Oseas 1 - Maung A Balita Biblia

¹ Sikato yay sinalita na Katawan ed kinen Oseas a lakin anak nen Beeri legan na panaon na impanarid Juda di Uzias, Jotam, Acaz, tan Ezekias, tan si Jeroboam a lakin anak nen Joas so arid Israel.

Say Asawa tan saray Anak nen Oseas

² Nen inmonan akisalitay Katawan ed Israel diad panamegley nen Oseas, inkuantod kinen Oseas, “Laka ta mangasawa ka; say naasawam et magmaliw ya aliwan matoor ed sika, tan saray anak mo naani et magmaliw iran singa sikato. Ontan met so impangikaindan ed siak na saray totook tan nagmaliw iran aliwan matoor ed siak.”

³ Kanyan angasaway Oseas na sakey a biin manngaray Gomer ya anak nen Diblaim. Kapaway na lakin onaan ya anak da,

⁴ say Katawan kuantod kinen Oseas, “Ingaran mo na ‘Jezreel,’ ta magano lay panusak ed Israel lapud saramay impamapatey nen laki ton Jehu diad siudad na Jezreel. Patondaen ko la so panooley nen Jehu tan saray kabyangay pamilya to.

⁵ Diad satan a panaon deralen kod Patar na Jezreel so pakayari da ray sondalo na Israel.”

⁶ Nanlokun lamet si Gomer tan nananak na sakey a bii. Say Katawan kuantod kinen Oseas, “Ingaran mo so anak mo na “Ag naaro,” ta ag ko la aroen iray totood Israel odino pirdonaen ira.

⁷ Balet aroen ko ray totood Juda. Siak a Katawan a Dios da, iyagel ko ra, aliwan diad panamegley na ispada odino pana, odino kabayo tan kumakabayo.”

⁸ Kayarin pinakso nen Gomer imay anak ton bii, nanlokun lamet tan nananak na sakey a laki.

⁹ Say Katawan kuantod kinen Oseas, “Ingaran mo so anak mo na ‘Aliwan-Took,’ ta ag ko totoo iray totood Israel, tan aliwan siak so Dios da.”

Nipawil ed Gendat a Kipapasen to so Israel

¹⁰ Magmaliw a singa karakel na buer ed dayat iray totood Israel; ag ira nabilang odino nasukat. Natan say Dios kuantod sikara, “Aliwa kayon totook,” balet onsabiy agew ya ibaga tod sikara, “Sikayo ray anak na mabilay a Dios!”

¹¹ Mankasakey iray totood Juda tan saray totood Israel. Mamili ra na saksakey a pangulo ra, et ombaleg tan onaligwas ira lamet ed dilin dalin da. On, matalonggaring so agew nen Jezreel!