israel ya ina yo.

⁶ Adusa ray totook lapud ag da ak bibirbiren a Dios. Sikayon papari et ag yo ak binirbir a Dios yo tan impolisay yo ray bangat ko, kanyan ipolisay ta kayo tan ag ko birbiren a paparik iray anak yon lalaki.

⁷ “No panoy idadakel yon papari, ontan met so idadakel na kasalanan yo, kanyan pagmaliwen kon kababaingan so kagalangan yo.

⁸ Minmayaman kayo lapud saray kasalanan da ray totook, kanyan labalabay yon ompalaloy kasalanan da.

⁹ Nadusa kayo met a singa kadusa da ray totoo! Dusaen ta kayo tan singilen ta kayod saray maoges a gagawaen yo.

¹⁰ Kanen yoy betang yo ed saray bagat, balet ag kayo nin siansia napesel. Igagalang yo ray diriyos a makapalokun, balet siansian ag kayo makaanak, lapud imbeneg yo ak diad intombuk yod saray arum a diriyos.”

Sumpaen na Katawan so Panangigalang da ray Pagano

¹¹ Say Katawan kuanto, “Eekalen na daan tan say balon alak so kalakal na saray totook!

¹² Onkekerew ira na puyan a manlapud sakey a poter na kiew! Sasalitaen na sakey bastun so labay dan amtaen. Inkaindan da ak. Aliling day sakey a biin mikakaloguran, diad impanlilingkur da ed arum a diriyos.

¹³ Mangisasaklang iray bagat diad saray masanton pasen ed saray toktok na palandey, tan diad toktok na saray pokdul mampopool ira na insinso diad silong na saray atagey, tan masalumpapak a kiew, lapud balibali so sirum da! “Ontan sirin, nagmaliw a marotak a bii iray anak yo, tan saray bibiin manugang yo et mikakaloguran ira.

¹⁴ Anggaman ontan ag ko ra dusaen ed saya, lapud sikayon dili et miaakdul kayo ed saray marotak a bibiid timplo, tan kaiba yo ran mangisasaklang na saray bagat da ray pagano. Onung na ibabagay sakey a probirbio, ‘Naderal iray totoon anggapoy kalakal da.’

¹⁵ “Anggaman ya aliwa kayon matoor ed siak, sikayon totood Israel, ag komun mankasalanan iray taga Juda na singa onya. Ag ka mangigagalang ed Gilgal odino diad Bet-haven, odino mansipan kad man diad ngaran na mabilay a Katawan.

¹⁶ Benger a singa saray ayep a mula iray totood Israel. Panoy pamakan kod sikara a singa pamakan ed saray kordiro diad malambut a pastolan?

¹⁷ Saray totood Israel et wala rad silong na pakaoley da ray talintaoy diriyos. Paolyan mo ra labat ed labay da.

¹⁸ Kayari ran oninom na pinasyan alak, manliket irad piakdul dad saray marotak a bibii; labay da niy napelag ed kababaingan nen say makagamur na kagalangan.

¹⁹ Nibantak ira naani ed arum a bansa, a singa ra intikyab na mabiskeg a dagem tan ombaing ira lapud saray paganon bagat da.