Oseas 2 - Maung A Balita Biblia

¹ Kanyan tawag mo ray kaparam ya Israelita na “Saray Totoo na Dios” tan “Naaro-na-Katawan.”

Si Aliwan Matoor a Gomer—Say Aliwan Matoor ya Israel

² Anak ko, pitongtongan yoy ina yo—anggaman ya ag ko la asawa, tan ag to ak la asawa. Pikasi yod sikato a tondaan to lay marotak a gagawaen to tan say pikakaloguran to.

³ No ag to tondaan so gagawaen to, lakseban ko tan paolyan kon singa kapawapaway tod eges na ina to. Pagmaliwen kon singa kalawakan a kinmelang, et ompatey ed kaapgaan.

^4-5 Ag ko kasian iray anak tod paway; anak ira na anggapoy baing a managkaloguran a bii. Sikaton dili kuanto, “Onla ak ed saray kainarowan ko—mangiiter ira na taganok tan inomen ko, say lana tan linen a kawes ko, say larak na oliba tan say alak.”

⁶ Kanyan kulongen kon paliberan na masabit a tanaman tan padiren koy dalanen to, pian ag makapaway.

⁷ Osilan to ray kainarowan to, balet ag to ra naabot. Anapen to ra, balet ag to ra narumog. Insan to ikuan, “Ompawil ak ed samay inmonan asawak, ta maung niy kipapasen na bilay ko nen kaamung ko nen say kipapasen ko natan.”

⁸ Ag ton balut birbiren a siak so angiter ed sikato na trigo, alak, larak na oliba, tan amin a balituk tan pilak ya inkakana tod impangigagalang tod Baal.

⁹ Kanyan no panagani babawien kod sikato ray rigalok a trigo tan alak, alaen kod sikato ray lana tan linen a kawes ya inter kod sikato.

¹⁰ Labusan kod arap na saray kainarowan to, et anggapoy makapangyagel ed sikatod pakayarik.

¹¹ Patondaen kon amin iray pista to—saray pista ton binulan tan tinaon, say panagngilin tod Agew na Panagpainawa tan amin da ray tinandaan a pista.

¹² Deralen koy kaubasan to tan saray kakiewan ton igos, ya onung ed imbaga to iniiter ed sikato na saray kainarowan to, lapud panlilingkur tod sikara. Pagmaliwen kon kalawakan iray kaubasan to tan saray kakiewan to; deralen ira na saray ayayep ed katakelan.

¹³ Dusaen ko lapud saray panaon ya inkaindan to ak, ta nampopool ed Baal na insinso tan insosolung to ray alahas pian naayat to ray kainarowan to. Say Katawan so nansalita.

Say Panangaro na Katawan ed saray Totoo to

¹⁴ Kanyan iyakar ko lamet ed kalawakan yan bii; diman ko pandaleman na panangarok pian napapawil kod siak.

¹⁵ Ipawil kod sikato may kaubasan a kayaryan to nen saman, tan pagmaliwen kon puirta na ilalo so Patar na Gunigon. Ebatan to ak diman a singa samay ginawa to nen malangwer ni, sanen sikatoy pinmaway a nanlapud Egipto.

¹⁶ Diad satan tawagen to ak lamet ya asawa to—ag to ak la tawagen a Baal to.

¹⁷ Ag ko lan balut pabitlad sikato so ngaran a Baal.

¹⁸ Diad satan a panaon misipanan ak ed amin da ray ayayep ed katakelan tan saray manok, pian ag da la pasakitan iray totook. Ekalen ko met ed dalin iray amin ya armas ed bakal, amin da ray ispada tan saray pana, tan panayamen kon mareen tan arawid kaatapan iray totook.

¹⁹ Israel, pagmaliwen ta ka ya asawak; siak so matwa tan matoor ed sika; ipanengneng kod sikay ag mangoman a panangarok tan panangasik tan pagmaliwen ta kan kayaryan ko ya anggad angga.

²⁰ Tooren koy sipan ko tan kayaryanen ta ka, tan birbiren mo ak a Katawan.

^21-22 Diad satan a panaon ebatan ko ray pikakasi na saray totook ya Israel. Papelagen koy oran ed tapew na dalin, et say dalin mangiter na trigo, ubas tan oliba.

²³ Iligen kod dalin iray totook tan paaligwasen ko ra. Aroen ko ra may atawag ya “Ag Naaro,” tan saramay atawag ya “Aliwan Totook” ibagak ed sikara, “Sikayo ray totook,” et onebat ira, “Sika so Dios mi.”