Nehemias 3 - Maung A Balita Biblia

Say Impamaalagey lamet ed Padir na Jerusalem

¹ Onya so impamaalagey lamet ed padir na siudad. Pinasimbalon impaalagey nen Eliasib a Pangulon Pari tan saray kapara ton papari so Puirta na Karniro. Insaklang dad Dios, insan da inyan iray puirta to. Insaklang da so padir ya anggad Tori na Sanlasus tan say Tori nen Hananeel.

² Impaalagey na saray lalakid Jerico so onsoblay a soldung na padir. Impaalagey nen Zacur a lakin anak nen Imri so onsoblay a soldung na padir.

³ Impaalagey na saray kabyangay boleg nen Hasenaa so Puirta na Sira. Inlira da ray panuksolan tan saray puirta, insan da inyan iray balewet a pangisarad puirta.

⁴ Impaalagey nen Meremot a lakin anak nen Urias tan apo nen Haccoz so onsoblay a soldung na padir. Impaalagey nen Mesullam a lakin anak nen Berekias tan apo nen Mesezabel so onsoblay a soldung na padir. Impaalagey nen Sadoc a lakin anak nen Baana so onsoblay a soldung na padir.

⁵ Impaalagey na saray lalakid Tecoa so onsoblay a soldung na padir, balet saray manonan lalakid baley et ag tinmoluk ed saray makaoley ya angibagad sikaran mankimey.

⁶ Impaalagey lamet nen Joiada a lakin anak nen Pasea tan si Mesullam a lakin anak nen Besodias so Puirta na Jesana. Inlira da ray panuksolan tan saray puirta, insan da inyan iray balewet a pangisarad puirta.

⁷ Impaalagey nen Melatias a taga Gabaon, si Jadon a taga Meronot, tan saray lalakid siudad na Gabaon tan Mizpa so onsoblay a soldung na padir ya anggad kawalaay abung na gobirnador na Luyag na Sagur na Eufrates.

⁸ Impaalagey nen Uziel a lakin anak nen Harhaya tan sakey a platiro so onsoblay a soldung na padir. Impaalagey nen Hanaias a gumagaway pabalingit so onsoblay a soldung na padir ya anggad Padir na Malapar.

⁹ Impaalagey nen Refaias a lakin anak nen Hur tan manoley ed kapaldua na Distritoy Jerusalem so onsoblay a soldung na padir.

¹⁰ Impaalagey nen Jedaya a lakin anak nen Harumaf so onsoblay a soldung na padir ya asingger ed dilin abung to. Impaalagey nen Hatus a lakin anak nen Hasabnias so onsoblay a soldung na padir.

¹¹ Impaalagey nen Malkias a lakin anak nen Harim, tan si Hasub a lakin anak nen Pahat-moab so onsoblay a soldung na padir tan say Tori na saray Pogun.

¹² Impaalagey nen Sallum a lakin anak nen Hallohes, tan manoley ed kapaldua na Distritoy Jerusalem so onsoblay a soldung na padir. (Tinmulong ed kimey iray anak ton bibii.)

¹³ Pinasimbalon impaalagey nen Hanun tan saray manaayam ed siudad na Zanoa so Puirta na Patar. Inlira da ray puirta, insan da inyan iray balewet a pangisarad puirta. Inapiger da met so apat a lasus tan apataplon mitro ed padir ya anggad Puirta na Deral-deral.

¹⁴ Pinasimbalon impaalagey nen Malkias a lakin anak nen Recab tan manoley na distritoy Betha-kerim so Puirta na Deral-deral. Inlira to ray puirta, insan to inyan iray balewet a pangisarad puirta.

¹⁵ Pinasimbalon impaalagey nen Sallum a lakin anak nen Col-hoza tan manoley na distritoy Mizpa so Puirta na Sobul. Tinarungan to, inlira to ray puirta, insan to inyan iray balewet. Diad Dipositoway Danum na Seloe impaalagey toy padir ya akiketeg ed tanamanan na ari, ya anggad saray balitang a mampaleksab manlapud Siudad nen David.

¹⁶ Impaalagey nen Nehemias a lakin anak nen Azbuk tan manoley ed kapaldua na distritoy Bet-sur so onsoblay a soldung na padir ya anggad kawalaay lobuk nen David, anggad dipositoy danum, tan anggad panaayaman da ray sondalo.

Saray Levitan Nankimey ed Padir

¹⁷ Tinmulong ed impamaalagey lamet ed padir iray onggendan a Levita: Impaalagey nen Rehum a lakin anak nen Bani so onsoblay a soldung na padir; Impaalagey nen Hasabias a manoley na kapalduay distrito na Keila so onsoblay a soldung na padir diad ngaran na distrito to;

¹⁸ Impaalagey nen Bavai a lakin anak nen Henadad tan manoley na kapalduay distrito na Keila so onsoblay a soldung na padir;

¹⁹ Impaalagey nen Ezer a lakin anak nen Jesua tan manoley ed Mizpa so onsoblay a soldung na padir a walad arap na panagsinupay armas, ya anggad pasen a nilikoay padir;

²⁰ Impaalagey nen Baruc a lakin anak nen Zacai so onsoblay a soldung na padir ya anggad lolooban na abung nen Eliasib a pangulon pari.

²¹ Impaalagey nen Meremot a lakin anak nen Urias tan apo nen Haccoz so onsoblay a soldung na padir ya anggad kasamputay abung nen Eliasib.

Saray Paparin Nankimey ed Padir

²² Tinmulong ed impamaalagey lamet ed padir iray onggendan a papari: Impaalagey na saray paparin walad kaliber-liber na Jerusalem so onsoblay a soldung na padir;

²³ Impaalagey nen Benjamin tan si Hasub so onsoblay a soldung na padir a walad arap na kaabungan da; Impaalagey nen Azarias a lakin anak nen Maasias tan apo nen Ananias so onsoblay a soldung na padir a walad arap na abung to;

²⁴ Impaalagey nen Binui a lakin anak nen Henadad so onsoblay a soldung na padir manlapud abung nen Azarias ya anggad suyok na padir;

^25-26 Impaalagey nen Palal a lakin anak nen Uzai so onsoblay a soldung na padir manlapud suyok na padir tan say tori ed atagey a parti na palasio diad abay na kuartil da ray guardia; Impaalagey nen Pedaya a lakin anak nen Paros so onsoblay a soldung na padir ya anggad bokig ya asingger ed Puirta na Danum tan say tori a mangguaguardiad Timplo. (Sikato yay pasen ya asingger ed parti na siudad a tatawagey Ofel, a diay nanayaman da ray kumikimey ed Timplo.)

Saray Arum a Nankimey

²⁷ Impaalagey na saray lalakid siudad na Tecoa so onsoblay a soldung na padir manlapud petek na baleg a torin mangguaguardiad Timplo ya anggad padir ya asingger ed Ofel; kumadwa yan impaalagey da.

²⁸ Impaalagey na sakey a grupoy papari so onsoblay a soldung na padir a mampaarap ed baybay manlapud Puirta na Kabayo; impaalagey na balang sakey ed sikara so padir a walad arap na abung ton dili.

²⁹ Impaalagey nen Sadoc a lakin anak nen Imer so onsoblay a soldung na padir a walad arap na abung to. Impaalagey nen Semaya a lakin anak nen Secanias tan managasikasoy Puirta na Bokig so onsoblay a soldung na Padir.

³⁰ Impaalagey nen Hananias a lakin anak nen Selemias tan si Hanun a kumanem a lakin anak nen Zalaf so onsoblay a soldung na padir; kumadwa yan impaalagey da. Impaalagey nen Mesullam a lakin anak nen Berekias so onsoblay a soldung na padir a walad arap na abung to.

³¹ Impaalagey nen Malkias a platiro so onsoblay a soldung na padir ya anggad paalagey ya ikakana na saray kumikimey ed Timplo tan saray negosianti. Sayan pasen et walad abay na Puirta na Miphkad; tan asingger ed kuarton walad toktok na baybay a bokig a suyok na padir.

³² Impaalagey na saray platiro tan saray negosianti so onsoblay a soldung na padir manlapud kuartod suyok ya anggad Puirta na Karniro.